Confessio Amantis. Explicit Liber Secundus

Incipit Liber Tercius

Ira suis paribus est par furiis Acherontis,
Quo furor ad tempus nil pietatis habet.
Ira malencolicos animos perturbat, vt equo
Iure sui pondus nulla statera tenet.
Omnibus in causis grauat Ira, set inter amantes,
Illa magis facili sorte grauamen agit:
Est vbi vir discors leuiterque repugnat amori,
Sepe loco ludi fletus ad ora venit.

----------------------------------- ------------------------------------------------< br>
If thou the vices lest to knowe,
Mi Sone, it hath noght ben unknowe,
Fro ferst that men the swerdes grounde,
That ther nis on upon this grounde,
A vice forein fro the lawe,
Wherof that many a good felawe
Hath be distraght be sodein chance;
And yit to kinde no plesance
It doth, bot wher he most achieveth
His pourpos, most to kinde he grieveth,
As he which out of conscience
Is enemy to pacience:
And is be name on of the Sevene,
Which ofte hath set this world unevene,
And cleped is the cruel Ire,
Whos herte is everemore on fyre
To speke amis and to do bothe,
For his servantz ben evere wrothe.
Mi goode fader, tell me this:
What thing is Ire? Sone, it is
That in oure englissh Wrathe is hote,
Which hath hise wordes ay so hote,
That all a mannes pacience
Is fyred of the violence.
For he with him hath evere fyve
Servantz that helpen him to stryve:
The ferst of hem Malencolie
Is cleped, which in compaignie
An hundred times in an houre
Wol as an angri beste loure,
And noman wot the cause why.
Mi Sone, schrif thee now forthi:
Hast thou be Malencolien?
Ye, fader, be seint Julien,
Bot I untrewe wordes use,
I mai me noght therof excuse:
And al makth love, wel I wot,
Of which myn herte is evere hot,
So that I brenne as doth a glede
For Wrathe that I mai noght spede.
And thus fulofte a day for noght
Save onlich of myn oghne thoght
I am so with miselven wroth,
That how so that the game goth
With othre men, I am noght glad;
Bot I am wel the more unglad,
For that is othre mennes game
It torneth me to pure grame.
Thus am I with miself oppressed
Of thoght, the which I have impressed,
That al wakende I dreme and meete
That I with hire al one meete
And preie hire of som good ansuere:
Bot for sche wol noght gladly swere,
Sche seith me nay withouten oth;
And thus wexe I withinne wroth,
That outward I am al affraied,
And so distempred and esmaied.
A thousand times on a day
Ther souneth in myn Eres nay,
The which sche seide me tofore:
Thus be my wittes as forlore;
And namely whan I beginne
To rekne with miself withinne
How many yeres ben agon,
Siththe I have trewly loved on
And nevere tok of other hede,
And evere aliche fer to spede
I am, the more I with hir dele,
So that myn happ and al myn hele
Me thenkth is ay the leng the ferre,
That bringth my gladschip out of herre,
Wherof my wittes ben empeired,
And I, as who seith, al despeired.
For finaly, whan that I muse
And thenke how sche me wol refuse,
I am with anger so bestad,
For al this world mihte I be glad:
And for the while that it lasteth
Al up so doun my joie it casteth,
And ay the furthere that I be,
Whan I ne may my ladi se,
The more I am redy to wraththe,
That for the touchinge of a laththe
Or for the torninge of a stree
I wode as doth the wylde Se,
And am so malencolious,
That ther nys servant in myn hous
Ne non of tho that ben aboute,
That ech of hem ne stant in doute,
And wenen that I scholde rave
For Anger that thei se me have;
And so thei wondre more and lasse,
Til that thei sen it overpasse.
Bot, fader, if it so betide,
That I aproche at eny tide
The place wher my ladi is,
And thanne that hire like ywiss
To speke a goodli word untome,
For al the gold that is in Rome
Ne cowthe I after that be wroth,
Bot al myn Anger overgoth;
So glad I am of the presence
Of hire, that I all offence
Foryete, as thogh it were noght,
So overgladed is my thoght.
And natheles, the soth to telle,
Ayeinward if it so befelle
That I at thilke time sihe
On me that sche miscaste hire yhe,
Or that sche liste noght to loke,
And I therof good hiede toke,
Anon into my ferste astat
I torne, and am with al so mat,
That evere it is aliche wicke.
And thus myn hand ayein the pricke
I hurte and have do many day,
And go so forth as I go may,
Fulofte bitinge on my lippe,
And make unto miself a whippe.
With which in many a chele and hete
Mi wofull herte is so tobete,
That all my wittes ben unsofte
And I am wroth, I not how ofte;
And al it is Malencolie,
Which groweth of the fantasie
Of love, that me wol noght loute:
So bere I forth an angri snoute
Ful manye times in a yer.
Bot, fader, now ye sitten hier
In loves stede, I yow beseche,
That som ensample ye me teche,
Wherof I mai miself appese.
Mi Sone, for thin hertes ese
I schal fulfille thi preiere,
So that thou miht the betre lere
What mischief that this vice stereth,
Which in his Anger noght forbereth,
Wherof that after him forthenketh,
Whan he is sobre and that he thenketh
Upon the folie of his dede;
And of this point a tale I rede.
Ther was a king which Eolus
Was hote, and it befell him thus,
That he tuo children hadde faire,
The Sone cleped was Machaire,
The dowhter ek Canace hihte.
Be daie bothe and ek be nyhte,
Whil thei be yonge, of comun wone
In chambre thei togedre wone,
And as thei scholden pleide hem ofte,
Til thei be growen up alofte
Into the youthe of lusti age,
Whan kinde assaileth the corage
With love and doth him forto bowe,
That he no reson can allowe,
Bot halt the lawes of nature:
For whom that love hath under cure,
As he is blind himself, riht so
He makth his client blind also.
In such manere as I you telle
As thei al day togedre duelle,
This brother mihte it noght asterte
That he with al his hole herte
His love upon his Soster caste:
And so it fell hem ate laste,
That this Machaire with Canace
Whan thei were in a prive place,
Cupide bad hem ferst to kesse,
And after sche which is Maistresse
In kinde and techeth every lif
Withoute lawe positif,
Of which sche takth nomaner charge,
Bot kepth hire lawes al at large,
Nature, tok hem into lore
And tawht hem so, that overmore
Sche hath hem in such wise daunted,
That thei were, as who seith, enchaunted.
And as the blinde an other ledeth
And til thei falle nothing dredeth,
Riht so thei hadde non insihte;
Bot as the bridd which wole alihte
And seth the mete and noght the net,
Which in deceipte of him is set,
This yonge folk no peril sihe,
Bot that was likinge in here yhe,
So that thei felle upon the chance
Where witt hath lore his remembrance.
So longe thei togedre assemble,
The wombe aros, and sche gan tremble,
And hield hire in hire chambre clos
For drede it scholde be disclos
And come to hire fader Ere:
Wherof the Sone hadde also fere,
And feigneth cause forto ryde;
For longe dorste he noght abyde,
In aunter if men wolde sein
That he his Soster hath forlein:
For yit sche hadde it noght beknowe
Whos was the child at thilke throwe.
Machaire goth, Canace abit,
The which was noght delivered yit,
Bot riht sone after that sche was.
Now lest and herkne a woful cas.
The sothe, which mai noght ben hid,
Was ate laste knowe and kid
Unto the king, how that it stod.
And whan that he it understod,
Anon into Malencolie,
As thogh it were a frenesie,
He fell, as he which nothing cowthe
How maistrefull love is in yowthe:
And for he was to love strange,
He wolde noght his herte change
To be benigne and favorable
To love, bot unmerciable
Betwen the wawe of wod and wroth
Into his dowhtres chambre he goth,
And sih the child was late bore,
Wherof he hath hise othes swore
That sche it schal ful sore abye.
And sche began merci to crie,
Upon hire bare knes and preide,
And to hire fader thus sche seide:
'Ha mercy! fader, thenk I am
Thi child, and of thi blod I cam.
That I misdede yowthe it made,
And in the flodes bad me wade,
Wher that I sih no peril tho:
Bot now it is befalle so,
Merci, my fader, do no wreche!'
And with that word sche loste speche
And fell doun swounende at his fot,
As sche for sorwe nedes mot.
Bot his horrible crualte
Ther mihte attempre no pite:
Out of hire chambre forth he wente
Al full of wraththe in his entente,
And tok the conseil in his herte
That sche schal noght the deth asterte,
As he which Malencolien
Of pacience hath no lien,
Wherof the wraththe he mai restreigne.
And in this wilde wode peine,
Whanne al his resoun was untame,
A kniht he clepeth be his name,
And tok him as be weie of sonde
A naked swerd to bere on honde,
And seide him that he scholde go
And telle unto his dowhter so
In the manere as he him bad,
How sche that scharpe swerdes blad
Receive scholde and do withal
So as sche wot wherto it schal.
Forth in message goth this kniht
Unto this wofull yonge wiht,
This scharpe swerd to hire he tok:
Wherof that al hire bodi qwok,
For wel sche wiste what it mente,
And that it was to thilke entente
That sche hireselven scholde slee.
And to the kniht sche seide: 'Yee,
Now that I wot my fadres wille,
That I schal in this wise spille,
I wole obeie me therto,
And as he wole it schal be do.
Bot now this thing mai be non other,
I wole a lettre unto mi brother,
So as my fieble hand may wryte,
With al my wofull herte endite.'
Sche tok a Penne on honde tho,
Fro point to point and al the wo,
Als ferforth as hireself it wot,
Unto hire dedly frend sche wrot,
And tolde how that hire fader grace
Sche mihte for nothing pourchace;
And overthat, as thou schalt hiere,
Sche wrot and seide in this manere:
'O thou my sorwe and my gladnesse,
O thou myn hele and my siknesse,
O my wanhope and al my trust,
O my desese and al my lust,
O thou my wele, o thou my wo,
O thou my frend, o thou my fo,
O thou my love, o thou myn hate,
For thee mot I be ded algate.
Thilke ende may I noght asterte,
And yit with al myn hole herte,
Whil that me lasteth eny breth,
I wol the love into my deth.
Bot of o thing I schal thee preie,
If that my litel Sone deie,
Let him be beried in my grave
Beside me, so schalt thou have
Upon ous bothe remembrance.
For thus it stant of my grevance;
Now at this time, as thou schalt wite,
With teres and with enke write
This lettre I have in cares colde:
In my riht hond my Penne I holde,
And in my left the swerd I kepe,
And in my barm ther lith to wepe
Thi child and myn, which sobbeth faste.
Now am I come unto my laste:
Fare wel, for I schal sone deie,
And thenk how I thi love abeie.'
The pomel of the swerd to grounde
Sche sette, and with the point a wounde
Thurghout hire herte anon sche made,
And forth with that al pale and fade
Sche fell doun ded fro ther sche stod.
The child lay bathende in hire blod
Out rolled fro the moder barm,
And for the blod was hot and warm,
He basketh him aboute thrinne.
Ther was no bote forto winne,
For he, which can no pite knowe,
The king cam in the same throwe,
And sih how that his dowhter dieth
And how this Babe al blody crieth;
Bot al that mihte him noght suffise,
That he ne bad to do juise
Upon the child, and bere him oute,
And seche in the Forest aboute
Som wilde place, what it were,
To caste him out of honde there,
So that som best him mai devoure,
Where as noman him schal socoure.
Al that he bad was don in dede:
Ha, who herde evere singe or rede
Of such a thing as that was do?
Bot he which ladde his wraththe so
Hath knowe of love bot a lite;
Bot for al that he was to wyte,
Thurgh his sodein Malencolie
To do so gret a felonie.
Forthi, my Sone, how so it stonde,
Be this cas thou miht understonde
That if thou evere in cause of love
Schalt deme, and thou be so above
That thou miht lede it at thi wille,
Let nevere thurgh thi Wraththe spille
Which every kinde scholde save.
For it sit every man to have
Reward to love and to his miht,
Ayein whos strengthe mai no wiht:
And siththe an herte is so constreigned,
The reddour oghte be restreigned
To him that mai no bet aweie,
Whan he mot to nature obeie.
For it is seid thus overal,
That nedes mot that nede schal
Of that a lif doth after kinde,
Wherof he mai no bote finde.
What nature hath set in hir lawe
Ther mai no mannes miht withdrawe,
And who that worcheth therayein,
Fulofte time it hath be sein,
Ther hath befalle gret vengance,
Wherof I finde a remembrance.
Ovide after the time tho
Tolde an ensample and seide so,
How that whilom Tiresias,
As he walkende goth per cas,
Upon an hih Montaine he sih
Tuo Serpentz in his weie nyh,
And thei, so as nature hem tawhte,
Assembled were, and he tho cawhte
A yerde which he bar on honde,
And thoghte that he wolde fonde
To letten hem, and smot hem bothe:
Wherof the goddes weren wrothe;
And for he hath destourbed kinde
And was so to nature unkinde,
Unkindeliche he was transformed,
That he which erst a man was formed
Into a womman was forschape.
That was to him an angri jape;
Bot for that he with Angre wroghte,
Hise Angres angreliche he boghte.
Lo thus, my Sone, Ovide hath write,
Wherof thou miht be reson wite,
More is a man than such a beste:
So mihte it nevere ben honeste
A man to wraththen him to sore
Of that an other doth the lore
Of kinde, in which is no malice,
Bot only that it is a vice:
And thogh a man be resonable,
Yit after kinde he is menable
To love, wher he wole or non.
Thenk thou, my Sone, therupon
And do Malencolie aweie;
For love hath evere his lust to pleie,
As he which wolde no lif grieve.
Mi fader, that I mai wel lieve;
Al that ye tellen it is skile:
Let every man love as he wile,
Be so it be noght my ladi,
For I schal noght be wroth therby.
Bot that I wraththe and fare amis,
Al one upon miself it is,
That I with bothe love and kinde
Am so bestad, that I can finde
No weie how I it mai asterte:
Which stant upon myn oghne herte
And toucheth to non other lif,
Save only to that swete wif
For whom, bot if it be amended,
Mi glade daies ben despended,
That I miself schal noght forbere
The Wraththe which that I now bere,
For therof is non other leche.
Now axeth forth, I yow beseche,
Of Wraththe if ther oght elles is,
Wherof to schryve. Sone, yis.
Of Wraththe the secounde is Cheste,
Which hath the wyndes of tempeste
To kepe, and many a sodein blast
He bloweth, wherof ben agast
Thei that desiren pes and reste.
He is that ilke ungoodlieste
Which many a lusti love hath twinned;
For he berth evere his mowth unpinned,
So that his lippes ben unloke
And his corage is al tobroke,
That every thing which he can telle,
It springeth up as doth a welle,
Which mai non of his stremes hyde,
Bot renneth out on every syde.
So buillen up the foule sawes
That Cheste wot of his felawes:
For as a Sive kepeth Ale,
Riht so can Cheste kepe a tale;
Al that he wot he wol desclose,
And speke er eny man oppose.
As a Cite withoute wal,
Wher men mai gon out overal
Withouten eny resistence,
So with his croked eloquence
He spekth al that he wot withinne:
Wherof men lese mor than winne,
For ofte time of his chidinge
He bringth to house such tidinge,
That makth werre ate beddeshed.
He is the levein of the bred,
Which soureth al the past aboute:
Men oghte wel such on to doute,
For evere his bowe is redi bent,
And whom he hit I telle him schent,
If he mai perce him with his tunge.
And ek so lowde his belle is runge,
That of the noise and of the soun
Men feeren hem in al the toun
Welmore than thei don of thonder.
For that is cause of more wonder;
For with the wyndes whiche he bloweth
Fulofte sythe he overthroweth
The Cites and the policie,
That I have herd the poeple crie,
And echon seide in his degre,
'Ha wicke tunge, wo thee be!'
For men sein that the harde bon,
Althogh himselven have non,
A tunge brekth it al to pieces.
He hath so manye sondri spieces
Of vice, that I mai noght wel
Descrive hem be a thousendel:
Bot whan that he to Cheste falleth,
Ful many a wonder thing befalleth,
For he ne can nothing forbere.
Now tell me, Sone, thin ansuere,
If it hath evere so betidd,
That thou at eny time hast chidd
Toward thi love. Fader, nay:
Such Cheste yit unto this day
Ne made I nevere, god forbede:
For er I sunge such a crede,
I hadde levere to be lewed;
For thanne were I al beschrewed
And worthi to be put abak
With al the sorwe upon my bak
That eny man ordeigne cowthe.
Bot I spak nevere yit be mowthe
That unto Cheste mihte touche,
And that I durste riht wel vouche
Upon hirself as for witnesse;
For I wot, of hir gentilesse
That sche me wolde wel excuse,
That I no suche thinges use.
And if it scholde so betide
That I algates moste chide,
It myhte noght be to my love:
For so yit was I nevere above,
For al this wyde world to winne
That I dorste eny word beginne,
Be which sche mihte have ben amoeved
And I of Cheste also reproeved.
Bot rathere, if it mihte hir like,
The beste wordes wolde I pike
Whiche I cowthe in myn herte chese,
And serve hem forth in stede of chese,
For that is helplich to defie;
And so wolde I my wordes plie,
That mihten Wraththe and Cheste avale
With tellinge of my softe tale.
Thus dar I make a foreward,
That nevere unto my ladiward
Yit spak I word in such a wise,
Wherof that Cheste scholde arise.
This seie I noght, that I fulofte
Ne have, whanne I spak most softe,
Per cas seid more thanne ynowh;
Bot so wel halt noman the plowh
That he ne balketh otherwhile,
Ne so wel can noman affile
His tunge, that som time in rape
Him mai som liht word overscape,
And yit ne meneth he no Cheste.
Bot that I have ayein hir heste
Fulofte spoke, I am beknowe;
And how my will is, that ye knowe:
For whan my time comth aboute,
That I dar speke and seie al oute
Mi longe love, of which sche wot
That evere in on aliche hot
Me grieveth, thanne al my desese
I telle, and though it hir desplese,
I speke it forth and noght ne leve:
And thogh it be beside hire leve,
I hope and trowe natheles
That I do noght ayein the pes;
For thogh I telle hire al my thoght,
Sche wot wel that I chyde noght.
Men mai the hihe god beseche,
And he wol hiere a mannes speche
And be noght wroth of that he seith;
So yifth it me the more feith
And makth me hardi, soth to seie,
That I dar wel the betre preie
Mi ladi, which a womman is.
For thogh I telle hire that or this
Of love, which me grieveth sore,
Hire oghte noght be wroth the more,
For I withoute noise or cri
Mi pleignte make al buxomly
To puten alle wraththe away.
Thus dar I seie unto this day
Of Cheste in ernest or in game
Mi ladi schal me nothing blame.
Bot ofte time it hath betidd
That with miselven I have chidd,
That noman couthe betre chide:
And that hath ben at every tide,
Whanne I cam to miself al one;
For thanne I made a prive mone,
And every tale by and by,
Which as I spak to my ladi,
I thenke and peise in my balance
And drawe into my remembrance;
And thanne, if that I finde a lak
Of eny word that I mispak,
Which was to moche in eny wise,
Anon my wittes I despise
And make a chidinge in myn herte,
That eny word me scholde asterte
Which as I scholde have holden inne.
And so forth after I beginne
And loke if ther was elles oght
To speke, and I ne spak it noght:
And thanne, if I mai seche and finde
That eny word be left behinde,
Which as I scholde more have spoke,
I wolde upon miself be wroke,
And chyde with miselven so
That al my wit is overgo.
For noman mai his time lore
Recovere, and thus I am therfore
So overwroth in al my thoght,
That I myself chide al to noght:
Thus for to moche or for to lite
Fulofte I am miself to wyte.
Bot al that mai me noght availe,
With cheste thogh I me travaile:
Bot Oule on Stock and Stock on Oule;
The more that a man defoule,
Men witen wel which hath the werse;
And so to me nys worth a kerse,
Bot torneth on myn oghne hed,
Thogh I, til that I were ded,
Wolde evere chyde in such a wise
Of love as I to you devise.
Bot, fader, now ye have al herd
In this manere how I have ferd
Of Cheste and of dissencioun,
Yif me youre absolucioun.
Mi Sone, if that thou wistest al,
What Cheste doth in special
To love and to his welwillinge,
Thou woldest flen his knowlechinge
And lerne to be debonaire.
For who that most can speke faire
Is most acordende unto love:
Fair speche hath ofte brought above
Ful many a man, as it is knowe,
Which elles scholde have be riht lowe
And failed mochel of his wille.
Forthi hold thou thi tunge stille
And let thi witt thi wille areste,
So that thou falle noght in Cheste,
Which is the source of gret destance:
And tak into thi remembrance
If thou miht gete pacience,
Which is the leche of alle offence,
As tellen ous these olde wise:
For whan noght elles mai suffise
Be strengthe ne be mannes wit,
Than pacience it oversit
And overcomth it ate laste;
Bot he mai nevere longe laste,
Which wol noght bowe er that he breke.
Tak hiede, Sone, of that I speke.
Mi fader, of your goodli speche
And of the witt which ye me teche
I thonke you with al myn herte:
For that world schal me nevere asterte,
That I ne schal your wordes holde,
Of Pacience as ye me tolde,
Als ferforth as myn herte thenketh;
And of my wraththe it me forthenketh.
Bot, fader, if ye forth withal
Som good ensample in special
Me wolden telle of som Cronique,
It scholde wel myn herte like
Of pacience forto hiere,
So that I mihte in mi matiere
The more unto my love obeie
And puten mi desese aweie.
Mi Sone, a man to beie him pes
Behoveth soffre as Socrates
Ensample lefte, which is write:
And for thou schalt the sothe wite,
Of this ensample what I mene,
Althogh it be now litel sene
Among the men thilke evidence,
Yit he was upon pacience
So sett, that he himself assaie
In thing which mihte him most mispaie
Desireth, and a wickid wif
He weddeth, which in sorwe and strif
Ayein his ese was contraire.
Bot he spak evere softe and faire,
Til it befell, as it is told,
In wynter, whan the dai is cold,
This wif was fro the welle come,
Wher that a pot with water nome
Sche hath, and broghte it into house,
And sih how that hire seli spouse
Was sett and loked on a bok
Nyh to the fyr, as he which tok
His ese for a man of age.
And sche began the wode rage,
And axeth him what devel he thoghte,
And bar on hond that him ne roghte
What labour that sche toke on honde,
And seith that such an Housebonde
Was to a wif noght worth a Stre.
He seide nowther nay ne ye,
Bot hield him stille and let hire chyde;
And sche, which mai hirself noght hyde,
Began withinne forto swelle,
And that sche broghte in fro the welle,
The waterpot sche hente alofte
And bad him speke, and he al softe
Sat stille and noght a word ansuerde;
And sche was wroth that he so ferde,
And axeth him if he be ded;
And al the water on his hed
Sche pourede oute and bad awake.
Bot he, which wolde noght forsake
His Pacience, thanne spak,
And seide how that he fond no lak
In nothing which sche hadde do:
For it was wynter time tho,
And wynter, as be weie of kinde
Which stormy is, as men it finde,
Ferst makth the wyndes forto blowe,
And after that withinne a throwe
He reyneth and the watergates
Undoth; 'and thus my wif algates,
Which is with reson wel besein,
Hath mad me bothe wynd and rein
After the Sesoun of the yer.'
And thanne he sette him nerr the fer,
And as he mihte hise clothes dreide,
That he nomore o word ne seide;
Wherof he gat him somdel reste,
For that him thoghte was the beste.
I not if thilke ensample yit
Acordeth with a mannes wit,
To soffre as Socrates tho dede:
And if it falle in eny stede
A man to lese so his galle,
Him oghte among the wommen alle
In loves Court be juggement
The name bere of Pacient,
To yive ensample to the goode
Of pacience how that it stode,
That othre men it mihte knowe.
And, Sone, if thou at eny throwe
Be tempted ayein Pacience,
Tak hiede upon this evidence;
It schal per cas the lasse grieve.
Mi fader, so as I believe,
Of that schal be no maner nede,
For I wol take so good hiede,
That er I falle in such assai,
I thenke eschuie it, if I mai.
Bot if ther be oght elles more
Wherof I mihte take lore,
I preie you, so as I dar,
Now telleth, that I mai be war,
Som other tale in this matiere.
Sone, it is evere good to lere,
Wherof thou miht thi word restreigne,
Er that thou falle in eny peine.
For who that can no conseil hyde,
He mai noght faile of wo beside,
Which schal befalle er he it wite,
As I finde in the bokes write.
Yit cam ther nevere good of strif,
To seche in all a mannes lif:
Thogh it beginne on pure game,
Fulofte it torneth into grame
And doth grevance upon som side.
Wherof the grete Clerk Ovide
After the lawe which was tho
Of Jupiter and of Juno
Makth in his bokes mencioun
How thei felle at dissencioun
In manere as it were a borde,
As thei begunne forto worde
Among hemself in privete:
And that was upon this degree,
Which of the tuo more amorous is,
Or man or wif. And upon this
Thei mihten noght acorde in on,
And toke a jugge therupon,
Which cleped is Tiresias,
And bede him demen in the cas;
And he withoute avisement
Ayein Juno yaf juggement.
This goddesse upon his ansuere
Was wroth and wolde noght forbere,
Bot tok awey for everemo
The liht fro bothe hise yhen tuo.
Whan Jupiter this harm hath sein,
An other bienfait therayein
He yaf, and such a grace him doth,
That for he wiste he seide soth,
A Sothseiere he was for evere:
Bot yit that other were levere,
Have had the lokinge of his yhe,
Than of his word the prophecie;
Bot how so that the sothe wente,
Strif was the cause of that he hente
So gret a peine bodily.
Mi Sone, be thou war ther by,
And hold thi tunge stille clos:
For who that hath his word desclos
Er that he wite what he mene,
He is fulofte nyh his tene
And lest ful many time grace,
Wher that he wolde his thonk pourchace.
And over this, my Sone diere,
Of othre men, if thou miht hiere
In privete what thei have wroght,
Hold conseil and descoevere it noght,
For Cheste can no conseil hele,
Or be it wo or be it wele:
And tak a tale into thi mynde,
The which of olde ensample I finde.
Phebus, which makth the daies lihte,
A love he hadde, which tho hihte
Cornide, whom aboven alle
He pleseth: bot what schal befalle
Of love ther is noman knoweth,
Bot as fortune hire happes throweth.
So it befell upon a chaunce,
A yong kniht tok hire aqueintance
And hadde of hire al that he wolde:
Bot a fals bridd, which sche hath holde
And kept in chambre of pure yowthe,
Discoevereth all that evere he cowthe.
This briddes name was as tho
Corvus, the which was thanne also
Welmore whyt than eny Swan,
And he that schrewe al that he can
Of his ladi to Phebus seide;
And he for wraththe his swerd outbreide,
With which Cornide anon he slowh.
Bot after him was wo ynowh,
And tok a full gret repentance,
Wherof in tokne and remembrance
Of hem whiche usen wicke speche,
Upon this bridd he tok this wreche,
That ther he was snow whyt tofore,
Evere afterward colblak therfore
He was transformed, as it scheweth,
And many a man yit him beschreweth,
And clepen him into this day
A Raven, be whom yit men mai
Take evidence, whan he crieth,
That som mishapp it signefieth.
Be war therfore and sei the beste,
If thou wolt be thiself in reste,
Mi goode Sone, as I the rede.
For in an other place I rede
Of thilke Nimphe which Laar hihte:
For sche the privete be nyhte,
How Jupiter lay be Jutorne,
Hath told, god made hire overtorne:
Hire tunge he kutte, and into helle
For evere he sende hir forto duelle,
As sche that was noght worthi hiere
To ben of love a Chamberere,
For sche no conseil cowthe hele.
And suche adaies be now fele
In loves Court, as it is seid,
That lete here tunges gon unteid.
Mi Sone, be thou non of tho,
To jangle and telle tales so,
And namely that thou ne chyde,
For Cheste can no conseil hide,
For Wraththe seide nevere wel.
Mi fader, soth is everydel
That ye me teche, and I wol holde
The reule to which I am holde,
To fle the Cheste, as ye me bidde,
For wel is him that nevere chidde.
Now tell me forth if ther be more
As touchende unto Wraththes lore.
Of Wraththe yit ther is an other,
Which is to Cheste his oghne brother,
And is be name cleped Hate,
That soffreth noght withinne his gate
That ther come owther love or pes,
For he wol make no reles
Of no debat which is befalle.
Now spek, if thou art on of alle,
That with this vice hast ben withholde.
As yit for oght that ye me tolde,
Mi fader, I not what it is.
In good feith, Sone, I trowe yis.
Mi fader, nay, bot ye me lere.
Now lest, my Sone, and thou schalt here.
Hate is a wraththe noght schewende,
Bot of long time gaderende,
And duelleth in the herte loken,
Til he se time to be wroken;
And thanne he scheweth his tempeste
Mor sodein than the wilde beste,
Which wot nothing what merci is.
Mi Sone, art thou knowende of this?
My goode fader, as I wene,
Now wot I somdel what ye mene;
Bot I dar saufly make an oth,
Mi ladi was me nevere loth.
I wol noght swere natheles
That I of hate am gulteles;
For whanne I to my ladi plie
Fro dai to dai and merci crie,
And sche no merci on me leith
Bot schorte wordes to me seith,
Thogh I my ladi love algate,
Tho wordes moste I nedes hate;
And wolde thei were al despent,
Or so ferr oute of londe went
That I nevere after scholde hem hiere;
And yit love I my ladi diere.
Thus is ther Hate, as ye mai se,
Betwen mi ladi word and me;
The word I hate and hire I love,
What so me schal betide of love.
Bot forthere mor I wol me schryve,
That I have hated al my lyve
These janglers, whiche of here Envie
Ben evere redi forto lie;
For with here fals compassement
Fuloften thei have mad me schent
And hindred me fulofte time,
Whan thei no cause wisten bime,
Bot onliche of here oghne thoght:
And thus fuloften have I boght
The lie, and drank noght of the wyn.
I wolde here happ were such as myn:
For how so that I be now schrive,
To hem ne mai I noght foryive,
Til that I se hem at debat
With love, and thanne myn astat
Thei mihten be here oghne deme,
And loke how wel it scholde hem qweme
To hindre a man that loveth sore.
And thus I hate hem everemore,
Til love on hem wol don his wreche:
For that schal I alway beseche
Unto the mihti Cupido,
That he so mochel wolde do,
So as he is of love a godd,
To smyte hem with the same rodd
With which I am of love smite;
So that thei mihten knowe and wite
How hindringe is a wofull peine
To him that love wolde atteigne.
Thus evere on hem I wayte and hope,
Til I mai sen hem lepe a lope,
And halten on the same Sor
Which I do now: for overmor
I wolde thanne do my myht
So forto stonden in here lyht,
That thei ne scholden finde a weie
To that thei wolde, bot aweie
I wolde hem putte out of the stede
Fro love, riht as thei me dede
With that thei speke of me be mowthe.
So wolde I do, if that I cowthe,
Of hem, and this, so god me save,
Is al the hate that I have,
Toward these janglers everydiel;
I wolde alle othre ferde wel.
Thus have I, fader, said mi wille;
Say ye now forth, for I am stille.
Mi Sone, of that thou hast me said
I holde me noght fulli paid:
That thou wolt haten eny man,
To that acorden I ne can,
Thogh he have hindred thee tofore.
Bot this I telle thee therfore,
Thou miht upon my beneicoun
Wel haten the condicioun
Of tho janglers, as thou me toldest,
Bot furthermor, of that thou woldest
Hem hindre in eny other wise,
Such Hate is evere to despise.
Forthi, mi Sone, I wol thee rede,
That thou drawe in be frendlihede
That thou ne miht noght do be hate;
So miht thou gete love algate
And sette thee, my Sone, in reste,
For thou schalt finde it for the beste.
And over this, so as I dar,
I rede that thou be riht war
Of othre mennes hate aboute,
Which every wysman scholde doute:
For Hate is evere upon await,
And as the fisshere on his bait
Sleth, whan he seth the fisshes faste,
So, whan he seth time ate laste,
That he mai worche an other wo,
Schal noman tornen him therfro,
That Hate nyle his felonie
Fulfille and feigne compaignie
Yit natheles, for fals Semblant
Is toward him of covenant
Withholde, so that under bothe
The prive wraththe can him clothe,
That he schal seme of gret believe.
Bot war thee wel that thou ne lieve
Al that thou sest tofore thin yhe,
So as the Gregois whilom syhe:
The bok of Troie who so rede,
Ther mai he finde ensample in dede.
Sone after the destruccioun,
Whan Troie was al bete doun
And slain was Priamus the king,
The Gregois, whiche of al this thing
Ben cause, tornen hom ayein.
Ther mai noman his happ withsein;
It hath be sen and felt fulofte,
The harde time after the softe:
Be See as thei forth homward wente,
A rage of gret tempeste hem hente;
Juno let bende hire parti bowe,
The Sky wax derk, the wynd gan blowe,
The firy welkne gan to thondre,
As thogh the world scholde al to sondre;
Fro hevene out of the watergates
The reyni Storm fell doun algates
And al here takel made unwelde,
That noman mihte himself bewelde.
Ther mai men hiere Schipmen crie,
That stode in aunter forto die:
He that behinde sat to stiere
Mai noght the forestempne hiere;
The Schip aros ayein the wawes,
The lodesman hath lost his lawes,
The See bet in on every side:
Thei nysten what fortune abide,
Bot sette hem al in goddes wille,
Wher he hem wolde save or spille.
And it fell thilke time thus:
Ther was a king, the which Namplus
Was hote, and he a Sone hadde,
At Troie which the Gregois ladde,
As he that was mad Prince of alle,
Til that fortune let him falle:
His name was Palamades.
Bot thurgh an hate natheles
Of some of hem his deth was cast
And he be tresoun overcast.
His fader, whan he herde it telle,
He swor, if evere his time felle,
He wolde him venge, if that he mihte,
And therto his avou behihte:
And thus this king thurgh prive hate
Abod upon await algate,
For he was noght of such emprise
To vengen him in open wise.
The fame, which goth wyde where,
Makth knowe how that the Gregois were
Homward with al the felaschipe
Fro Troie upon the See be Schipe.
Namplus, whan he this understod,
And knew the tydes of the flod,
And sih the wynd blew to the lond,
A gret deceipte anon he fond
Of prive hate, as thou schalt hiere,
Wherof I telle al this matiere.
This king the weder gan beholde,
And wiste wel thei moten holde
Here cours endlong his marche riht,
And made upon the derke nyht
Of grete Schydes and of blockes
Gret fyr ayein the grete rockes,
To schewe upon the helles hihe,
So that the Flete of Grece it sihe.
And so it fell riht as he thoghte:
This Flete, which an havene soghte,
The bryghte fyres sih a ferr,
And thei hem drowen nerr and nerr,
And wende wel and understode
How al that fyr was made for goode,
To schewe wher men scholde aryve,
And thiderward thei hasten blyve.
In Semblant, as men sein, is guile,
And that was proved thilke while;
The Schip, which wende his helpe acroche,
Drof al to pieces on the roche,
And so ther deden ten or twelve;
Ther mihte noman helpe himselve,
For ther thei wenden deth ascape,
Withouten help here deth was schape.
Thus thei that comen ferst tofore
Upon the Rockes be forlore,
Bot thurgh the noise and thurgh the cri
These othre were al war therby;
And whan the dai began to rowe,
Tho mihten thei the sothe knowe,
That wher they wenden frendes finde,
Thei founden frenschipe al behinde.
The lond was thanne sone weyved,
Wher that thei hadden be deceived,
And toke hem to the hihe See;
Therto thei seiden alle yee,
Fro that dai forth and war thei were
Of that thei hadde assaied there.
Mi Sone, hierof thou miht avise
How fraude stant in many wise
Amonges hem that guile thenke;
Ther is no Scrivein with his enke
Which half the fraude wryte can
That stant in such a maner man:
Forthi the wise men ne demen
The thinges after that thei semen,
Bot after that thei knowe and finde.
The Mirour scheweth in his kinde
As he hadde al the world withinne,
And is in soth nothing therinne;
And so farth Hate for a throwe:
Til he a man hath overthrowe,
Schal noman knowe be his chere
Which is avant, ne which arere.
Forthi, mi Sone, thenke on this.
Mi fader, so I wole ywiss;
And if ther more of Wraththe be,
Now axeth forth per charite,
As ye be youre bokes knowe,
And I the sothe schal beknowe.
Mi Sone, thou schalt understonde
That yit towardes Wraththe stonde
Of dedly vices othre tuo:
And forto telle here names so,
It is Contek and Homicide,
That ben to drede on every side.
Contek, so as the bokes sein,
Folhast hath to his Chamberlein,
Be whos conseil al unavised
Is Pacience most despised,
Til Homicide with hem meete.
Fro merci thei ben al unmeete,
And thus ben thei the worste of alle
Of hem whiche unto wraththe falle,
In dede bothe and ek in thoght:
For thei acompte here wraththe at noght,
Bot if ther be schedinge of blod;
And thus lich to a beste wod
Thei knowe noght the god of lif.
Be so thei have or swerd or knif
Here dedly wraththe forto wreke,
Of Pite list hem noght to speke;
Non other reson thei ne fonge,
Bot that thei ben of mihtes stronge.
Bot war hem wel in other place,
Where every man behoveth grace,
Bot ther I trowe it schal hem faile,
To whom no merci mihte availe,
Bot wroghten upon tiraundie,
That no pite ne mihte hem plie.
Now tell, my Sone. Fader, what?
If thou hast be coupable of that.
Mi fader, nay, Crist me forbiede:
I speke onliche as of the dede,
Of which I nevere was coupable
Withoute cause resonable.
Bot this is noght to mi matiere
Of schrifte, why we sitten hiere;
For we ben sett to schryve of love,
As we begunne ferst above:
And natheles I am beknowe
That as touchende of loves throwe,
Whan I my wittes overwende,
Min hertes contek hath non ende,
Bot evere it stant upon debat
To gret desese of myn astat
As for the time that it lasteth.
For whan mi fortune overcasteth
Hire whiel and is to me so strange,
And that I se sche wol noght change,
Than caste I al the world aboute,
And thenke hou I at home and oute
Have al my time in vein despended,
And se noght how to ben amended,
Bot rathere forto be empeired,
As he that is welnyh despeired:
For I ne mai no thonk deserve,
And evere I love and evere I serve,
And evere I am aliche nerr.
Thus, for I stonde in such a wer,
I am, as who seith, out of herre;
And thus upon miself the werre
I bringe, and putte out alle pes,
That I fulofte in such a res
Am wery of myn oghne lif.
So that of Contek and of strif
I am beknowe and have ansuerd,
As ye, my fader, now have herd.
Min herte is wonderly begon
With conseil, wherof witt is on,
Which hath resoun in compaignie;
Ayein the whiche stant partie
Will, which hath hope of his acord,
And thus thei bringen up descord.
Witt and resoun conseilen ofte
That I myn herte scholde softe,
And that I scholde will remue
And put him out of retenue,
Or elles holde him under fote:
For as thei sein, if that he mote
His oghne rewle have upon honde,
Ther schal no witt ben understonde.
Of hope also thei tellen this,
That overal, wher that he is,
He set the herte in jeupartie
With wihssinge and with fantasie,
And is noght trewe of that he seith,
So that in him ther is no feith:
Thus with reson and wit avised
Is will and hope aldai despised.
Reson seith that I scholde leve
To love, wher ther is no leve
To spede, and will seith therayein
That such an herte is to vilein,
Which dar noght love and til he spede,
Let hope serve at such a nede:
He seith ek, where an herte sit
Al hol governed upon wit,
He hath this lyves lust forlore.
And thus myn herte is al totore
Of such a Contek as thei make:
Bot yit I mai noght will forsake,
That he nys Maister of my thoght,
Or that I spede, or spede noght.
Thou dost, my Sone, ayein the riht;
Bot love is of so gret a miht,
His lawe mai noman refuse,
So miht thou thee the betre excuse.
And natheles thou schalt be lerned
That will scholde evere be governed
Of reson more than of kinde,
Wherof a tale write I finde.
A Philosophre of which men tolde
Ther was whilom be daies olde,
And Diogenes thanne he hihte.
So old he was that he ne mihte
The world travaile, and for the beste
He schop him forto take his reste,
And duelte at hom in such a wise,
That nyh his hous he let devise
Endlong upon an Axeltre
To sette a tonne in such degre,
That he it mihte torne aboute;
Wherof on hed was taken oute,
For he therinne sitte scholde
And torne himself so as he wolde,
To take their and se the hevene
And deme of the planetes sevene,
As he which cowthe mochel what.
And thus fulofte there he sat
To muse in his philosophie
Solein withoute compaignie:
So that upon a morwetyde,
As thing which scholde so betyde,
Whan he was set ther as him liste
To loke upon the Sonne ariste,
Wherof the propretes he sih,
It fell ther cam ridende nyh
King Alisandre with a route;
And as he caste his yhe aboute,
He sih this Tonne, and what it mente
He wolde wite, and thider sente
A knyht, be whom he mihte it knowe,
And he himself that ilke throwe
Abod, and hoveth there stille.
This kniht after the kinges wille
With spore made his hors to gon
And to the tonne he cam anon,
Wher that he fond a man of Age,
And he him tolde the message,
Such as the king him hadde bede,
And axeth why in thilke stede
The Tonne stod, and what it was.
And he, which understod the cas,
Sat stille and spak no word ayein.
The kniht bad speke and seith, 'Vilein,
Thou schalt me telle, er that I go;
It is thi king which axeth so.'
'Mi king,' quod he, 'that were unriht.'
'What is he thanne?' seith the kniht,
'Is he thi man?' 'That seie I noght,'
Quod he, 'bot this I am bethoght,
Mi mannes man hou that he is.'
'Thou lyest, false cherl, ywiss,'
The kniht him seith, and was riht wroth,
And to the king ayein he goth
And tolde him how this man ansuerde.
The king, whan he this tale herde,
Bad that thei scholden alle abyde,
For he himself wol thider ryde.
And whan he cam tofore the tonne,
He hath his tale thus begonne:
'Alheil,' he seith, 'what man art thou?'
Quod he, 'Such on as thou sest now.'
The king, which hadde wordes wise,
His age wolde noght despise,
Bot seith, 'Mi fader, I thee preie
That thou me wolt the cause seie,
How that I am thi mannes man.'
'Sire king,' quod he, 'and that I can,
If that thou wolt.' 'Yis,' seith the king.
Quod he, 'This is the sothe thing:
Sith I ferst resoun understod,
And knew what thing was evel and good,
The will which of my bodi moeveth,
Whos werkes that the god reproeveth,
I have restreigned everemore,
As him which stant under the lore
Of reson, whos soubgit he is,
So that he mai noght don amis:
And thus be weie of covenant
Will is my man and my servant,
And evere hath ben and evere schal.
And thi will is thi principal,
And hath the lordschipe of thi witt,
So that thou cowthest nevere yit
Take o dai reste of thi labour;
Bot forto ben a conquerour
Of worldes good, which mai noght laste,
Thou hiest evere aliche faste,
Wher thou no reson hast to winne:
And thus thi will is cause of Sinne,
And is thi lord, to whom thou servest,
Wherof thou litel thonk deservest.'
The king of that he thus answerde
Was nothing wroth, bot whanne he herde
The hihe wisdom which he seide,
With goodly wordes this he preide,
That he him wolde telle his name.
'I am,' quod he, 'that ilke same,
The which men Diogenes calle.'
Tho was the king riht glad withalle,
For he hadde often herd tofore
What man he was, so that therfore
He seide, 'O wise Diogene,
Now schal thi grete witt be sene;
For thou schalt of my yifte have
What worldes thing that thou wolt crave.'
Quod he, 'Thanne hove out of mi Sonne,
And let it schyne into mi Tonne;
For thou benymst me thilke yifte,
Which lith noght in thi miht to schifte:
Non other good of thee me nedeth.'
This king, whom every contre dredeth,
Lo, thus he was enformed there:
Wherof, my Sone, thou miht lere
How that thi will schal noght be lieved,
Where it is noght of wit relieved.
And thou hast seid thiself er this
How that thi will thi maister is;
Thurgh which thin hertes thoght withinne
Is evere of Contek to beginne,
So that it is gretli to drede
That it non homicide brede.
For love is of a wonder kinde,
And hath hise wittes ofte blinde,
That thei fro mannes reson falle;
Bot whan that it is so befalle
That will schal the corage lede,
In loves cause it is to drede:
Wherof I finde ensample write,
Which is behovely forto wite.
I rede a tale, and telleth this:
The Cite which Semiramis
Enclosed hath with wall aboute,
Of worthi folk with many a route
Was enhabited here and there;
Among the whiche tuo ther were
Above alle othre noble and grete,
Dwellende tho withinne a Strete
So nyh togedre, as it was sene,
That ther was nothing hem betwene,
Bot wow to wow and wall to wall.
This o lord hadde in special
A Sone, a lusti Bacheler,
In al the toun was non his pier:
That other hadde a dowhter eke,
In al the lond that forto seke
Men wisten non so faire as sche.
And fell so, as it scholde be,
This faire dowhter nyh this Sone
As thei togedre thanne wone,
Cupide hath so the thinges schape,
That thei ne mihte his hand ascape,
That he his fyr on hem ne caste:
Wherof her herte he overcaste
To folwe thilke lore and suie
Which nevere man yit miht eschuie;
And that was love, as it is happed,
Which hath here hertes so betrapped,
That thei be alle weies seche
How that thei mihten winne a speche,
Here wofull peine forto lisse.
Who loveth wel, it mai noght misse,
And namely whan ther be tuo
Of on acord, how so it go,
Bot if that thei som weie finde;
For love is evere of such a kinde
And hath his folk so wel affaited,
That howso that it be awaited,
Ther mai noman the pourpos lette:
And thus betwen hem tuo thei sette
And hole upon a wall to make,
Thurgh which thei have her conseil take
At alle times, whan thei myhte.
This faire Maiden Tisbee hihte,
And he whom that sche loveth hote
Was Piramus be name hote.
So longe here lecoun thei recorden,
Til ate laste thei acorden
Be nihtes time forto wende
Al one out fro the tounes ende,
Wher was a welle under a Tree;
And who cam ferst, or sche or he,
He scholde stille there abide.
So it befell the nyhtes tide
This maiden, which desguised was,
Al prively the softe pas
Goth thurgh the large toun unknowe,
Til that sche cam withinne a throwe
Wher that sche liketh forto duelle,
At thilke unhappi freisshe welle,
Which was also the Forest nyh.
Wher sche comende a Leoun syh
Into the feld to take his preie,
In haste and sche tho fledde aweie,
So as fortune scholde falle,
For feere and let hire wympel falle
Nyh to the welle upon therbage.
This Leoun in his wilde rage
A beste, which that he fond oute,
Hath slain, and with his blodi snoute,
Whan he hath eten what he wolde,
To drynke of thilke stremes colde
Cam to the welle, where he fond
The wympel, which out of hire hond
Was falle, and he it hath todrawe,
Bebled aboute and al forgnawe;
And thanne he strawhte him forto drinke
Upon the freisshe welles brinke,
And after that out of the plein
He torneth to the wode ayein.
And Tisbee dorste noght remue,
Bot as a bridd which were in Mue
Withinne a buissh sche kepte hire clos
So stille that sche noght aros;
Unto hirself and pleigneth ay.
And fell, whil that sche there lay,
This Piramus cam after sone
Unto the welle, and be the Mone
He fond hire wimpel blodi there.
Cam nevere yit to mannes Ere
Tidinge, ne to mannes sihte
Merveile, which so sore aflihte
A mannes herte, as it tho dede
To him, which in the same stede
With many a wofull compleignynge
Began his handes forto wringe,
As he which demeth sikerly
That sche be ded: and sodeinly
His swerd al nakid out he breide
In his folhaste, and thus he seide:
'I am cause of this felonie,
So it is resoun that I die,
As sche is ded be cause of me.'
And with that word upon his kne
He fell, and to the goddes alle
Up to the hevene he gan to calle,
And preide, sithen it was so
That he may noght his love as tho
Have in this world, that of her grace
He miht hire have in other place,
For hiere wolde he noght abide,
He seith: bot as it schal betide,
The Pomel of his swerd to grounde
He sette, and thurgh his herte a wounde
He made up to the bare hilte:
And in this wise himself he spilte
With his folhaste and deth he nam;
For sche withinne a while cam,
Wher he lai ded upon his knif.
So wofull yit was nevere lif
As Tisbee was, whan sche him sih:
Sche mihte noght o word on hih
Speke oute, for hire herte schette,
That of hir lif no pris sche sette,
Bot ded swounende doun sche fell.
Til after, whanne it so befell
That sche out of hire traunce awok,
With many a wofull pitous lok
Hire yhe alwei among sche caste
Upon hir love, and ate laste
Sche cawhte breth and seide thus:
'O thou which cleped art Venus,
Goddesse of love, and thou, Cupide,
Which loves cause hast forto guide,
I wot now wel that ye be blinde,
Of thilke unhapp which I now finde
Only betwen my love and me.
This Piramus, which hiere I se
Bledende, what hath he deserved?
For he youre heste hath kept and served,
And was yong and I bothe also:
Helas, why do ye with ous so?
Ye sette oure herte bothe afyre,
And maden ous such thing desire
Wherof that we no skile cowthe;
Bot thus oure freisshe lusti yowthe
Withoute joie is al despended,
Which thing mai nevere ben amended:
For as of me this wol I seie,
That me is levere forto deie
Than live after this sorghful day.'
And with this word, where as he lay,
Hire love in armes sche embraseth,
Hire oghne deth and so pourchaseth
That now sche wepte and nou sche kiste,
Til ate laste, er sche it wiste,
So gret a sorwe is to hire falle,
Which overgoth hire wittes alle.
As sche which mihte it noght asterte,
The swerdes point ayein hire herte
Sche sette, and fell doun therupon,
Wherof that sche was ded anon:
And thus bothe on o swerd bledende
Thei weren founde ded liggende.
Now thou, mi Sone, hast herd this tale,
Bewar that of thin oghne bale
Thou be noght cause in thi folhaste,
And kep that thou thi witt ne waste
Upon thi thoght in aventure,
Wherof thi lyves forfeture
Mai falle: and if thou have so thoght
Er this, tell on and hyde it noght.
Mi fader, upon loves side
Mi conscience I woll noght hyde,
How that for love of pure wo
I have ben ofte moeved so,
That with my wisshes if I myhte,
A thousand times, I yow plyhte,
I hadde storven in a day;
And therof I me schryve may,
Though love fully me ne slowh,
Mi will to deie was ynowh,
So am I of my will coupable:
And yit is sche noght merciable,
Which mai me yive lif and hele.
Bot that hir list noght with me dele,
I wot be whos conseil it is,
And him wolde I long time er this,
And yit I wolde and evere schal,
Slen and destruie in special.
The gold of nyne kinges londes
Ne scholde him save fro myn hondes,
In my pouer if that he were;
Bot yit him stant of me no fere
For noght that evere I can manace.
He is the hindrere of mi grace,
Til he be ded I mai noght spede;
So mot I nedes taken hiede
And schape how that he were aweie,
If I therto mai finde a weie.
Mi Sone, tell me now forthi,
Which is that mortiel enemy
That thou manacest to be ded.
Mi fader, it is such a qwed,
That wher I come, he is tofore,
And doth so, that mi cause is lore.
What is his name? It is Daunger,
Which is mi ladi consailer:
For I was nevere yit so slyh,
To come in eny place nyh
Wher as sche was be nyht or day,
That Danger ne was redy ay,
With whom for speche ne for mede
Yit mihte I nevere of love spede;
For evere this I finde soth,
Al that my ladi seith or doth
To me, Daunger schal make an ende,
And that makth al mi world miswende:
And evere I axe his help, bot he
Mai wel be cleped sanz pite;
For ay the more I to him bowe,
The lasse he wol my tale alowe.
He hath mi ladi so englued,
Sche wol noght that he be remued;
For evere he hangeth on hire Seil,
And is so prive of conseil,
That evere whanne I have oght bede,
I finde Danger in hire stede
And myn ansuere of him I have;
Bot for no merci that I crave,
Of merci nevere a point I hadde.
I finde his ansuere ay so badde,
That werse mihte it nevere be:
And thus betwen Danger and me
Is evere werre til he dye.
Bot mihte I ben of such maistrie,
That I Danger hadde overcome,
With that were al my joie come.
Thus wolde I wonde for no Sinne,
Ne yit for al this world to winne;
If that I mihte finde a sleyhte,
To leie al myn astat in weyhte,
I wolde him fro the Court dissevere,
So that he come ayeinward nevere.
Therfore I wisshe and wolde fain
That he were in som wise slain;
For while he stant in thilke place,
Ne gete I noght my ladi grace.
Thus hate I dedly thilke vice,
And wolde he stode in non office
In place wher mi ladi is;
For if he do, I wot wel this,
That owther schal he deie or I
Withinne a while; and noght forthi
On my ladi fulofte I muse,
How that sche mai hirself excuse,
If that I deie in such a plit.
Me thenkth sche mihte noght be qwyt
That sche ne were an homicide:
And if it scholde so betide,
As god forbiede it scholde be,
Be double weie it is pite.
For I, which al my will and witt
Have yove and served evere yit,
And thanne I scholde in such a wise
In rewardinge of my servise
Be ded, me thenkth it were a rowthe:
And furthermor, to telle trowthe,
Sche, that hath evere be wel named,
Were worthi thanne to be blamed
And of reson to ben appeled,
Whan with o word sche mihte have heled
A man, and soffreth him so deie.
Ha, who sawh evere such a weie?
Ha, who sawh evere such destresse?
Withoute pite gentilesse,
Withoute mercy wommanhede,
That wol so quyte a man his mede,
Which evere hath be to love trewe.
Mi goode fader, if ye rewe
Upon mi tale, tell me now,
And I wol stinte and herkne yow.
Mi Sone, attempre thi corage
Fro Wraththe, and let thin herte assuage:
For who so wole him underfonge,
He mai his grace abide longe,
Er he of love be received;
And ek also, bot it be weyved,
Ther mihte mochel thing befalle,
That scholde make a man to falle
Fro love, that nevere afterward
Ne durste he loke thiderward.
In harde weies men gon softe,
And er thei clymbe avise hem ofte:
Men sen alday that rape reweth;
And who so wicked Ale breweth,
Fulofte he mot the werse drinke:
Betre is to flete than to sincke;
Betre is upon the bridel chiewe
Thanne if he felle and overthrewe,
The hors and stikede in the Myr:
To caste water in the fyr
Betre is than brenne up al the hous:
The man which is malicious
And folhastif, fulofte he falleth,
And selden is whan love him calleth.
Forthi betre is to soffre a throwe
Than be to wilde and overthrowe;
Suffrance hath evere be the beste
To wissen him that secheth reste:
And thus, if thou wolt love and spede,
Mi Sone, soffre, as I the rede.
What mai the Mous ayein the Cat?
And for this cause I axe that,
Who mai to love make a werre,
That he ne hath himself the werre?
Love axeth pes and evere schal,
And who that fihteth most withal
Schal lest conquere of his emprise:
For this thei tellen that ben wise,
Wicke is to stryve and have the werse;
To hasten is noght worth a kerse;
Thing that a man mai noght achieve,
That mai noght wel be don at Eve,
It mot abide til the morwe.
Ne haste noght thin oghne sorwe,
Mi Sone, and tak this in thi witt,
He hath noght lost that wel abitt.
Ensample that it falleth thus,
Thou miht wel take of Piramus,
Whan he in haste his swerd outdrowh
And on the point himselve slowh
For love of Tisbee pitously,
For he hire wympel fond blody
And wende a beste hire hadde slain;
Wher as him oghte have be riht fain,
For sche was there al sauf beside:
Bot for he wolde noght abide,
This meschief fell. Forthi be war,
Mi Sone, as I the warne dar,
Do thou nothing in such a res,
For suffrance is the welle of Pes.
Thogh thou to loves Court poursuie,
Yit sit it wel that thou eschuie
That thou the Court noght overhaste,
For so miht thou thi time waste;
Bot if thin happ therto be schape,
It mai noght helpe forto rape.
Therfore attempre thi corage;
Folhaste doth non avantage,
Bot ofte it set a man behinde
In cause of love, and that I finde
Be olde ensample, as thou schalt hiere,
Touchende of love in this matiere.
A Maiden whilom ther was on,
Which Daphne hihte, and such was non
Of beaute thanne, as it was seid.
Phebus his love hath on hire leid,
And therupon to hire he soghte
In his folhaste, and so besoghte,
That sche with him no reste hadde;
For evere upon hire love he gradde,
And sche seide evere unto him nay.
So it befell upon a dai,
Cupide, which hath every chance
Of love under his governance,
Syh Phebus hasten him so sore:
And for he scholde him haste more,
And yit noght speden ate laste,
A dart thurghout his herte he caste,
Which was of gold and al afyre,
That made him manyfold desire
Of love more thanne he dede.
To Daphne ek in the same stede
A dart of Led he caste and smot,
Which was al cold and nothing hot.
And thus Phebus in love brenneth,
And in his haste aboute renneth,
To loke if that he mihte winne;
Bot he was evere to beginne,
For evere awei fro him sche fledde,
So that he nevere his love spedde.
And forto make him full believe
That no Folhaste mihte achieve
To gete love in such degree,
This Daphne into a lorer tre
Was torned, which is evere grene,
In tokne, as yit it mai be sene,
That sche schal duelle a maiden stille,
And Phebus failen of his wille.
Be suche ensamples, as thei stonde,
Mi Sone, thou miht understonde,
To hasten love is thing in vein,
Whan that fortune is therayein.
To take where a man hath leve
Good is, and elles he mot leve;
For whan a mannes happes failen,
Ther is non haste mai availen.
Mi fader, grant merci of this:
Bot while I se mi ladi is
No tre, but halt hire oghne forme,
Ther mai me noman so enforme,
To whether part fortune wende,
That I unto mi lyves ende
Ne wol hire serven everemo.
Mi Sone, sithen it is so,
I seie nomor; bot in this cas
Bewar how it with Phebus was.
Noght only upon loves chance,
Bot upon every governance
Which falleth unto mannes dede,
Folhaste is evere forto drede,
And that a man good consail take,
Er he his pourpos undertake,
For consail put Folhaste aweie.
Now goode fader, I you preie,
That forto wisse me the more,
Som good ensample upon this lore
Ye wolden telle of that is write,
That I the betre mihte wite
How I Folhaste scholde eschuie,
And the wisdom of conseil suie.
Mi Sone, that thou miht enforme
Thi pacience upon the forme
Of old essamples, as thei felle,
Now understond what I schal telle.
Whan noble Troie was belein
And overcome, and hom ayein
The Gregois torned fro the siege,
The kinges founde here oghne liege
In manye places, as men seide,
That hem forsoke and desobeide.
Among the whiche fell this cas
To Demephon and Athemas,
That weren kinges bothe tuo,
And bothe weren served so:
Here lieges wolde hem noght receive,
So that thei mote algates weyve
To seche lond in other place,
For there founde thei no grace.
Wherof they token hem to rede,
And soghten frendes ate nede,
And ech of hem asseureth other
To helpe as to his oghne brother,
To vengen hem of thilke oultrage
And winne ayein here heritage.
And thus thei ryde aboute faste
To gete hem help, and ate laste
Thei hadden pouer sufficant,
And maden thanne a covenant,
That thei ne scholden no lif save,
Ne prest, ne clerc, ne lord, ne knave,
Ne wif, ne child, of that thei finde,
Which berth visage of mannes kinde,
So that no lif schal be socoured,
Bot with the dedly swerd devoured:
In such Folhaste here ordinance
Thei schapen forto do vengance.
Whan this pourpos was wist and knowe
Among here host, tho was ther blowe
Of wordes many a speche aboute:
Of yonge men the lusti route
Were of this tale glad ynowh,
Ther was no care for the plowh;
As thei that weren Folhastif,
Thei ben acorded to the strif,
And sein it mai noght be to gret
To vengen hem of such forfet:
Thus seith the wilde unwise tonge
Of hem that there weren yonge.
Bot Nestor, which was old and hor,
The salve sih tofore the sor,
As he that was of conseil wys:
So that anon be his avis
Ther was a prive conseil nome.
The lordes ben togedre come;
This Demephon and Athemas
Here pourpos tolden, as it was;
Thei sieten alle stille and herde,
Was non bot Nestor hem ansuerde.
He bad hem, if thei wolde winne,
They scholden se, er thei beginne,
Here ende, and sette here ferste entente,
That thei hem after ne repente:
And axeth hem this questioun,
To what final conclusioun
Thei wolde regne Kinges there,
If that no poeple in londe were;
And seith, it were a wonder wierde
To sen a king become an hierde,
Wher no lif is bot only beste
Under the liegance of his heste;
For who that is of man no king,
The remenant is as no thing.
He seith ek, if the pourpos holde
To sle the poeple, as thei tuo wolde,
Whan thei it mihte noght restore,
Al Grece it scholde abegge sore,
To se the wilde beste wone
Wher whilom duelte a mannes Sone:
And for that cause he bad hem trete,
And stinte of the manaces grete.
Betre is to winne be fair speche,
He seith, than such vengance seche;
For whanne a man is most above,
Him nedeth most to gete him love.
Whan Nestor hath his tale seid,
Ayein him was no word withseid;
It thoghte hem alle he seide wel:
And thus fortune hire dedly whiel
Fro werre torneth into pes.
Bot forth thei wenten natheles;
And whan the Contres herde sein
How that here kinges be besein
Of such a pouer as thei ladde,
Was non so bold that hem ne dradde,
And forto seche pes and grith
Thei sende and preide anon forthwith,
So that the kinges ben appesed,
And every mannes herte is esed;
Al was foryete and noght recorded.
And thus thei ben togedre acorded;
The kinges were ayein received,
And pes was take and wraththe weived,
And al thurgh conseil which was good
Of him that reson understod.
Be this ensample, Sone, attempre
Thin herte and let no will distempre
Thi wit, and do nothing be myht
Which mai be do be love and riht.
Folhaste is cause of mochel wo;
Forthi, mi Sone, do noght so.
And as touchende of Homicide
Which toucheth unto loves side,
Fulofte it falleth unavised
Thurgh will, which is noght wel assised,
Whan wit and reson ben aweie
And that Folhaste is in the weie,
Wherof hath falle gret vengance.
Forthi tak into remembrance
To love in such a maner wise
That thou deserve no juise:
For wel I wot, thou miht noght lette,
That thou ne schalt thin herte sette
To love, wher thou wolt or non;
Bot if thi wit be overgon,
So that it torne into malice,
Ther wot noman of thilke vice,
What peril that ther mai befalle:
Wherof a tale amonges alle,
Which is gret pite forto hiere,
I thenke forto tellen hiere,
That thou such moerdre miht withstonde,
Whan thou the tale hast understonde.
Of Troie at thilke noble toun,
Whos fame stant yit of renoun
And evere schal to mannes Ere,
The Siege laste longe there,
Er that the Greks it mihten winne,
Whil Priamus was king therinne;
Bot of the Greks that lyhe aboute
Agamenon ladde al the route.
This thing is knowen overal,
Bot yit I thenke in special
To my matiere therupon
Telle in what wise Agamenon,
Thurgh chance which mai noght be weived,
Of love untrewe was deceived.
An old sawe is, 'Who that is slyh
In place where he mai be nyh,
He makth the ferre Lieve loth':
Of love and thus fulofte it goth.
Ther while Agamenon batailleth
To winne Troie, and it assailleth,
Fro home and was long time ferr,
Egistus drowh his qweene nerr,
And with the leiser which he hadde
This ladi at his wille he ladde:
Climestre was hire rihte name,
Sche was therof gretli to blame,
To love there it mai noght laste.
Bot fell to meschief ate laste;
For whan this noble worthi kniht
Fro Troie cam, the ferste nyht
That he at home abedde lay,
Egistus, longe er it was day,
As this Climestre him hadde asent,
And weren bothe of on assent,
Be treson slowh him in his bedd.
Bot moerdre, which mai noght ben hedd,
Sprong out to every mannes Ere,
Wherof the lond was full of fere.
Agamenon hath be this qweene
A Sone, and that was after sene;
Bot yit as thanne he was of yowthe,
A babe, which no reson cowthe,
And as godd wolde, it fell him thus.
A worthi kniht Taltabius
This yonge child hath in kepinge,
And whan he herde of this tidinge,
Of this treson, of this misdede,
He gan withinne himself to drede,
In aunter if this false Egiste
Upon him come, er he it wiste,
To take and moerdre of his malice
This child, which he hath to norrice:
And for that cause in alle haste
Out of the lond he gan him haste
And to the king of Crete he strawhte
And him this yonge lord betawhte,
And preide him for his fader sake
That he this child wolde undertake
And kepe him til he be of Age,
So as he was of his lignage;
And tolde him over al the cas,
How that his fadre moerdred was,
And hou Egistus, as men seide,
Was king, to whom the lond obeide.
And whanne Ydomeneux the king
Hath understondinge of this thing,
Which that this kniht him hadde told,
He made sorwe manyfold,
And tok this child into his warde,
And seide he wolde him kepe and warde,
Til that he were of such a myht
To handle a swerd and ben a knyht,
To venge him at his oghne wille.
And thus Horestes duelleth stille,
Such was the childes rihte name,
Which after wroghte mochel schame
In vengance of his fader deth.
The time of yeres overgeth,
That he was man of brede and lengthe,
Of wit, of manhod and of strengthe,
A fair persone amonges alle.
And he began to clepe and calle,
As he which come was to manne,
Unto the King of Crete thanne,
Preiende that he wolde him make
A kniht and pouer with him take,
For lengere wolde he noght beleve,
He seith, bot preith the king of leve
To gon and cleyme his heritage
And vengen him of thilke oultrage
Which was unto his fader do.
The king assenteth wel therto,
With gret honour and knyht him makth,
And gret pouer to him betakth,
And gan his journe forto caste:
So that Horestes ate laste
His leve tok and forth he goth.
As he that was in herte wroth,
His ferste pleinte to bemene,
Unto the Cite of Athene
He goth him forth and was received,
So there was he noght deceived.
The Duc and tho that weren wise
Thei profren hem to his servise;
And he hem thonketh of here profre
And seith himself he wol gon offre
Unto the goddes for his sped,
As alle men him yeven red.
So goth he to the temple forth:
Of yiftes that be mochel worth
His sacrifice and his offringe
He made; and after his axinge
He was ansuerd, if that he wolde
His stat recovere, thanne he scholde
Upon his Moder do vengance
So cruel, that the remembrance
Therof mihte everemore abide,
As sche that was an homicide
And of hire oghne lord Moerdrice.
Horestes, which of thilke office
Was nothing glad, as thanne he preide
Unto the goddes there and seide
That thei the juggement devise,
How sche schal take the juise.
And therupon he hadde ansuere,
That he hire Pappes scholde of tere
Out of hire brest his oghne hondes,
And for ensample of alle londes
With hors sche scholde be todrawe,
Til houndes hadde hire bones gnawe
Withouten eny sepulture:
This was a wofull aventure.
And whan Horestes hath al herd,
How that the goddes have ansuerd,
Forth with the strengthe which he ladde
The Duc and his pouer he hadde,
And to a Cite forth thei gon,
The which was cleped Cropheon,
Where as Phoieus was lord and Sire,
Which profreth him withouten hyre
His help and al that he mai do,
As he that was riht glad therto,
To grieve his mortiel enemy:
And tolde hem certein cause why,
How that Egiste in Mariage
His dowhter whilom of full Age
Forlai, and afterward forsok,
Whan he Horestes Moder tok.
Men sein, 'Old Senne newe schame':
Thus more and more aros the blame
Ayein Egiste on every side.
Horestes with his host to ride
Began, and Phoieus with hem wente;
I trowe Egiste him schal repente.
Thei riden forth unto Micene,
Wher lay Climestre thilke qweene,
The which Horestes moder is:
And whan sche herde telle of this,
The gates weren faste schet,
And thei were of here entre let.
Anon this Cite was withoute
Belein and sieged al aboute,
And evere among thei it assaile,
Fro day to nyht and so travaile,
Til ate laste thei it wonne;
Tho was ther sorwe ynowh begonne.
Horestes dede his moder calle
Anon tofore the lordes alle
And ek tofor the poeple also,
To hire and tolde his tale tho,
And seide, 'O cruel beste unkinde,
How mihtest thou thin herte finde,
For eny lust of loves drawhte,
That thou acordest to the slawhte
Of him which was thin oghne lord?
Thi treson stant of such record,
Thou miht thi werkes noght forsake;
So mot I for mi fader sake
Vengance upon thi bodi do,
As I comanded am therto.
Unkindely for thou hast wroght,
Unkindeliche it schal be boght,
The Sone schal the Moder sle,
For that whilom thou seidest yee
To that thou scholdest nay have seid.'
And he with that his hond hath leid
Upon his Moder brest anon,
And rente out fro the bare bon
Hire Pappes bothe and caste aweie
Amiddes in the carte weie,
And after tok the dede cors
And let it drawe awey with hors
Unto the hound and to the raven;
Sche was non other wise graven.
Egistus, which was elles where,
Tidinges comen to his Ere
How that Micenes was belein,
Bot what was more herd he noght sein;
With gret manace and mochel bost
He drowh pouer and made an host
And cam in rescousse of the toun.
Bot al the sleyhte of his tresoun
Horestes wiste it be aspie,
And of his men a gret partie
He made in buisshement abide,
To waite on him in such a tide
That he ne mihte here hond ascape:
And in this wise as he hath schape
The thing befell, so that Egiste
Was take, er he himself it wiste,
And was forth broght hise hondes bounde,
As whan men han a tretour founde.
And tho that weren with him take,
Whiche of tresoun were overtake,
Togedre in o sentence falle;
Bot false Egiste above hem alle
Was demed to diverse peine,
The worste that men cowthe ordeigne,
And so forth after be the lawe
He was unto the gibet drawe,
Where he above alle othre hongeth,
As to a tretour it belongeth.
Tho fame with hire swifte wynges
Aboute flyh and bar tidinges,
And made it cowth in alle londes
How that Horestes with hise hondes
Climestre his oghne Moder slowh.
Some sein he dede wel ynowh,
And som men sein he dede amis,
Diverse opinion ther is:
That sche is ded thei speken alle,
Bot pleinli hou it is befalle,
The matiere in so litel throwe
In soth ther mihte noman knowe
Bot thei that weren ate dede:
And comunliche in every nede
The worste speche is rathest herd
And lieved, til it be ansuerd.
The kinges and the lordes grete
Begonne Horestes forto threte
To puten him out of his regne:
'He is noght worthi forto regne,
The child which slowh his moder so,'
Thei saide; and therupon also
The lordes of comun assent
A time sette of parlement,
And to Athenes king and lord
Togedre come of on accord,
To knowe hou that the sothe was:
So that Horestes in this cas
Thei senden after, and he com.
King Menelay the wordes nom
And axeth him of this matiere:
And he, that alle it mihten hiere,
Ansuerde and tolde his tale alarge,
And hou the goddes in his charge
Comanded him in such a wise
His oghne hond to do juise.
And with this tale a Duc aros,
Which was a worthi kniht of los,
His name was Menestes,
And seide unto the lordes thus:
'The wreeche which Horeste dede,
It was thing of the goddes bede,
And nothing of his crualte;
And if ther were of mi degree
In al this place such a kniht
That wolde sein it was no riht,
I wole it with my bodi prove.'
And therupon he caste his glove,
And ek this noble Duc alleide
Ful many an other skile, and seide
Sche hadde wel deserved wreche,
Ferst for the cause of Spousebreche,
And after wroghte in such a wise
That al the world it oghte agrise,
Whan that sche for so foul a vice
Was of hire oghne lord moerdrice.
Thei seten alle stille and herde,
Bot therto was noman ansuerde,
It thoghte hem alle he seide skile,
Ther is noman withseie it wile;
Whan thei upon the reson musen,
Horestes alle thei excusen:
So that with gret solempnete
He was unto his dignete
Received, and coroned king.
And tho befell a wonder thing:
Egiona, whan sche this wiste,
Which was the dowhter of Egiste
And Soster on the moder side
To this Horeste, at thilke tide,
Whan sche herde how hir brother spedde,
For pure sorwe, which hire ledde,
That he ne hadde ben exiled,
Sche hath hire oghne lif beguiled
Anon and hyng hireselve tho.
It hath and schal ben everemo,
To moerdre who that wole assente,
He mai noght faille to repente:
This false Egiona was on,
Which forto moerdre Agamenon
Yaf hire acord and hire assent,
So that be goddes juggement,
Thogh that non other man it wolde,
Sche tok hire juise as sche scholde;
And as sche to an other wroghte,
Vengance upon hireself sche soghte,
And hath of hire unhappi wit
A moerdre with a moerdre quit.
Such is of moerdre the vengance.
Forthi, mi Sone, in remembrance
Of this ensample tak good hiede:
For who that thenkth his love spiede
With moerdre, he schal with worldes schame
Himself and ek his love schame.
Mi fader, of this aventure
Which ye have told, I you assure
Min herte is sory forto hiere,
Bot only for I wolde lere
What is to done, and what to leve.
And over this now be your leve,
That ye me wolden telle I preie,
If ther be lieffull eny weie
Withoute Senne a man to sle.
Mi Sone, in sondri wise ye.
What man that is of traiterie,
Of moerdre or elles robberie
Atteint, the jugge schal noght lette,
Bot he schal slen of pure dette,
And doth gret Senne, if that he wonde.
For who that lawe hath upon honde,
And spareth forto do justice
For merci, doth noght his office,
That he his mercy so bewareth,
Whan for o schrewe which he spareth
A thousand goode men he grieveth:
With such merci who that believeth
To plese god, he is deceived,
Or elles resoun mot be weyved.
The lawe stod er we were bore,
How that a kinges swerd is bore
In signe that he schal defende
His trewe poeple and make an ende
Of suche as wolden hem devoure.
Lo thus, my Sone, to socoure
The lawe and comun riht to winne,
A man mai sle withoute Sinne,
And do therof a gret almesse,
So forto kepe rihtwisnesse.
And over this for his contre
In time of werre a man is fre
Himself, his hous and ek his lond
Defende with his oghne hond,
And slen, if that he mai no bet,
After the lawe which is set.
Now, fader, thanne I you beseche
Of hem that dedly werres seche
In worldes cause and scheden blod,
If such an homicide is good.
Mi Sone, upon thi question
The trowthe of myn opinion,
Als ferforth as my wit arecheth
And as the pleine lawe techeth,
I woll thee telle in evidence,
To rewle with thi conscience.
The hihe god of his justice
That ilke foule horrible vice
Of homicide he hath forbede,
Be Moises as it was bede.
Whan goddes Sone also was bore,
He sende hise anglis doun therfore,
Whom the Schepherdes herden singe,
Pes to the men of welwillinge
In erthe be among ous here.
So forto speke in this matiere
After the lawe of charite,
Ther schal no dedly werre be:
And ek nature it hath defended
And in hir lawe pes comended,
Which is the chief of mannes welthe,
Of mannes lif, of mannes helthe.
Bot dedly werre hath his covine
Of pestilence and of famine,
Of poverte and of alle wo,
Wherof this world we blamen so,
Which now the werre hath under fote,
Til god himself therof do bote.
For alle thing which god hath wroght
In Erthe, werre it bringth to noght:
The cherche is brent, the priest is slain,
The wif, the maide is ek forlain,
The lawe is lore and god unserved:
I not what mede he hath deserved
That suche werres ledeth inne.
If that he do it forto winne,
Ferst to acompte his grete cost
Forth with the folk that he hath lost,
As to the wordes rekeninge
Ther schal he finde no winnynge;
And if he do it to pourchace
The hevene mede, of such a grace
I can noght speke, and natheles
Crist hath comanded love and pes,
And who that worcheth the revers,
I trowe his mede is ful divers.
And sithen thanne that we finde
That werres in here oghne kinde
Ben toward god of no decerte,
And ek thei bringen in poverte
Of worldes good, it is merveile
Among the men what it mai eyle,
That thei a pes ne conne sette.
I trowe Senne be the lette,
And every mede of Senne is deth;
So wot I nevere hou that it geth:
Bot we that ben of o believe
Among ousself, this wolde I lieve,
That betre it were pes to chese,
Than so be double weie lese.
I not if that it now so stonde,
Bot this a man mai understonde,
Who that these olde bokes redeth,
That coveitise is on which ledeth,
And broghte ferst the werres inne.
At Grece if that I schal beginne,
Ther was it proved hou it stod:
To Perce, which was ful of good,
Thei maden werre in special,
And so thei deden overal,
Wher gret richesse was in londe,
So that thei leften nothing stonde
Unwerred, bot onliche Archade.
For there thei no werres made,
Be cause it was bareigne and povere,
Wherof thei mihten noght recovere;
And thus poverte was forbore,
He that noght hadde noght hath lore.
Bot yit it is a wonder thing,
Whan that a riche worthi king,
Or other lord, what so he be,
Wol axe and cleyme proprete
In thing to which he hath no riht,
Bot onliche of his grete miht:
For this mai every man wel wite,
That bothe kinde and lawe write
Expressly stonden therayein.
Bot he mot nedes somwhat sein,
Althogh ther be no reson inne,
Which secheth cause forto winne:
For wit that is with will oppressed,
Whan coveitise him hath adressed,
And alle resoun put aweie,
He can wel finde such a weie
To werre, where as evere him liketh,
Wherof that he the world entriketh,
That many a man of him compleigneth:
Bot yit alwei som cause he feigneth,
And of his wrongful herte he demeth
That al is wel, what evere him semeth,
Be so that he mai winne ynowh.
For as the trew man to the plowh
Only to the gaignage entendeth,
Riht so the werreiour despendeth
His time and hath no conscience.
And in this point for evidence
Of hem that suche werres make,
Thou miht a gret ensample take,
How thei her tirannie excusen
Of that thei wrongfull werres usen,
And how thei stonde of on acord,
The Souldeour forth with the lord,
The povere man forth with the riche,
As of corage thei ben liche,
To make werres and to pile
For lucre and for non other skyle:
Wherof a propre tale I rede,
As it whilom befell in dede.
Of him whom al this Erthe dradde,
Whan he the world so overladde
Thurgh werre, as it fortuned is,
King Alisandre, I rede this;
How in a Marche, where he lay,
It fell per chance upon a day
A Rovere of the See was nome,
Which many a man hadde overcome
And slain and take here good aweie:
This Pilour, as the bokes seie,
A famous man in sondri stede
Was of the werkes whiche he dede.
This Prisoner tofor the king
Was broght, and there upon this thing
In audience he was accused:
And he his dede hath noght excused,
Bot preith the king to don him riht,
And seith, 'Sire, if I were of miht,
I have an herte lich to thin;
For if the pouer were myn,
Mi will is most in special
To rifle and geten overal
The large worldes good aboute.
Bot for I lede a povere route
And am, as who seith, at meschief,
The name of Pilour and of thief
I bere; and thou, which routes grete
Miht lede and take thi beyete,
And dost riht as I wolde do,
Thi name is nothing cleped so,
Bot thou art named Emperour.
Oure dedes ben of o colour
And in effect of o decerte,
Bot thi richesse and my poverte
Tho ben noght taken evene liche.
And natheles he that is riche
This dai, tomorwe he mai be povere;
And in contraire also recovere
A povere man to gret richesse
Men sen: forthi let rihtwisnesse
Be peised evene in the balance.
The king his hardi contienance
Behield, and herde hise wordes wise,
And seide unto him in this wise:
'Thin ansuere I have understonde,
Wherof my will is, that thou stonde
In mi service and stille abide.'
And forth withal the same tide
He hath him terme of lif withholde,
The mor and for he schal ben holde,
He made him kniht and yaf him lond,
Which afterward was of his hond
And orped kniht in many a stede,
And gret prouesce of armes dede,
As the Croniqes it recorden.
And in this wise thei acorden,
The whiche of o condicioun
Be set upon destruccioun:
Such Capitein such retenue.
Bot forto se to what issue
The thing befalleth ate laste,
It is gret wonder that men caste
Here herte upon such wrong to winne,
Wher no beyete mai ben inne,
And doth desese on every side:
Bot whan reson is put aside
And will governeth the corage,
The faucon which that fleth ramage
And soeffreth nothing in the weie,
Wherof that he mai take his preie,
Is noght mor set upon ravine,
Than thilke man which his covine
Hath set in such a maner wise:
For al the world ne mai suffise
To will which is noght resonable.
Wherof ensample concordable
Lich to this point of which I meene,
Was upon Alisandre sene,
Which hadde set al his entente,
So as fortune with him wente,
That reson mihte him non governe,
Bot of his will he was so sterne,
That al the world he overran
And what him list he tok and wan.
In Ynde the superiour
Whan that he was ful conquerour,
And hadde his wilful pourpos wonne
Of al this Erthe under the Sonne,
This king homward to Macedoine,
Whan that he cam to Babiloine,
And wende most in his Empire,
As he which was hol lord and Sire,
In honour forto be received,
Most sodeinliche he was deceived,
And with strong puison envenimed.
And as he hath the world mistimed
Noght as he scholde with his wit,
Noght as he wolde it was aquit.
Thus was he slain that whilom slowh,
And he which riche was ynowh
This dai, tomorwe he hadde noght:
And in such wise as he hath wroght
In destorbance of worldes pes,
His werre he fond thanne endeles,
In which for evere desconfit
He was. Lo now, for what profit
Of werre it helpeth forto ryde,
For coveitise and worldes pride
To sle the worldes men aboute,
As bestes whiche gon theroute.
For every lif which reson can
Oghth wel to knowe that a man
Ne scholde thurgh no tirannie
Lich to these othre bestes die,
Til kinde wolde for him sende.
I not hou he it mihte amende,
Which takth awei for everemore
The lif that he mai noght restore.
Forthi, mi Sone, in alle weie
Be wel avised, I thee preie,
Of slawhte er that thou be coupable
Withoute cause resonable.
Mi fader, understonde it is,
That ye have seid; bot over this
I prei you tell me nay or yee,
To passe over the grete See
To werre and sle the Sarazin,
Is that the lawe? Sone myn,
To preche and soffre for the feith,
That have I herd the gospell seith;
Bot forto slee, that hiere I noght.
Crist with his oghne deth hath boght
Alle othre men, and made hem fre,
In tokne of parfit charite;
And after that he tawhte himselve,
Whan he was ded, these othre tuelve
Of hise Apostles wente aboute
The holi feith to prechen oute,
Wherof the deth in sondri place
Thei soffre, and so god of his grace
The feith of Crist hath mad aryse:
Bot if thei wolde in other wise
Be werre have broght in the creance,
It hadde yit stonde in balance.
And that mai proven in the dede;
For what man the Croniqes rede,
Fro ferst that holi cherche hath weyved
To preche, and hath the swerd received,
Wherof the werres ben begonne,
A gret partie of that was wonne
To Cristes feith stant now miswent:
Godd do therof amendement,
So as he wot what is the beste.
Bot, Sone, if thou wolt live in reste
Of conscience wel assised,
Er that thou sle, be wel avised:
For man, as tellen ous the clerkes,
Hath god above alle ertheli werkes
Ordeined to be principal,
And ek of Soule in special
He is mad lich to the godhiede.
So sit it wel to taken hiede
And forto loke on every side,
Er that thou falle in homicide,
Which Senne is now so general,
That it welnyh stant overal,
In holi cherche and elles where.
Bot al the while it stant so there,
The world mot nede fare amis:
For whan the welle of pite is
Thurgh coveitise of worldes good
Defouled with schedinge of blod,
The remenant of folk aboute
Unethe stonden eny doute
To werre ech other and to slee.
So is it all noght worth a Stree,
The charite wherof we prechen,
For we do nothing as we techen:
And thus the blinde conscience
Of pes hath lost thilke evidence
Which Crist upon this Erthe tawhte.
Now mai men se moerdre and manslawhte
Lich as it was be daies olde,
Whan men the Sennes boghte and solde.
In Grece afore Cristes feith,
I rede, as the Cronique seith,
Touchende of this matiere thus,
In thilke time hou Peles
His oghne brother Phocus slowh;
Bot for he hadde gold ynowh
To yive, his Senne was despensed
With gold, wherof it was compensed:
Achastus, which with Venus was
Hire Priest, assoilede in that cas,
Al were ther no repentance.
And as the bok makth remembrance,
It telleth of Medee also;
Of that sche slowh her Sones tuo,
Eges in the same plit
Hath mad hire of hire Senne quit.
The Sone ek of Amphioras,
Whos rihte name Almes was,
His Moder slowh, Eriphile;
Bot Achilo the Priest and he,
So as the bokes it recorden,
For certein Somme of gold acorden
That thilke horrible sinfull dede
Assoiled was. And thus for mede
Of worldes good it falleth ofte
That homicide is set alofte
Hiere in this lif; bot after this
Ther schal be knowe how that it is
Of hem that suche thinges werche,
And hou also that holi cherche
Let suche Sennes passe quyte,
And how thei wole hemself aquite
Of dedly werres that thei make.
For who that wolde ensample take,
The lawe which is naturel
Be weie of kinde scheweth wel
That homicide in no degree,
Which werreth ayein charite,
Among the men ne scholde duelle.
For after that the bokes telle,
To seche in al this worldesriche,
Men schal noght finde upon his liche
A beste forto take his preie:
And sithen kinde hath such a weie,
Thanne is it wonder of a man,
Which kynde hath and resoun can,
That he wol owther more or lasse
His kinde and resoun overpasse,
And sle that is to him semblable.
So is the man noght resonable
Ne kinde, and that is noght honeste,
Whan he is worse than a beste.
Among the bokes whiche I finde
Solyns spekth of a wonder kinde,
And seith of fowhles ther is on,
Which hath a face of blod and bon
Lich to a man in resemblance.
And if it falle him so per chance,
As he which is a fowhl of preie,
That he a man finde in his weie,
He wol him slen, if that he mai:
Bot afterward the same dai,
Whan he hath eten al his felle,
And that schal be beside a welle,
In which whan he wol drinke take,
Of his visage and seth the make
That he hath slain, anon he thenketh
Of his misdede, and it forthenketh
So gretly, that for pure sorwe
He liveth noght til on the morwe.
Be this ensample it mai well suie
That man schal homicide eschuie,
For evere is merci good to take,
Bot if the lawe it hath forsake
And that justice is therayein.
For ofte time I have herd sein
Amonges hem that werres hadden,
That thei som while here cause ladden
Be merci, whan thei mihte have slain,
Wherof that thei were after fain:
And, Sone, if that thou wolt recorde
The vertu of Misericorde,
Thou sihe nevere thilke place,
Where it was used, lacke grace.
For every lawe and every kinde
The mannes wit to merci binde;
And namely the worthi knihtes,
Whan that thei stonden most uprihtes
And ben most mihti forto grieve,
Thei scholden thanne most relieve
Him whom thei mihten overthrowe,
As be ensample a man mai knowe.
He mai noght failen of his mede
That hath merci: for this I rede,
In a Cronique and finde thus.
Whan Achilles with Telaphus
His Sone toward Troie were,
It fell hem, er thei comen there,
Ayein Theucer the king of Mese
To make werre and forto sese
His lond, as thei that wolden regne
And Theucer pute out of his regne.
And thus the Marches thei assaile,
Bot Theucer yaf to hem bataille;
Thei foghte on bothe sides faste,
Bot so it hapneth ate laste,
This worthi Grek, this Achilles,
The king among alle othre ches:
As he that was cruel and fell,
With swerd in honde on him he fell,
And smot him with a dethes wounde,
That he unhorsed fell to grounde.
Achilles upon him alyhte,
And wolde anon, as he wel mihte,
Have slain him fullich in the place;
Bot Thelaphus his fader grace
For him besoghte, and for pite
Preith that he wolde lete him be,
And caste his Schield betwen hem tuo.
Achilles axeth him why so,
And Thelaphus his cause tolde,
And seith that he is mochel holde,
For whilom Theucer in a stede
Gret grace and socour to him dede,
And seith that he him wolde aquite,
And preith his fader to respite.
Achilles tho withdrowh his hond;
Bot al the pouer of the lond,
Whan that thei sihe here king thus take,
Thei fledde and han the feld forsake:
The Grecs unto the chace falle,
And for the moste part of alle
Of that contre the lordes grete
Thei toke, and wonne a gret beyete.
And anon after this victoire
The king, which hadde good memoire,
Upon the grete merci thoghte,
Which Telaphus toward him wroghte,
And in presence of al the lond
He tok him faire be the hond,
And in this wise he gan to seie:
'Mi Sone, I mot be double weie
Love and desire thin encress;
Ferst for thi fader Achilles
Whilom ful many dai er this,
Whan that I scholde have fare amis,
Rescousse dede in mi querele
And kepte al myn astat in hele:
How so ther falle now distance
Amonges ous, yit remembrance
I have of merci which he dede
As thanne: and thou now in this stede
Of gentilesce and of franchise
Hast do mercy the same wise.
So wol I noght that eny time
Be lost of that thou hast do byme;
For hou so this fortune falle,
Yit stant mi trust aboven alle,
For the mercy which I now finde,
That thou wolt after this be kinde:
And for that such is myn espeir,
As for my Sone and for myn Eir
I thee receive, and al my lond
I yive and sese into thin hond.'
And in this wise thei acorde,
The cause was Misericorde:
The lordes dede here obeissance
To Thelaphus, and pourveance
Was mad so that he was coroned:
And thus was merci reguerdoned,
Which he to Theucer dede afore.
Lo, this ensample is mad therfore,
That thou miht take remembrance,
Mi Sone; and whan thou sest a chaunce,
Of other mennes passioun
Tak pite and compassioun,
And let nothing to thee be lief,
Which to an other man is grief.
And after this if thou desire
To stonde ayein the vice of Ire,
Consaile thee with Pacience,
And tak into thi conscience
Merci to be thi governour.
So schalt thou fiele no rancour,
Wherof thin herte schal debate
With homicide ne with hate
For Cheste or for Malencolie:
Thou schalt be soft in compaignie
Withoute Contek or Folhaste:
For elles miht thou longe waste
Thi time, er that thou have thi wille
Of love; for the weder stille
Men preise, and blame the tempestes.
Mi fader, I wol do youre hestes,
And of this point ye have me tawht,
Toward miself the betre sawht
I thenke be, whil that I live.
Bot for als moche as I am schrive
Of Wraththe and al his circumstance,
Yif what you list to my penance,
And asketh forthere of my lif,
If otherwise I be gultif
Of eny thing that toucheth Sinne.
Mi Sone, er we departe atwinne,
I schal behinde nothing leve.
Mi goode fader, be your leve
Thanne axeth forth what so you list,
For I have in you such a trist,
As ye that be my Soule hele,
That ye fro me wol nothing hele,
For I schal telle you the trowthe.
Mi Sone, art thou coupable of Slowthe
In eny point which to him longeth?
My fader, of tho pointz me longeth
To wite pleinly what thei meene,
So that I mai me schrive cleene.
Now herkne, I schal the pointz devise;
And understond wel myn aprise:
For schrifte stant of no value
To him that wol him noght vertue
To leve of vice the folie:
For word is wynd, bot the maistrie
Is that a man himself defende
Of thing which is noght to comende,
Wherof ben fewe now aday.
And natheles, so as I may
Make unto thi memoire knowe,
The pointz of Slowthe thou schalt knowe.

Confessio Amantis. Explicit Liber Primus

Incipit Liber Secundus

Inuidie culpa magis est attrita dolore,
Nam sua mens nullo tempore leta manet:
Quo gaudent alii, dolet ille, nec vnus amicus
Est, cui de puro comoda velle facit.
Proximitatis honor sua corda veretur, et omnis
Est sibi leticia sic aliena dolor.
Hoc etenim vicium quam sepe repugnat amanti,
Non sibi, set reliquis, dum fauet ipsa Venus.
Est amor ex proprio motu fantasticus, et que
Gaudia fert alius, credit obesse sibi.


Now after Pride the secounde
Ther is, which many a woful stounde
Towardes othre berth aboute
Withinne himself and noght withoute;
For in his thoght he brenneth evere,
Whan that he wot an other levere
Or more vertuous than he,
Which passeth him in his degre;
Therof he takth his maladie:
That vice is cleped hot Envie.
Forthi, my Sone, if it be so
Thou art or hast ben on of tho,
As forto speke in loves cas,
If evere yit thin herte was
Sek of an other mannes hele?
So god avance my querele,
Mi fader, ye, a thousend sithe:
Whanne I have sen an other blithe
Of love, and hadde a goodly chiere,
Ethna, which brenneth yer be yere,
Was thanne noght so hot as I
Of thilke Sor which prively
Min hertes thoght withinne brenneth.
The Schip which on the wawes renneth,
And is forstormed and forblowe,
Is noght more peined for a throwe
Than I am thanne, whanne I se
An other which that passeth me
In that fortune of loves yifte.
Bot, fader, this I telle in schrifte,
That is nowher bot in o place;
For who that lese or finde grace
In other stede, it mai noght grieve:
Bot this ye mai riht wel believe,
Toward mi ladi that I serve,
Thogh that I wiste forto sterve,
Min herte is full of such sotie,
That I myself mai noght chastie.
Whan I the Court se of Cupide
Aproche unto my ladi side
Of hem that lusti ben and freisshe,-
Thogh it availe hem noght a reisshe,
Bot only that thei ben in speche,-
My sorwe is thanne noght to seche:
Bot whan thei rounen in hire Ere,
Than groweth al my moste fere,
And namly whan thei talen longe;
My sorwes thanne be so stronge
Of that I se hem wel at ese,
I can noght telle my desese.
Bot, Sire, as of my ladi selve,
Thogh sche have wowers ten or twelve,
For no mistrust I have of hire
Me grieveth noght, for certes, Sire,
I trowe, in al this world to seche,
Nis womman that in dede and speche
Woll betre avise hire what sche doth,
Ne betre, forto seie a soth,
Kepe hire honour ate alle tide,
And yit get hire a thank beside.
Bot natheles I am beknowe,
That whanne I se at eny throwe,
Or elles if I mai it hiere,
That sche make eny man good chiere,
Thogh I therof have noght to done,
Mi thought wol entermette him sone.
For thogh I be miselve strange,
Envie makth myn herte change,
That I am sorghfully bestad
Of that I se an other glad
With hire; bot of other alle,
Of love what so mai befalle,
Or that he faile or that he spede,
Therof take I bot litel heede.
Now have I seid, my fader, al
As of this point in special,
Als ferforthli as I have wist.
Now axeth further what you list.
Mi Sone, er I axe eny more,
I thenke somdiel for thi lore
Telle an ensample of this matiere
Touchende Envie, as thou schalt hiere.
Write in Civile this I finde:
Thogh it be noght the houndes kinde
To ete chaf, yit wol he werne
An Oxe which comth to the berne,
Therof to taken eny fode.
And thus, who that it understode,
It stant of love in many place:
Who that is out of loves grace
And mai himselven noght availe,
He wolde an other scholde faile;
And if he may put eny lette,
He doth al that he mai to lette.
Wherof I finde, as thou schalt wite,
To this pourpos a tale write.
Ther ben of suche mo than twelve,
That ben noght able as of hemselve
To gete love, and for Envie
Upon alle othre thei aspie;
And for hem lacketh that thei wolde,
Thei kepte that non other scholde
Touchende of love his cause spede:
Wherof a gret ensample I rede,
Which unto this matiere acordeth,
As Ovide in his bok recordeth,
How Poliphemus whilom wroghte,
Whan that he Galathee besoghte
Of love, which he mai noght lacche.
That made him forto waite and wacche
Be alle weies how it ferde,
Til ate laste he knew and herde
How that an other hadde leve
To love there as he mot leve,
As forto speke of eny sped:
So that he knew non other red,
Bot forto wayten upon alle,
Til he may se the chance falle
That he hire love myhte grieve,
Which he himself mai noght achieve.
This Galathee, seith the Poete,
Above alle othre was unmete
Of beaute, that men thanne knewe,
And hadde a lusti love and trewe,
A Bacheler in his degree,
Riht such an other as was sche,
On whom sche hath hire herte set,
So that it myhte noght be let
For yifte ne for no beheste,
That sche ne was al at his heste.
This yonge knyht Acis was hote,
Which hire ayeinward als so hote
Al only loveth and nomo.
Hierof was Poliphemus wo
Thurgh pure Envie, and evere aspide,
And waiteth upon every side,
Whan he togedre myhte se
This yonge Acis with Galathe.
So longe he waiteth to and fro,
Til ate laste he fond hem tuo,
In prive place wher thei stode
To speke and have here wordes goode.
The place wher as he hem syh,
It was under a banke nyh
The grete See, and he above
Stod and behield the lusti love
Which ech of hem to other made
With goodly chiere and wordes glade,
That al his herte hath set afyre
Of pure Envie: and as a fyre
Which fleth out of a myhti bowe,
Aweie he fledde for a throwe,
As he that was for love wod,
Whan that he sih how that it stod.
This Polipheme a Geant was;
And whan he sih the sothe cas,
How Galathee him hath forsake
And Acis to hire love take,
His herte mai it noght forbere
That he ne roreth lich a Bere;
And as it were a wilde beste,
The whom no reson mihte areste,
He ran Ethna the hell aboute,
Wher nevere yit the fyr was oute,
Fulfild of sorghe and gret desese,
That he syh Acis wel at ese.
Til ate laste he him bethoghte,
As he which al Envie soghte,
And torneth to the banke ayein,
Wher he with Galathee hath seyn
Acis, whom that he thoghte grieve,
Thogh he himself mai noght relieve.
This Geant with his ruide myht
Part of the banke he schof doun riht,
The which evene upon Acis fell,
So that with fallinge of this hell
This Poliphemus Acis slowh,
Wherof sche made sorwe ynowh.
And as sche fledde fro the londe,
Neptunus tok hire into honde
And kept hire in so sauf a place
Fro Polipheme and his manace,
That he with al his false Envie
Ne mihte atteigne hir compaignie.
This Galathee of whom I speke,
That of hirself mai noght be wreke,
Withouten eny semblant feigned
Sche hath hire loves deth compleigned,
And with hire sorwe and with hire wo
Sche hath the goddes moeved so,
That thei of pite and of grace
Have Acis in the same place,
Ther he lai ded, into a welle
Transformed, as the bokes telle,
With freisshe stremes and with cliere,
As he whilom with lusti chiere
Was freissh his love forto qweme.
And with this ruide Polipheme
For his Envie and for his hate
Thei were wrothe. And thus algate,
Mi Sone, thou myht understonde,
That if thou wolt in grace stonde
With love, thou most leve Envie:
And as thou wolt for thi partie
Toward thi love stonde fre,
So most thou soffre an other be,
What so befalle upon the chaunce:
For it is an unwys vengance,
Which to non other man is lief,
And is unto himselve grief.
Mi fader, this ensample is good;
Bot how so evere that it stod
With Poliphemes love as tho,
It schal noght stonde with me so,
To worchen eny felonie
In love for no such Envie.
Forthi if ther oght elles be,
Now axeth forth, in what degre
It is, and I me schal confesse
With schrifte unto youre holinesse.
Mi goode Sone, yit ther is
A vice revers unto this,
Which envious takth his gladnesse
Of that he seth the hevinesse
Of othre men: for his welfare
Is whanne he wot an other care:
Of that an other hath a fall,
He thenkth himself arist withal.
Such is the gladschipe of Envie
In worldes thing, and in partie
Fulofte times ek also
In loves cause it stant riht so.
If thou, my Sone, hast joie had,
Whan thou an other sihe unglad,
Schrif the therof. Mi fader, yis:
I am beknowe unto you this.
Of these lovers that loven streyte,
And for that point which thei coveite
Ben poursuiantz fro yeer to yere
In loves Court, whan I may hiere
How that thei clymbe upon the whel,
And whan thei wene al schal be wel,
Thei ben doun throwen ate laste,
Thanne am I fedd of that thei faste,
And lawhe of that I se hem loure;
And thus of that thei brewe soure
I drinke swete, and am wel esed
Of that I wot thei ben desesed.
Bot this which I you telle hiere
Is only for my lady diere;
That for non other that I knowe
Me reccheth noght who overthrowe,
Ne who that stonde in love upriht:
Bot be he squier, be he knyht,
Which to my ladiward poursuieth,
The more he lest of that he suieth,
The mor me thenketh that I winne,
And am the more glad withinne
Of that I wot him sorwe endure.
For evere upon such aventure
It is a confort, as men sein,
To him the which is wo besein
To sen an other in his peine,
So that thei bothe mai compleigne.
Wher I miself mai noght availe
To sen an other man travaile,
I am riht glad if he be let;
And thogh I fare noght the bet,
His sorwe is to myn herte a game:
Whan that I knowe it is the same
Which to mi ladi stant enclined,
And hath his love noght termined,
I am riht joifull in my thoght.
If such Envie grieveth oght,
As I beknowe me coupable,
Ye that be wys and resonable,
Mi fader, telleth youre avis.
Mi Sone, Envie into no pris
Of such a forme, I understonde,
Ne mihte be no resoun stonde
For this Envie hath such a kinde,
That he wole sette himself behinde
To hindre with an othre wyht,
And gladly lese his oghne riht
To make an other lesen his.
And forto knowe how it so is,
A tale lich to this matiere
I thenke telle, if thou wolt hiere,
To schewe proprely the vice
Of this Envie and the malice.
Of Jupiter this finde I write,
How whilom that he wolde wite
Upon the pleigntes whiche he herde,
Among the men how that it ferde,
As of here wrong condicion
To do justificacion:
And for that cause doun he sente
An Angel, which about wente,
That he the sothe knowe mai.
So it befell upon a dai
This Angel, which him scholde enforme,
Was clothed in a mannes forme,
And overtok, I understonde,
Tuo men that wenten over londe,
Thurgh whiche he thoghte to aspie
His cause, and goth in compaignie.
This Angel with hise wordes wise
Opposeth hem in sondri wise,
Now lowde wordes and now softe,
That mad hem to desputen ofte,
And ech of hem his reson hadde.
And thus with tales he hem ladde
With good examinacioun,
Til he knew the condicioun,
What men thei were bothe tuo;
And sih wel ate laste tho,
That on of hem was coveitous,
And his fela was envious.
And thus, whan he hath knowlechinge,
Anon he feigneth departinge,
And seide he mot algate wende.
Bot herkne now what fell at ende:
For thanne he made hem understonde
That he was there of goddes sonde,
And seide hem, for the kindeschipe
That thei have don him felaschipe,
He wole hem do som grace ayein,
And bad that on of hem schal sein
What thing him is lievest to crave,
And he it schal of yifte have;
And over that ek forth withal
He seith that other have schal
The double of that his felaw axeth;
And thus to hem his grace he taxeth.
The coveitous was wonder glad,
And to that other man he bad
And seith that he ferst axe scholde:
For he supposeth that he wolde
Make his axinge of worldes good;
For thanne he knew wel how it stod,
That he himself be double weyhte
Schal after take, and thus be sleyhte,
Be cause that he wolde winne,
He bad his fela ferst beginne.
This Envious, thogh it be late,
Whan that he syh he mot algate
Make his axinge ferst, he thoghte,
If he worschipe or profit soghte,
It schal be doubled to his fiere:
That wolde he chese in no manere.
Bot thanne he scheweth what he was
Toward Envie, and in this cas
Unto this Angel thus he seide
And for his yifte this he preide,
To make him blind of his on yhe,
So that his fela nothing syhe.
This word was noght so sone spoke,
That his on yhe anon was loke,
And his felawh forthwith also
Was blind of bothe his yhen tuo.
Tho was that other glad ynowh,
That on wepte, and that other lowh,
He sette his on yhe at no cost,
Wherof that other two hath lost.
Of thilke ensample which fell tho,
Men tellen now fulofte so,
The world empeireth comunly:
And yit wot non the cause why;
For it acordeth noght to kinde
Min oghne harm to seche and finde
Of that I schal my brother grieve;
It myhte nevere wel achieve.
What seist thou, Sone, of this folie?
Mi fader, bot I scholde lie,
Upon the point which ye have seid
Yit was myn herte nevere leid,
Bot in the wise as I you tolde.
Bot overmore, if that ye wolde
Oght elles to my schrifte seie
Touchende Envie, I wolde preie.
Mi Sone, that schal wel be do:
Now herkne and ley thin Ere to.
Touchende as of Envious brod
I wot noght on of alle good;
Bot natheles, suche as thei be,
Yit is ther on, and that is he
Which cleped in Detraccioun.
And to conferme his accioun,
He hath withholde Malebouche,
Whos tunge neither pyl ne crouche
Mai hyre, so that he pronounce
A plein good word withoute frounce
Awher behinde a mannes bak.
For thogh he preise, he fint som lak,
Which of his tale is ay the laste,
That al the pris schal overcaste:
And thogh ther be no cause why,
Yit wole he jangle noght forthi,
As he which hath the heraldie
Of hem that usen forto lye.
For as the Netle which up renneth
The freisshe rede Roses brenneth
And makth hem fade and pale of hewe,
Riht so this fals Envious hewe,
In every place wher he duelleth,
With false wordes whiche he telleth
He torneth preisinge into blame
And worschipe into worldes schame.
Of such lesinge as he compasseth,
Is non so good that he ne passeth
Betwen his teeth and is bacbited,
And thurgh his false tunge endited:
Lich to the Scharnebudes kinde,
Of whos nature this I finde,
That in the hoteste of the dai,
Whan comen is the merie Maii,
He sprat his wynge and up he fleth:
And under al aboute he seth
The faire lusti floures springe,
Bot therof hath he no likinge;
Bot where he seth of eny beste
The felthe, ther he makth his feste,
And therupon he wole alyhte,
Ther liketh him non other sihte.
Riht so this janglere Envious,
Thogh he a man se vertuous
And full of good condicioun,
Therof makth he no mencioun:
Bot elles, be it noght so lyte,
Wherof that he mai sette a wyte,
Ther renneth he with open mouth,
Behinde a man and makth it couth.
Bot al the vertu which he can,
That wole he hide of every man,
And openly the vice telle,
As he which of the Scole of helle
Is tawht, and fostred with Envie
Of houshold and of compaignie,
Wher that he hath his propre office
To sette on every man a vice.
How so his mouth be comely,
His word sit evermore awry
And seith the worste that he may.
And in this wise now a day
In loves Court a man mai hiere
Fulofte pleigne of this matiere,
That many envious tale is stered,
Wher that it mai noght ben ansuered;
Bot yit fulofte it is believed,
And many a worthi love is grieved
Thurgh bacbitinge of fals Envie.
If thou have mad such janglerie
In loves Court, mi Sone, er this,
Schrif thee therof. Mi fader, yis:
Bot wite ye how? noght openly,
Bot otherwhile prively,
Whan I my diere ladi mete,
And thenke how that I am noght mete
Unto hire hihe worthinesse,
And ek I se the besinesse
Of al this yonge lusty route,
Whiche alday pressen hire aboute,
And ech of hem his time awaiteth,
And ech of hem his tale affaiteth,
Al to deceive an innocent,
Which woll noght ben of here assent;
And for men sein unknowe unkest,
Hire thombe sche holt in hire fest
So clos withinne hire oghne hond,
That there winneth noman lond;
Sche lieveth noght al that sche hiereth,
And thus fulofte hirself sche skiereth
And is al war of 'hadde I wist':-
Bot for al that myn herte arist,
Whanne I thes comun lovers se,
That woll noght holden hem to thre,
Bot welnyh loven overal,
Min herte is Envious withal,
And evere I am adrad of guile,
In aunter if with eny wyle
Thei mihte hire innocence enchaunte.
Forthi my wordes ofte I haunte
Behynden hem, so as I dar,
Wherof my ladi may be war:
I sai what evere comth to mowthe,
And worse I wolde, if that I cowthe;
For whanne I come unto hir speche,
Al that I may enquere and seche
Of such deceipte, I telle it al,
And ay the werste in special.
So fayn I wolde that sche wiste
How litel thei ben forto triste,
And what thei wolde and what thei mente,
So as thei be of double entente:
Thus toward hem that wicke mene
My wicked word was evere grene.
And natheles, the soth to telle,
In certain if it so befelle
That althertrewest man ybore,
To chese among a thousend score,
Which were alfulli forto triste,
Mi ladi lovede, and I it wiste,
Yit rathere thanne he scholde spede,
I wolde swiche tales sprede
To my ladi, if that I myhte,
That I scholde al his love unrihte,
And therto wolde I do mi peine.
For certes thogh I scholde feigne,
And telle that was nevere thoght,
For al this world I myhte noght
To soffre an othre fully winne,
Ther as I am yit to beginne.
For be thei goode, or be thei badde,
I wolde non my ladi hadde;
And that me makth fulofte aspie
And usen wordes of Envie,
Al forto make hem bere a blame.
And that is bot of thilke same,
The whiche unto my ladi drawe,
For evere on hem I rounge and gknawe
And hindre hem al that evere I mai;
And that is, sothly forto say,
Bot only to my lady selve:
I telle it noght to ten ne tuelve,
Therof I wol me wel avise,
To speke or jangle in eny wise
That toucheth to my ladi name,
The which in ernest and in game
I wolde save into my deth;
For me were levere lacke breth
Than speken of hire name amis.
Now have ye herd touchende of this,
Mi fader, in confessioun:
And therfor of Detraccioun
In love, of that I have mispoke,
Tel how ye wole it schal be wroke.
I am al redy forto bere
Mi peine, and also to forbere
What thing that ye wol noght allowe;
For who is bounden, he mot bowe.
So wol I bowe unto youre heste,
For I dar make this beheste,
That I to yow have nothing hid,
Bot told riht as it is betid;
And otherwise of no mispeche,
Mi conscience forto seche,
I can noght of Envie finde,
That I mispoke have oght behinde
Wherof love owhte be mispaid.
Now have ye herd and I have said;
What wol ye, fader, that I do?
Mi Sone, do nomore so,
Bot evere kep thi tunge stille,
Thou miht the more have of thi wille.
For as thou saist thiselven here,
Thi ladi is of such manere,
So wys, so war in alle thinge,
It nedeth of no bakbitinge
That thou thi ladi mis enforme:
For whan sche knoweth al the forme,
How that thiself art envious,
Thou schalt noght be so gracious
As thou peraunter scholdest elles.
Ther wol noman drinke of tho welles
Whiche as he wot is puyson inne;
And ofte swich as men beginne
Towardes othre, swich thei finde,
That set hem ofte fer behinde,
Whan that thei wene be before.
Mi goode Sone, and thou therfore
Bewar and lef thi wicke speche,
Wherof hath fallen ofte wreche
To many a man befor this time.
For who so wole his handes lime,
Thei mosten be the more unclene;
For many a mote schal be sene,
That wolde noght cleve elles there;
And that schold every wys man fere:
For who so wol an other blame,
He secheth ofte his oghne schame,
Which elles myhte be riht stille.
Forthi if that it be thi wille
To stonde upon amendement,
A tale of gret entendement
I thenke telle for thi sake,
Wherof thou miht ensample take.
A worthi kniht in Cristes lawe
Of grete Rome, as is the sawe,
The Sceptre hadde forto rihte;
Tiberie Constantin he hihte,
Whos wif was cleped Ytalie:
Bot thei togedre of progenie
No children hadde bot a Maide;
And sche the god so wel apaide,
That al the wide worldes fame
Spak worschipe of hire goode name.
Constance, as the Cronique seith,
Sche hihte, and was so ful of feith,
That the greteste of Barbarie,
Of hem whiche usen marchandie,
Sche hath converted, as thei come
To hire upon a time in Rome,
To schewen such thing as thei broghte;
Whiche worthili of hem sche boghte,
And over that in such a wise
Sche hath hem with hire wordes wise
Of Cristes feith so full enformed,
That thei therto ben all conformed,
So that baptesme thei receiven
And alle here false goddes weyven.
Whan thei ben of the feith certein,
Thei gon to Barbarie ayein,
And ther the Souldan for hem sente
And axeth hem to what entente
Thei have here ferste feith forsake.
And thei, whiche hadden undertake
The rihte feith to kepe and holde,
The matiere of here tale tolde
With al the hole circumstance.
And whan the Souldan of Constance
Upon the point that thei ansuerde
The beaute and the grace herde,
As he which thanne was to wedde,
In alle haste his cause spedde
To sende for the mariage.
And furthermor with good corage
He seith, be so he mai hire have,
That Crist, which cam this world to save,
He woll believe: and this recorded,
Thei ben on either side acorded,
And therupon to make an ende
The Souldan hise hostages sende
To Rome, of Princes Sones tuelve:
Wherof the fader in himselve
Was glad, and with the Pope avised
Tuo Cardinals he hath assissed
With othre lordes many mo,
That with his doghter scholden go,
To se the Souldan be converted.
Bot that which nevere was wel herted,
Envie, tho began travaile
In destourbance of this spousaile
So prively that non was war.
The Moder which this Souldan bar
Was thanne alyve, and thoghte this
Unto hirself: 'If it so is
Mi Sone him wedde in this manere,
Than have I lost my joies hiere,
For myn astat schal so be lassed.'
Thenkende thus sche hath compassed
Be sleihte how that sche may beguile
Hire Sone; and fell withinne a while,
Betwen hem two whan that thei were,
Sche feigneth wordes in his Ere,
And in this wise gan to seie:
'Mi Sone, I am be double weie
With al myn herte glad and blithe,
For that miself have ofte sithe
Desired thou wolt, as men seith,
Receive and take a newe feith,
Which schal be forthringe of thi lif:
And ek so worschipful a wif,
The doughter of an Emperour,
To wedde it schal be gret honour.
Forthi, mi Sone, I you beseche
That I such grace mihte areche,
Whan that my doughter come schal,
That I mai thanne in special,
So as me thenkth it is honeste,
Be thilke which the ferste feste
Schal make unto hire welcominge.'
The Souldan granteth hire axinge,
And sche therof was glad ynowh:
For under that anon sche drowh
With false wordes that sche spak
Covine of deth behinde his bak.
And therupon hire ordinance
She made so, that whan Constance
Was come forth with the Romeins,
Of clerkes and of Citezeins,
A riche feste sche hem made:
And most whan that thei weren glade,
With fals covine which sche hadde
Hire clos Envie tho sche spradde,
And alle tho that hadden be
Or in apert or in prive
Of conseil to the mariage,
Sche slowh hem in a sodein rage
Endlong the bord as thei be set,
So that it myhte noght be let;
Hire oghne Sone was noght quit,
Bot deide upon the same plit.
Bot what the hihe god wol spare
It mai for no peril misfare:
This worthi Maiden which was there
Stod thanne, as who seith, ded for feere,
To se the feste how that it stod,
Which al was torned into blod:
The Dissh forthwith the Coppe and al
Bebled thei weren overal;
Sche sih hem deie on every side;
No wonder thogh sche wepte and cride
Makende many a wofull mone.
Whan al was slain bot sche al one,
This olde fend, this Sarazine,
Let take anon this Constantine
With al the good sche thider broghte,
And hath ordeined, as sche thoghte,
A nakid Schip withoute stiere,
In which the good and hire in fiere,
Vitailed full for yeres fyve,
Wher that the wynd it wolde dryve,
Sche putte upon the wawes wilde.
Bot he which alle thing mai schilde,
Thre yer, til that sche cam to londe,
Hire Schip to stiere hath take in honde,
And in Northumberlond aryveth;
And happeth thanne that sche dryveth
Under a Castel with the flod,
Which upon Humber banke stod
And was the kynges oghne also,
The which Allee was cleped tho,
A Saxon and a worthi knyht,
Bot he believed noght ariht.
Of this Castell was Chastellein
Elda the kinges Chamberlein,
A knyhtly man after his lawe;
And whan he sih upon the wawe
The Schip drivende al one so,
He bad anon men scholden go
To se what it betokne mai.
This was upon a Somer dai,
The Schip was loked and sche founde;
Elda withinne a litel stounde
It wiste, and with his wif anon
Toward this yonge ladi gon,
Wher that thei founden gret richesse;
Bot sche hire wolde noght confesse,
Whan thei hire axen what sche was.
And natheles upon the cas
Out of the Schip with gret worschipe
Thei toke hire into felaschipe,
As thei that weren of hir glade:
Bot sche no maner joie made,
Bot sorweth sore of that sche fond
No cristendom in thilke lond;
Bot elles sche hath al hire wille,
And thus with hem sche duelleth stille.
Dame Hermyngheld, which was the wif
Of Elda, lich hire oghne lif
Constance loveth; and fell so,
Spekende alday betwen hem two,
Thurgh grace of goddes pourveance
This maiden tawhte the creance
Unto this wif so parfitly,
Upon a dai that faste by
In presence of hire housebonde,
Wher thei go walkende on the Stronde,
A blind man, which cam there lad,
Unto this wif criende he bad,
With bothe hise hondes up and preide
To hire, and in this wise he seide:
'O Hermyngeld, which Cristes feith,
Enformed as Constance seith,
Received hast, yif me my sihte.'
Upon his word hire herte afflihte
Thenkende what was best to done,
Bot natheles sche herde his bone
And seide, 'In trust of Cristes lawe,
Which don was on the crois and slawe,
Thou bysne man, behold and se.'
With that to god upon his kne
Thonkende he tok his sihte anon,
Wherof thei merveile everychon,
Bot Elda wondreth most of alle:
This open thing which is befalle
Concludeth him be such a weie,
That he the feith mot nede obeie.
Now lest what fell upon this thing.
This Elda forth unto the king
A morwe tok his weie and rod,
And Hermyngeld at home abod
Forth with Constance wel at ese.
Elda, which thoghte his king to plese,
As he that thanne unwedded was,
Of Constance al the pleine cas
Als goodliche as he cowthe tolde.
The king was glad and seide he wolde
Come thider upon such a wise
That he him mihte of hire avise,
The time apointed forth withal.
This Elda triste in special
Upon a knyht, whom fro childhode
He hadde updrawe into manhode:
To him he tolde al that he thoghte,
Wherof that after him forthoghte;
And natheles at thilke tide
Unto his wif he bad him ride
To make redi alle thing
Ayein the cominge of the king,
And seith that he himself tofore
Thenkth forto come, and bad therfore
That he him kepe, and told him whanne.
This knyht rod forth his weie thanne;
And soth was that of time passed
He hadde in al his wit compassed
How he Constance myhte winne;
Bot he sih tho no sped therinne,
Wherof his lust began tabate,
And that was love is thanne hate;
Of hire honour he hadde Envie,
So that upon his tricherie
A lesinge in his herte he caste.
Til he cam home he hieth faste,
And doth his ladi tunderstonde
The Message of hire housebonde:
And therupon the longe dai
Thei setten thinges in arrai,
That al was as it scholde be
Of every thing in his degree;
And whan it cam into the nyht,
This wif hire hath to bedde dyht,
Wher that this Maiden with hire lay.
This false knyht upon delay
Hath taried til thei were aslepe,
As he that wolde his time kepe
His dedly werkes to fulfille;
And to the bed he stalketh stille,
Wher that he wiste was the wif,
And in his hond a rasour knif
He bar, with which hire throte he cutte,
And prively the knif he putte
Under that other beddes side,
Wher that Constance lai beside.
Elda cam hom the same nyht,
And stille with a prive lyht,
As he that wolde noght awake
His wif, he hath his weie take
Into the chambre, and ther liggende
He fond his dede wif bledende,
Wher that Constance faste by
Was falle aslepe; and sodeinly
He cride alowd, and sche awok,
And forth withal sche caste a lok
And sih this ladi blede there,
Wherof swoundende ded for fere
Sche was, and stille as eny Ston
She lay, and Elda therupon
Into the Castell clepeth oute,
And up sterte every man aboute,
Into the chambre and forth thei wente.
Bot he, which alle untrouthe mente,
This false knyht, among hem alle
Upon this thing which is befalle
Seith that Constance hath don this dede;
And to the bed with that he yede
After the falshed of his speche,
And made him there forto seche,
And fond the knif, wher he it leide,
And thanne he cride and thanne he seide,
'Lo, seth the knif al blody hiere!
What nedeth more in this matiere
To axe?' And thus hire innocence
He sclaundreth there in audience
With false wordes whiche he feigneth.
Bot yit for al that evere he pleigneth,
Elda no full credence tok:
And happeth that ther lay a bok,
Upon the which, whan he it sih,
This knyht hath swore and seid on hih,
That alle men it mihte wite,
'Now be this bok, which hier is write,
Constance is gultif, wel I wot.'
With that the hond of hevene him smot
In tokne of that he was forswore,
That he hath bothe hise yhen lore,
Out of his hed the same stounde
Thei sterte, and so thei weren founde.
A vois was herd, whan that they felle,
Which seide, 'O dampned man to helle,
Lo, thus hath god the sclaundre wroke
That thou ayein Constance hast spoke:
Beknow the sothe er that thou dye.'
And he told out his felonie,
And starf forth with his tale anon.
Into the ground, wher alle gon,
This dede lady was begrave:
Elda, which thoghte his honour save,
Al that he mai restreigneth sorwe.
For the seconde day a morwe
The king cam, as thei were acorded;
And whan it was to him recorded
What god hath wroght upon this chaunce,
He tok it into remembrance
And thoghte more than he seide.
For al his hole herte he leide
Upon Constance, and seide he scholde
For love of hire, if that sche wolde,
Baptesme take and Cristes feith
Believe, and over that he seith
He wol hire wedde, and upon this
Asseured ech til other is.
And forto make schorte tales,
Ther cam a Bisschop out of Wales
Fro Bangor, and Lucie he hihte,
Which thurgh the grace of god almihte
The king with many an other mo
Hath cristned, and betwen hem tuo
He hath fulfild the mariage.
Bot for no lust ne for no rage
Sche tolde hem nevere what sche was;
And natheles upon the cas
The king was glad, how so it stod,
For wel he wiste and understod
Sche was a noble creature.
The hihe makere of nature
Hire hath visited in a throwe,
That it was openliche knowe
Sche was with childe be the king,
Wherof above al other thing
He thonketh god and was riht glad.
And fell that time he was bestad
Upon a werre and moste ride;
And whil he scholde there abide,
He lefte at hom to kepe his wif
Suche as he knew of holi lif,
Elda forth with the Bisschop eke;
And he with pouer goth to seke
Ayein the Scottes forto fonde
The werre which he tok on honde.
The time set of kinde is come,
This lady hath hire chambre nome,
And of a Sone bore full,
Wherof that sche was joiefull,
Sche was delivered sauf and sone.
The bisshop, as it was to done,
Yaf him baptesme and Moris calleth;
And therupon, as it befalleth,
With lettres writen of record
Thei sende unto here liege lord,
That kepers weren of the qweene:
And he that scholde go betwene,
The Messager, to Knaresburgh,
Which toun he scholde passe thurgh,
Ridende cam the ferste day.
The kinges Moder there lay,
Whos rihte name was Domilde,
Which after al the cause spilde:
For he, which thonk deserve wolde,
Unto this ladi goth and tolde
Of his Message al how it ferde.
And sche with feigned joie it herde
And yaf him yiftes largely,
Bot in the nyht al prively
Sche tok the lettres whiche he hadde,
Fro point to point and overradde,
As sche that was thurghout untrewe,
And let do wryten othre newe
In stede of hem, and thus thei spieke:
'Oure liege lord, we thee beseke
That thou with ous ne be noght wroth,
Though we such thing as is thee loth
Upon oure trowthe certefie.
Thi wif, which is of faierie,
Of such a child delivered is
Fro kinde which stant al amis:
Bot for it scholde noght be seie,
We have it kept out of the weie
For drede of pure worldes schame,
A povere child and in the name
Of thilke which is so misbore
We toke, and therto we be swore,
That non bot only thou and we
Schal knowen of this privete:
Moris it hatte, and thus men wene
That it was boren of the qweene
And of thin oghne bodi gete.
Bot this thing mai noght be foryete,
That thou ne sende ous word anon
What is thi wille therupon.'
This lettre, as thou hast herd devise,
Was contrefet in such a wise
That noman scholde it aperceive:
And sche, which thoghte to deceive,
It leith wher sche that other tok.
This Messager, whan he awok,
And wiste nothing how it was,
Aros and rod the grete pas
And tok this lettre to the king.
And whan he sih this wonder thing,
He makth the Messager no chiere,
Bot natheles in wys manere
He wrote ayein, and yaf hem charge
That thei ne soffre noght at large
His wif to go, bot kepe hire stille,
Til thei have herd mor of his wille.
This Messager was yifteles,
Bot with this lettre natheles,
Or be him lief or be him loth,
In alle haste ayein he goth
Be Knaresburgh, and as he wente,
Unto the Moder his entente
Of that he fond toward the king
He tolde; and sche upon this thing
Seith that he scholde abide al nyht
And made him feste and chiere ariht,
Feignende as thogh sche cowthe him thonk.
Bot he with strong wyn which he dronk
Forth with the travail of the day
Was drunke, aslepe and while he lay,
Sche hath hise lettres overseie
And formed in an other weie.
Ther was a newe lettre write,
Which seith: 'I do you forto wite,
That thurgh the conseil of you tuo
I stonde in point to ben undo,
As he which is a king deposed.
For every man it hath supposed,
How that my wif Constance is faie;
And if that I, thei sein, delaie
To put hire out of compaignie,
The worschipe of my Regalie
Is lore; and over this thei telle,
Hire child schal noght among hem duelle,
To cleymen eny heritage.
So can I se non avantage,
Bot al is lost, if sche abide:
Forthi to loke on every side
Toward the meschief as it is,
I charge you and bidde this,
That ye the same Schip vitaile,
In which that sche tok arivaile,
Therinne and putteth bothe tuo,
Hireself forthwith hire child also,
And so forth broght unto the depe
Betaketh hire the See to kepe.
Of foure daies time I sette,
That ye this thing no longer lette,
So that your lif be noght forsfet.'
And thus this lettre contrefet
The Messager, which was unwar,
Upon the kingeshalve bar,
And where he scholde it hath betake.
Bot whan that thei have hiede take,
And rad that writen is withinne,
So gret a sorwe thei beginne,
As thei here oghne Moder sihen
Brent in a fyr before here yhen:
Ther was wepinge and ther was wo,
Bot finaly the thing is do.
Upon the See thei have hire broght,
Bot sche the cause wiste noght,
And thus upon the flod thei wone,
This ladi with hire yonge Sone:
And thanne hire handes to the hevene
Sche strawhte, and with a milde stevene
Knelende upon hire bare kne
Sche seide, 'O hihe mageste,
Which sest the point of every trowthe,
Tak of thi wofull womman rowthe
And of this child that I schal kepe.'
And with that word sche gan to wepe,
Swounende as ded, and ther sche lay;
Bot he which alle thinges may
Conforteth hire, and ate laste
Sche loketh and hire yhen caste
Upon hire child and seide this:
'Of me no maner charge it is
What sorwe I soffre, bot of thee
Me thenkth it is a gret pite,
For if I sterve thou schalt deie:
So mot I nedes be that weie
For Moderhed and for tendresse
With al myn hole besinesse
Ordeigne me for thilke office,
As sche which schal be thi Norrice.'
Thus was sche strengthed forto stonde;
And tho sche tok hire child in honde
And yaf it sowke, and evere among
Sche wepte, and otherwhile song
To rocke with hire child aslepe:
And thus hire oghne child to kepe
Sche hath under the goddes cure.
And so fell upon aventure,
Whan thilke yer hath mad his ende,
Hire Schip, so as it moste wende
Thurgh strengthe of wynd which god hath yive,
Estward was into Spaigne drive
Riht faste under a Castell wall,
Wher that an hethen Amirall
Was lord, and he a Stieward hadde,
Oon Thelos, which al was badde,
A fals knyht and a renegat.
He goth to loke in what astat
The Schip was come, and there he fond
Forth with a child upon hire hond
This lady, wher sche was al one.
He tok good hiede of the persone,
And sih sche was a worthi wiht,
And thoghte he wolde upon the nyht
Demene hire at his oghne wille,
And let hire be therinne stille,
That mo men sih sche noght that dai.
At goddes wille and thus sche lai,
Unknowe what hire schal betide;
And fell so that be nyhtes tide
This knyht withoute felaschipe
Hath take a bot and cam to Schipe,
And thoghte of hire his lust to take,
And swor, if sche him daunger make,
That certeinly sche scholde deie.
Sche sih ther was non other weie,
And seide he scholde hire wel conforte,
That he ferst loke out ate porte,
That noman were nyh the stede,
Which myhte knowe what thei dede,
And thanne he mai do what he wolde.
He was riht glad that sche so tolde,
And to the porte anon he ferde:
Sche preide god, and he hire herde,
And sodeinliche he was out throwe
And dreynt, and tho began to blowe
A wynd menable fro the lond,
And thus the myhti goddes hond
Hire hath conveied and defended.
And whan thre yer be full despended,
Hire Schip was drive upon a dai,
Wher that a gret Navye lay
Of Schipes, al the world at ones:
And as god wolde for the nones,
Hire Schip goth in among hem alle,
And stinte noght, er it be falle
And hath the vessell undergete,
Which Maister was of al the Flete,
Bot there it resteth and abod.
This grete Schip on Anker rod;
The Lord cam forth, and whan he sih
That other ligge abord so nyh,
He wondreth what it myhte be,
And bad men to gon in and se.
This ladi tho was crope aside,
As sche that wolde hireselven hide,
For sche ne wiste what thei were:
Thei soghte aboute and founde hir there
And broghten up hire child and hire;
And therupon this lord to spire
Began, fro whenne that sche cam,
And what sche was. Quod sche, 'I am
A womman wofully bestad.
I hadde a lord, and thus he bad,
That I forth with my litel Sone
Upon the wawes scholden wone,
Bot why the cause was, I not:
Bot he which alle thinges wot
Yit hath, I thonke him, of his miht
Mi child and me so kept upriht,
That we be save bothe tuo.'
This lord hire axeth overmo
How sche believeth, and sche seith,
'I lieve and triste in Cristes feith,
Which deide upon the Rode tree.'
'What is thi name?' tho quod he.
'Mi name is Couste,' sche him seide:
Bot forthermor for noght he preide
Of hire astat to knowe plein,
Sche wolde him nothing elles sein
Bot of hir name, which sche feigneth;
Alle othre thinges sche restreigneth,
That a word more sche ne tolde.
This lord thanne axeth if sche wolde
With him abide in compaignie,
And seide he cam fro Barbarie
To Romeward, and hom he wente.
Tho sche supposeth what it mente,
And seith sche wolde with him wende
And duelle unto hire lyves ende,
Be so it be to his plesance.
And thus upon here aqueintance
He tolde hire pleinly as it stod,
Of Rome how that the gentil blod
In Barbarie was betraied,
And therupon he hath assaied
Be werre, and taken such vengance,
That non of al thilke alliance,
Be whom the tresoun was compassed,
Is from the swerd alyve passed;
Bot of Constance hou it was,
That cowthe he knowe be no cas,
Wher sche becam, so as he seide.
Hire Ere unto his word sche leide,
Bot forther made sche no chiere.
And natheles in this matiere
It happeth thilke time so:
This Lord, with whom sche scholde go,
Of Rome was the Senatour,
And of hir fader themperour
His brother doughter hath to wyve,
Which hath hir fader ek alyve,
And was Salustes cleped tho;
This wif Heleine hihte also,
To whom Constance was Cousine.
Thus to the sike a medicine
Hath god ordeined of his grace,
That forthwith in the same place
This Senatour his trowthe plihte,
For evere, whil he live mihte,
To kepe in worschipe and in welthe,
Be so that god wol yive hire helthe,
This ladi, which fortune him sende.
And thus be Schipe forth sailende
Hire and hir child to Rome he broghte,
And to his wif tho he besoghte
To take hire into compaignie:
And sche, which cowthe of courtesie
Al that a good wif scholde konne,
Was inly glad that sche hath wonne
The felaschip of so good on.
Til tuelve yeres were agon,
This Emperoures dowhter Custe
Forth with the dowhter of Saluste
Was kept, bot noman redily
Knew what sche was, and noght forthi
Thei thoghten wel sche hadde be
In hire astat of hih degre,
And every lif hire loveth wel.
Now herke how thilke unstable whel,
Which evere torneth, wente aboute.
The king Allee, whil he was oute,
As thou tofore hast herd this cas,
Deceived thurgh his Moder was:
Bot whan that he cam hom ayein,
He axeth of his Chamberlein
And of the Bisschop ek also,
Wher thei the qweene hadden do.
And thei answerde, there he bad,
And have him thilke lettre rad,
Which he hem sende for warant,
And tolde him pleinli as it stant,
And sein, it thoghte hem gret pite
To se so worthi on as sche,
With such a child as ther was bore,
So sodeinly to be forlore.
He axeth hem what child that were;
And thei him seiden, that naghere,
In al the world thogh men it soghte,
Was nevere womman that forth broghte
A fairer child than it was on.
And thanne he axede hem anon,
Whi thei ne hadden write so:
Thei tolden, so thei hadden do.
He seide, 'Nay.' Thei seiden, 'Yis.'
The lettre schewed rad it is,
Which thei forsoken everidel.
Tho was it understonde wel
That ther is tresoun in the thing:
The Messager tofore the king
Was broght and sodeinliche opposed;
And he, which nothing hath supposed
Bot alle wel, began to seie
That he nagher upon the weie
Abod, bot only in a stede;
And cause why that he so dede
Was, as he wente to and fro,
At Knaresburgh be nyhtes tuo
The kinges Moder made him duelle.
And whan the king it herde telle,
Withinne his herte he wiste als faste
The treson which his Moder caste;
And thoghte he wolde noght abide,
Bot forth riht in the same tide
He tok his hors and rod anon.
With him ther riden manion,
To Knaresburgh and forth thei wente,
And lich the fyr which tunder hente,
In such a rage, as seith the bok,
His Moder sodeinliche he tok
And seide unto hir in this wise:
'O beste of helle, in what juise
Hast thou deserved forto deie,
That hast so falsly put aweie
With tresoun of thi bacbitinge
The treweste at my knowlechinge
Of wyves and the most honeste?
Bot I wol make this beheste,
I schal be venged er I go.'
And let a fyr do make tho,
And bad men forto caste hire inne:
Bot ferst sche tolde out al the sinne,
And dede hem alle forto wite
How sche the lettres hadde write,
Fro point to point as it was wroght.
And tho sche was to dethe broght
And brent tofore hire Sones yhe:
Wherof these othre, whiche it sihe
And herden how the cause stod,
Sein that the juggement is good,
Of that hir Sone hire hath so served;
For sche it hadde wel deserved
Thurgh tresoun of hire false tunge,
Which thurgh the lond was after sunge,
Constance and every wiht compleigneth.
Bot he, whom alle wo distreigneth,
This sorghfull king, was so bestad,
That he schal nevermor be glad,
He seith, eftsone forto wedde,
Til that he wiste how that sche spedde,
Which hadde ben his ferste wif:
And thus his yonge unlusti lif
He dryveth forth so as he mai.
Til it befell upon a dai,
Whan he hise werres hadde achieved,
And thoghte he wolde be relieved
Of Soule hele upon the feith
Which he hath take, thanne he seith
That he to Rome in pelrinage
Wol go, wher Pope was Pelage,
To take his absolucioun.
And upon this condicioun
He made Edwyn his lieutenant,
Which heir to him was apparant,
That he the lond in his absence
Schal reule: and thus be providence
Of alle thinges wel begon
He tok his leve and forth is gon.
Elda, which tho was with him there,
Er thei fulliche at Rome were,
Was sent tofore to pourveie;
And he his guide upon the weie,
In help to ben his herbergour,
Hath axed who was Senatour,
That he his name myhte kenne.
Of Capadoce, he seide, Arcenne
He hihte, and was a worthi kniht.
To him goth Elda tho forth riht
And tolde him of his lord tidinge,
And preide that for his comynge
He wolde assigne him herbergage;
And he so dede of good corage.
Whan al is do that was to done,
The king himself cam after sone.
This Senatour, whan that he com,
To Couste and to his wif at hom
Hath told how such a king Allee
Of gret array to the Citee
Was come, and Couste upon his tale
With herte clos and colour pale
Aswoune fell, and he merveileth
So sodeinly what thing hire eyleth,
And cawhte hire up, and whan sche wok,
Sche syketh with a pitous lok
And feigneth seknesse of the See;
Bot it was for the king Allee,
For joie which fell in hire thoght
That god him hath to toune broght.
This king hath spoke with the Pope
And told al that he cowthe agrope,
What grieveth in his conscience;
And thanne he thoghte in reverence
Of his astat, er that he wente,
To make a feste, and thus he sente
Unto the Senatour to come
Upon the morwe and othre some,
To sitte with him at the mete.
This tale hath Couste noght foryete,
Bot to Moris hire Sone tolde
That he upon the morwe scholde
In al that evere he cowthe and mihte
Be present in the kinges sihte,
So that the king him ofte sihe.
Moris tofore the kinges yhe
Upon the morwe, wher he sat,
Fulofte stod, and upon that
The king his chiere upon him caste,
And in his face him thoghte als faste
He sih his oghne wif Constance;
For nature as in resemblance
Of face hem liketh so to clothe,
That thei were of a suite bothe.
The king was moeved in his thoght
Of that he seth, and knoweth it noght;
This child he loveth kindely,
And yit he wot no cause why.
Bot wel he sih and understod
That he toward Arcenne stod,
And axeth him anon riht there,
If that this child his Sone were.
He seide, 'Yee, so I him calle,
And wolde it were so befalle,
Bot it is al in other wise.'
And tho began he to devise
How he the childes Moder fond
Upon the See from every lond
Withinne a Schip was stiereles,
And how this ladi helpeles
Forth with hir child he hath forthdrawe.
The king hath understonde his sawe,
The childes name and axeth tho,
And what the Moder hihte also
That he him wolde telle he preide.
'Moris this child is hote,' he seide,
'His Moder hatte Couste, and this
I not what maner name it is.'
But Allee wiste wel ynowh,
Wherof somdiel smylende he lowh;
For Couste in Saxoun is to sein
Constance upon the word Romein.
Bot who that cowthe specefie
What tho fell in his fantasie,
And how his wit aboute renneth
Upon the love in which he brenneth,
It were a wonder forto hiere:
For he was nouther ther ne hiere,
Bot clene out of himself aweie,
That he not what to thenke or seie,
So fain he wolde it were sche.
Wherof his hertes privete
Began the werre of yee and nay,
The which in such balance lay,
That contenance for a throwe
He loste, til he mihte knowe
The sothe: bot in his memoire
The man which lith in purgatoire
Desireth noght the hevene more,
That he ne longeth al so sore
To wite what him schal betide.
And whan the bordes were aside
And every man was rise aboute,
The king hath weyved al the route,
And with the Senatour al one
He spak and preide him of a bone,
To se this Couste, wher sche duelleth
At hom with him, so as he telleth.
The Senatour was wel appaied,
This thing no lengere is delaied,
To se this Couste goth the king;
And sche was warned of the thing,
And with Heleine forth sche cam
Ayein the king, and he tho nam
Good hiede, and whan he sih his wif,
Anon with al his hertes lif
He cawhte hire in his arm and kiste.
Was nevere wiht that sih ne wiste
A man that more joie made,
Wherof thei weren alle glade
Whiche herde tellen of this chance.
This king tho with his wif Constance,
Which hadde a gret part of his wille,
In Rome for a time stille
Abod and made him wel at ese:
Bot so yit cowthe he nevere plese
His wif, that sche him wolde sein
Of hire astat the trowthe plein,
Of what contre that sche was bore,
Ne what sche was, and yit therfore
With al his wit he hath don sieke.
Thus as they lihe abedde and spieke,
Sche preide him and conseileth bothe,
That for the worschipe of hem bothe,
So as hire thoghte it were honeste,
He wolde an honourable feste
Make, er he wente, in the Cite,
Wher themperour himself schal be:
He graunteth al that sche him preide.
Bot as men in that time seide,
This Emperour fro thilke day
That ferst his dowhter wente away
He was thanne after nevere glad;
Bot what that eny man him bad
Of grace for his dowhter sake,
That grace wolde he noght forsake;
And thus ful gret almesse he dede,
Wherof sche hadde many a bede.
This Emperour out of the toun
Withinne a ten mile enviroun,
Where as it thoghte him for the beste,
Hath sondry places forto reste;
And as fortune wolde tho,
He was duellende at on of tho.
The king Allee forth with thassent
Of Couste his wif hath thider sent
Moris his Sone, as he was taght,
To themperour and he goth straght,
And in his fader half besoghte,
As he which his lordschipe soghte,
That of his hihe worthinesse
He wolde do so gret meknesse,
His oghne toun to come and se,
And yive a time in the cite,
So that his fader mihte him gete
That he wolde ones with him ete.
This lord hath granted his requeste;
And whan the dai was of the feste,
In worschipe of here Emperour
The king and ek the Senatour
Forth with here wyves bothe tuo,
With many a lord and lady mo,
On horse riden him ayein;
Til it befell, upon a plein
Thei sihen wher he was comende.
With that Constance anon preiende
Spak to hir lord that he abyde,
So that sche mai tofore ryde,
To ben upon his bienvenue
The ferste which schal him salue;
And thus after hire lordes graunt
Upon a Mule whyt amblaunt
Forth with a fewe rod this qweene.
Thei wondren what sche wolde mene,
And riden after softe pas;
Bot whan this ladi come was
To themperour, in his presence
Sche seide alowd in audience,
'Mi lord, mi fader, wel you be!
And of this time that I se
Youre honour and your goode hele,
Which is the helpe of my querele,
I thonke unto the goddes myht.'
For joie his herte was affliht
Of that sche tolde in remembrance;
And whanne he wiste it was Constance,
Was nevere fader half so blithe.
Wepende he keste hire ofte sithe,
So was his herte al overcome;
For thogh his Moder were come
Fro deth to lyve out of the grave,
He mihte nomor wonder have
Than he hath whan that he hire sih.
With that hire oghne lord cam nyh
And is to themperour obeied;
Bot whan the fortune is bewreied,
How that Constance is come aboute,
So hard an herte was non oute,
That he for pite tho ne wepte.
Arcennus, which hire fond and kepte,
Was thanne glad of that is falle,
So that with joie among hem alle
Thei riden in at Rome gate.
This Emperour thoghte al to late,
Til that the Pope were come,
And of the lordes sende some
To preie him that he wolde haste:
And he cam forth in alle haste,
And whan that he the tale herde,
How wonderly this chance ferde,
He thonketh god of his miracle,
To whos miht mai be non obstacle:
The king a noble feste hem made,
And thus thei weren alle glade.
A parlement, er that thei wente,
Thei setten unto this entente,
To puten Rome in full espeir
That Moris was apparant heir
And scholde abide with hem stille,
For such was al the londes wille.
Whan every thing was fulli spoke,
Of sorwe and queint was al the smoke,
Tho tok his leve Allee the king,
And with full many a riche thing,
Which themperour him hadde yive,
He goth a glad lif forto live;
For he Constance hath in his hond,
Which was the confort of his lond.
For whan that he cam hom ayein,
Ther is no tunge it mihte sein
What joie was that ilke stounde
Of that he hath his qweene founde,
Which ferst was sent of goddes sonde,
Whan sche was drive upon the Stronde,
Be whom the misbelieve of Sinne
Was left, and Cristes feith cam inne
To hem that whilom were blinde.
Bot he which hindreth every kinde
And for no gold mai be forboght,
The deth comende er he be soght,
Tok with this king such aqueintance,
That he with al his retenance
Ne mihte noght defende his lif;
And thus he parteth from his wif,
Which thanne made sorwe ynowh.
And therupon hire herte drowh
To leven Engelond for evere
And go wher that sche hadde levere,
To Rome, whenne that sche cam:
And thus of al the lond sche nam
Hir leve, and goth to Rome ayein.
And after that the bokes sein,
She was noght there bot a throwe,
Whan deth of kinde hath overthrowe
Hir worthi fader, which men seide
That he betwen hire armes deide.
And afterward the yer suiende
The god hath mad of hire an ende,
And fro this worldes faierie
Hath take hire into compaignie.
Moris hir Sone was corouned,
Which so ferforth was abandouned
To Cristes feith, that men him calle
Moris the cristeneste of alle.
And thus the wel meninge of love
Was ate laste set above;
And so as thou hast herd tofore,
The false tunges weren lore,
Whiche upon love wolden lie.
Forthi touchende of this Envie
Which longeth unto bacbitinge,
Be war thou make no lesinge
In hindringe of an other wiht:
And if thou wolt be tawht ariht
What meschief bakbitinge doth
Be other weie, a tale soth
Now miht thou hiere next suiende,
Which to this vice is acordende.
In a Cronique, as thou schalt wite,
A gret ensample I finde write,
Which I schal telle upon this thing.
Philippe of Macedoyne kyng
Two Sones hadde be his wif,
Whos fame is yit in Grece rif:
Demetrius the ferste brother
Was hote, and Perses that other.
Demetrius men seiden tho
The betre knyht was of the tuo,
To whom the lond was entendant,
As he which heir was apparant
To regne after his fader dai:
Bot that thing which no water mai
Quenche in this world, bot evere brenneth,
Into his brother herte it renneth,
The proude Envie of that he sih
His brother scholde clymbe on hih,
And he to him mot thanne obeie:
That may he soffre be no weie.
With strengthe dorst he nothing fonde,
So tok he lesinge upon honde,
Whan he sih time and spak therto.
For it befell that time so,
His fader grete werres hadde
With Rome, whiche he streite ladde
Thurgh mihty hond of his manhode,
As he which hath ynowh knihthode,
And ofte hem hadde sore grieved.
Bot er the werre were achieved,
As he was upon ordinance
At hom in Grece, it fell per chance,
Demetrius, which ofte aboute
Ridende was, stod that time oute,
So that this Perse in his absence,
Which bar the tunge of pestilence,
With false wordes whiche he feigneth
Upon his oghne brother pleigneth
In privete behinde his bak,
And to his fader thus he spak:
'Mi diere fader, I am holde
Be weie of kinde, as resoun wolde,
That I fro yow schal nothing hide,
Which mihte torne in eny side
Of youre astat into grevance:
Forthi myn hertes obeissance
Towardes you I thenke kepe;
For it is good ye take kepe
Upon a thing which is me told.
Mi brother hath ous alle sold
To hem of Rome, and you also;
For thanne they behote him so,
That he with hem schal regne in pes.
Thus hath he cast for his encress
That youre astat schal go to noght;
And this to proeve schal be broght
So ferforth, that I undertake
It schal noght wel mow be forsake.'
The king upon this tale ansuerde
And seide, if this thing which he herde
Be soth and mai be broght to prove,
'It schal noght be to his behove,
Which so hath schapen ous the werste,
For he himself schal be the ferste
That schal be ded, if that I mai.'
Thus afterward upon a dai,
Whan that Demetrius was come,
Anon his fader hath him nome,
And bad unto his brother Perse
That he his tale schal reherse
Of thilke tresoun which he tolde.
And he, which al untrowthe wolde,
Conseileth that so hih a nede
Be treted wher as it mai spede,
In comun place of juggement.
The king therto yaf his assent,
Demetrius was put in hold,
Wherof that Perses was bold.
Thus stod the trowthe under the charge,
And the falshede goth at large,
Which thurgh beheste hath overcome
The greteste of the lordes some,
That privelich of his acord
Thei stonde as witnesse of record:
The jugge was mad favorable:
Thus was the lawe deceivable
So ferforth that the trowthe fond
Rescousse non, and thus the lond
Forth with the king deceived were.
The gulteles was dampned there
And deide upon accusement:
Bot such a fals conspirement,
Thogh it be prive for a throwe,
Godd wolde noght it were unknowe;
And that was afterward wel proved
In him which hath the deth controved.
Of that his brother was so slain
This Perses was wonder fain,
As he that tho was apparant,
Upon the Regne and expectant;
Wherof he wax so proud and vein,
That he his fader in desdeign
Hath take and set of non acompte,
As he which thoghte him to surmonte;
That wher he was ferst debonaire,
He was tho rebell and contraire,
And noght as heir bot as a king
He tok upon him alle thing
Of malice and of tirannie
In contempt of the Regalie,
Livende his fader, and so wroghte,
That whan the fader him bethoghte
And sih to whether side it drowh,
Anon he wiste well ynowh
How Perse after his false tunge
Hath so thenvious belle runge,
That he hath slain his oghne brother.
Wherof as thanne he knew non other,
Bot sodeinly the jugge he nom,
Which corrupt sat upon the dom,
In such a wise and hath him pressed,
That he the sothe him hath confessed
Of al that hath be spoke and do.
Mor sori than the king was tho
Was nevere man upon this Molde,
And thoghte in certain that he wolde
Vengance take upon this wrong.
Bot thother parti was so strong,
That for the lawe of no statut
Ther mai no riht ben execut;
And upon this division
The lond was torned up so doun:
Wherof his herte is so distraght,
That he for pure sorwe hath caght
The maladie of which nature
Is queint in every creature.
And whan this king was passed thus,
This false tunged Perses
The regiment hath underfonge.
Bot ther mai nothing stonde longe
Which is noght upon trowthe grounded;
For god, which alle thing hath bounded
And sih the falshod of his guile,
Hath set him bot a litel while,
That he schal regne upon depos;
For sodeinliche as he aros
So sodeinliche doun he fell.
In thilke time it so befell,
This newe king of newe Pride
With strengthe schop him forto ride,
And seide he wolde Rome waste,
Wherof he made a besi haste,
And hath assembled him an host
In al that evere he mihte most:
What man that mihte wepne bere
Of alle he wolde non forbere;
So that it mihte noght be nombred,
The folk which after was encombred
Thurgh him, that god wolde overthrowe.
Anon it was at Rome knowe,
The pompe which that Perse ladde;
And the Romeins that time hadde
A Consul, which was cleped thus
Be name, Paul Emilius,
A noble, a worthi kniht withalle;
And he, which chief was of hem alle,
This werre on honde hath undertake.
And whanne he scholde his leve take
Of a yong dowhter which was his,
Sche wepte, and he what cause it is
Hire axeth, and sche him ansuerde
That Perse is ded; and he it herde,
And wondreth what sche meene wolde:
And sche upon childhode him tolde
That Perse hir litel hound is ded.
With that he pulleth up his hed
And made riht a glad visage,
And seide how that was a presage
Touchende unto that other Perse,
Of that fortune him scholde adverse,
He seith, for such a prenostik
Most of an hound was to him lik:
For as it is an houndes kinde
To berke upon a man behinde,
Riht so behinde his brother bak
With false wordes whiche he spak
He hath do slain, and that is rowthe.
'Bot he which hateth alle untrowthe,
The hihe god, it schal redresse;
For so my dowhter prophetesse
Forth with hir litel houndes deth
Betokneth.' And thus forth he geth
Conforted of this evidence,
With the Romeins in his defence
Ayein the Greks that ben comende.
This Perses, as noght seende
This meschief which that him abod,
With al his multitude rod,
And prided him upon the thing,
Of that he was become a king,
And how he hadde his regne gete;
Bot he hath al the riht foryete
Which longeth unto governance.
Wherof thurgh goddes ordinance
It fell, upon the wynter tide
That with his host he scholde ride
Over Danubie thilke flod,
Which al befrose thanne stod
So harde, that he wende wel
To passe: bot the blinde whiel,
Which torneth ofte er men be war,
Thilke ys which that the horsmen bar
Tobrak, so that a gret partie
Was dreint; of the chivalerie
The rerewarde it tok aweie,
Cam non of hem to londe dreie.
Paulus the worthi kniht Romein
Be his aspie it herde sein,
And hasteth him al that he may,
So that upon that other day
He cam wher he this host beheld,
And that was in a large feld,
Wher the Baneres ben desplaied.
He hath anon hise men arraied,
And whan that he was embatailled,
He goth and hath the feld assailed,
And slowh and tok al that he fond;
Wherof the Macedoyne lond,
Which thurgh king Alisandre honoured
Long time stod, was tho devoured.
To Perse and al that infortune
Thei wyte, so that the comune
Of al the lond his heir exile;
And he despeired for the while
Desguised in a povere wede
To Rome goth, and ther for nede
The craft which thilke time was,
To worche in latoun and in bras,
He lerneth for his sustienance.
Such was the Sones pourveance,
And of his fader it is seid,
In strong prisoun that he was leid
In Albe, wher that he was ded
For hunger and defalte of bred.
The hound was tokne and prophecie
That lich an hound he scholde die,
Which lich was of condicioun,
Whan he with his detraccioun
Bark on his brother so behinde.
Lo, what profit a man mai finde,
Which hindre wole an other wiht.
Forthi with al thin hole miht,
Mi Sone, eschuie thilke vice.
Mi fader, elles were I nyce:
For ye therof so wel have spoke,
That it is in myn herte loke
And evere schal: bot of Envie,
If ther be more in his baillie
Towardes love, sai me what.
Mi Sone, as guile under the hat
With sleyhtes of a tregetour
Is hidd, Envie of such colour
Hath yit the ferthe deceivant,
The which is cleped Falssemblant,
Wherof the matiere and the forme
Now herkne and I thee schal enforme.
Of Falssemblant if I schal telle,
Above alle othre it is the welle
Out of the which deceipte floweth.
Ther is noman so wys that knoweth
Of thilke flod which is the tyde,
Ne how he scholde himselven guide
To take sauf passage there.
And yit the wynd to mannes Ere
Is softe, and as it semeth oute
It makth clier weder al aboute;
Bot thogh it seme, it is noght so.
For Falssemblant hath everemo
Of his conseil in compaignie
The derke untrewe Ypocrisie,
Whos word descordeth to his thoght:
Forthi thei ben togedre broght
Of o covine, of on houshold,
As it schal after this be told.
Of Falssemblant it nedeth noght
To telle of olde ensamples oght;
For al dai in experience
A man mai se thilke evidence
Of faire wordes whiche he hiereth;
Bot yit the barge Envie stiereth
And halt it evere fro the londe,
Wher Falssemblant with Ore on honde
It roweth, and wol noght arive,
Bot let it on the wawes dryve
In gret tempeste and gret debat,
Wherof that love and his astat
Empeireth. And therfore I rede,
Mi Sone, that thou fle and drede
This vice, and what that othre sein,
Let thi Semblant be trewe and plein.
For Falssemblant is thilke vice,
Which nevere was withoute office:
Wher that Envie thenkth to guile,
He schal be for that ilke while
Of prive conseil Messagier.
For whan his semblant is most clier,
Thanne is he most derk in his thoght,
Thogh men him se, thei knowe him noght;
Bot as it scheweth in the glas
Thing which therinne nevere was,
So scheweth it in his visage
That nevere was in his corage:
Thus doth he al his thing with sleyhte.
Now ley thi conscience in weyhte,
Mi goode Sone, and schrif the hier,
If thou were evere Custummer
To Falssemblant in eny wise.
For ought I can me yit avise,
Mi goode fader, certes no.
If I for love have oght do so,
Now asketh, I wol praie yow:
For elles I wot nevere how
Of Falssemblant that I have gilt.
Mi Sone, and sithen that thou wilt
That I schal axe, gabbe noght,
Bot tell if evere was thi thoght
With Falssemblant and coverture
To wite of eny creature
How that he was with love lad;
So were he sori, were he glad,
Whan that thou wistest how it were,
Al that he rounede in thin Ere
Thou toldest forth in other place,
To setten him fro loves grace
Of what womman that thee beste liste,
Ther as noman his conseil wiste
Bot thou, be whom he was deceived
Of love, and from his pourpos weyved;
And thoghtest that his destourbance
Thin oghne cause scholde avance,
As who saith, 'I am so celee,
Ther mai no mannes privete
Be heled half so wel as myn.'
Art thou, mi Sone, of such engin?
Tell on. Mi goode fader, nay
As for the more part I say;
Bot of somdiel I am beknowe,
That I mai stonde in thilke rowe
Amonges hem that Saundres use.
I wol me noght therof excuse,
That I with such colour ne steyne,
Whan I my beste Semblant feigne
To my felawh, til that I wot
Al his conseil bothe cold and hot:
For be that cause I make him chiere,
Til I his love knowe and hiere;
And if so be myn herte soucheth
That oght unto my ladi toucheth
Of love that he wol me telle,
Anon I renne unto the welle
And caste water in the fyr,
So that his carte amidd the Myr,
Be that I have his conseil knowe,
Fulofte sithe I overthrowe,
Whan that he weneth best to stonde.
Bot this I do you understonde,
If that a man love elles where,
So that my ladi be noght there,
And he me telle, I wole it hide,
Ther schal no word ascape aside,
For with deceipte of no semblant
To him breke I no covenant;
Me liketh noght in other place
To lette noman of his grace,
Ne forto ben inquisitif
To knowe an other mannes lif:
Wher that he love or love noght,
That toucheth nothing to my thoght,
Bot al it passeth thurgh myn Ere
Riht as a thing that nevere were,
And is foryete and leid beside.
Bot if it touche on eny side
Mi ladi, as I have er spoken,
Myn Eres ben noght thanne loken;
For certes, whanne that betitt,
My will, myn herte and al my witt
Ben fully set to herkne and spire
What eny man wol speke of hire.
Thus have I feigned compaignie
Fulofte, for I wolde aspie
What thing it is that eny man
Telle of mi worthi lady can:
And for tuo causes I do this,
The ferste cause wherof is,-
If that I myhte ofherkne and seke
That eny man of hire mispeke,
I wolde excuse hire so fully,
That whan sche wist in inderly,
Min hope scholde be the more
To have hir thank for everemore.
That other cause, I you assure,
Is, why that I be coverture
Have feigned semblant ofte time
To hem that passen alday byme
And ben lovers als wel as I,
For this I weene trewely,
That ther is of hem alle non,
That thei ne loven everich on
Mi ladi: for sothliche I lieve
And durste setten it in prieve,
Is non so wys that scholde asterte,
Bot he were lustles in his herte,
Forwhy and he my ladi sihe,
Hir visage and hir goodlych yhe,
Bot he hire lovede, er he wente.
And for that such is myn entente,
That is the cause of myn aspie,
Why that I feigne compaignie
And make felawe overal;
For gladly wolde I knowen al
And holde me covert alway,
That I fulofte ye or nay
Ne liste ansuere in eny wise,
Bot feigne semblant as the wise
And herkne tales, til I knowe
Mi ladi lovers al arowe.
And whanne I hiere how thei have wroght,
I fare as thogh I herde it noght
And as I no word understode;
Bot that is nothing for here goode:
For lieveth wel, the sothe is this,
That whanne I knowe al how it is,
I wol bot forthren hem a lite,
Bot al the worste I can endite
I telle it to my ladi plat
In forthringe of myn oghne astat,
And hindre hem al that evere I may.
Bot for al that yit dar I say,
I finde unto miself no bote,
Althogh myn herte nedes mote
Thurgh strengthe of love al that I hiere
Discovere unto my ladi diere:
For in good feith I have no miht
To hele fro that swete wiht,
If that it touche hire eny thing.
Bot this wot wel the hevene king,
That sithen ferst this world began,
Unto non other strange man
Ne feigned I semblant ne chiere,
To wite or axe of his matiere,
Thogh that he lovede ten or tuelve,
Whanne it was noght my ladi selve:
Bot if he wolde axe eny red
Al onlich of his oghne hed,
How he with other love ferde,
His tales with myn Ere I herde,
Bot to myn herte cam it noght
Ne sank no deppere in my thoght,
Bot hield conseil, as I was bede,
And tolde it nevere in other stede,
Bot let it passen as it com.
Now, fader, say what is thi dom,
And hou thou wolt that I be peined
For such Semblant as I have feigned.
Mi Sone, if reson be wel peised,
Ther mai no vertu ben unpreised
Ne vice non be set in pris.
Forthi, my Sone, if thou be wys,
Do no viser upon thi face,
Which as wol noght thin herte embrace:
For if thou do, withinne a throwe
To othre men it schal be knowe,
So miht thou lihtli falle in blame
And lese a gret part of thi name.
And natheles in this degree
Fulofte time thou myht se
Of suche men that now aday
This vice setten in a say:
I speke it for no mannes blame,
Bot forto warne thee the same.
Mi Sone, as I mai hiere talke
In every place where I walke,
I not if it be so or non,
Bot it is manye daies gon
That I ferst herde telle this,
How Falssemblant hath ben and is
Most comunly fro yer to yere
With hem that duelle among ous here,
Of suche as we Lombardes calle.
For thei ben the slyeste of alle,
So as men sein in toune aboute,
To feigne and schewe thing withoute
Which is revers to that withinne:
Wherof that thei fulofte winne,
Whan thei be reson scholden lese;
Thei ben the laste and yit thei chese,
And we the ferste, and yit behinde
We gon, there as we scholden finde
The profit of oure oghne lond:
Thus gon thei fre withoute bond
To don her profit al at large,
And othre men bere al the charge.
Of Lombardz unto this covine,
Whiche alle londes conne engine,
Mai Falssemblant in special
Be likned, for thei overal,
Wher as they thenken forto duelle,
Among hemself, so as thei telle,
Ferst ben enformed forto lere
A craft which cleped is Fa crere:
For if Fa crere come aboute,
Thanne afterward hem stant no doute
To voide with a soubtil hond
The beste goodes of the lond
And bringe chaf and take corn.
Where as Fa crere goth toforn,
In all his weie he fynt no lette;
That Dore can non huissher schette
In which him list to take entre:
And thus the conseil most secre
Of every thing Fa crere knoweth,
Which into strange place he bloweth,
Where as he wot it mai most grieve.
And thus Fa crere makth believe,
So that fulofte he hath deceived,
Er that he mai ben aperceived.
Thus is this vice forto drede;
For who these olde bokes rede
Of suche ensamples as were ar,
Him oghte be the more war
Of alle tho that feigne chiere,
Wherof thou schalt a tale hiere.
Of Falssemblant which is believed
Ful many a worthi wiht is grieved,
And was long time er we wer bore.
To thee, my Sone, I wol therfore
A tale telle of Falssemblant,
Which falseth many a covenant,
And many a fraude of fals conseil
Ther ben hangende upon his Seil:
And that aboghten gulteles
Bothe Deianire and Hercules,
The whiche in gret desese felle
Thurgh Falssemblant, as I schal telle.
Whan Hercules withinne a throwe
Al only hath his herte throwe
Upon this faire Deianire,
It fell him on a dai desire,
Upon a Rivere as he stod,
That passe he wolde over the flod
Withoute bot, and with him lede
His love, bot he was in drede
For tendresce of that swete wiht,
For he knew noght the forde ariht.
Ther was a Geant thanne nyh,
Which Nessus hihte, and whanne he sih
This Hercules and Deianyre,
Withinne his herte he gan conspire,
As he which thurgh his tricherie
Hath Hercules in gret envie,
Which he bar in his herte loke,
And thanne he thoghte it schal be wroke.
Bot he ne dorste natheles
Ayein this worthi Hercules
Falle in debat as forto feihte;
Bot feigneth Semblant al be sleihte
Of frendschipe and of alle goode,
And comth where as thei bothe stode,
And makth hem al the chiere he can,
And seith that as here oghne man
He is al redy forto do
What thing he mai; and it fell so
That thei upon his Semblant triste,
And axen him if that he wiste
What thing hem were best to done,
So that thei mihten sauf and sone
The water passe, he and sche.
And whan Nessus the privete
Knew of here herte what it mente,
As he that was of double entente,
He made hem riht a glad visage;
And whanne he herde of the passage
Of him and hire, he thoghte guile,
And feigneth Semblant for a while
To don hem plesance and servise,
Bot he thoghte al an other wise.
This Nessus with hise wordes slyhe
Yaf such conseil tofore here yhe
Which semeth outward profitable
And was withinne deceivable.
He bad hem of the Stremes depe
That thei be war and take kepe,
So as thei knowe noght the pas;
Bot forto helpe in such a cas,
He seith himself that for here ese
He wolde, if that it mihte hem plese,
The passage of the water take,
And for this ladi undertake
To bere unto that other stronde
And sauf to sette hire up alonde,
And Hercules may thanne also
The weie knowe how he schal go:
And herto thei acorden alle.
Bot what as after schal befalle,
Wel payd was Hercules of this,
And this Geant also glad is,
And tok this ladi up alofte
And set hire on his schuldre softe,
And in the flod began to wade,
As he which no grucchinge made,
And bar hire over sauf and sound.
Bot whanne he stod on dreie ground
And Hercules was fer behinde,
He sette his trowthe al out of mynde,
Who so therof be lief or loth,
With Deianyre and forth he goth,
As he that thoghte to dissevere
The compaignie of hem for evere.
Whan Hercules therof tok hiede,
Als faste as evere he mihte him spiede
He hyeth after in a throwe;
And hapneth that he hadde a bowe,
The which in alle haste he bende,
As he that wolde an Arwe sende,
Which he tofore hadde envenimed.
He hath so wel his schote timed,
That he him thurgh the bodi smette,
And thus the false wiht he lette.
Bot lest now such a felonie:
Whan Nessus wiste he scholde die,
He tok to Deianyre his scherte,
Which with the blod was of his herte
Thurghout desteigned overal,
And tolde how sche it kepe schal
Al prively to this entente,
That if hire lord his herte wente
To love in eny other place,
The scherte, he seith, hath such a grace,
That if sche mai so mochel make
That he the scherte upon him take,
He schal alle othre lete in vein
And torne unto hire love ayein.
Who was tho glad bot Deianyre?
Hire thoghte hire herte was afyre
Til it was in hire cofre loke,
So that no word therof was spoke.
The daies gon, the yeres passe,
The hertes waxen lasse and lasse
Of hem that ben to love untrewe:
This Hercules with herte newe
His love hath set on Eolen,
And therof spieken alle men.
This Eolen, this faire maide,
Was, as men thilke time saide,
The kinges dowhter of Eurice;
And sche made Hercules so nyce
Upon hir Love and so assote,
That he him clotheth in hire cote,
And sche in his was clothed ofte;
And thus fieblesce is set alofte,
And strengthe was put under fote,
Ther can noman therof do bote.
Whan Deianyre hath herd this speche,
Ther was no sorwe forto seche:
Of other helpe wot sche non,
Bot goth unto hire cofre anon;
With wepende yhe and woful herte
Sche tok out thilke unhappi scherte,
As sche that wende wel to do,
And broghte hire werk aboute so
That Hercules this scherte on dede,
To such entente as she was bede
Of Nessus, so as I seide er.
Bot therof was sche noght the ner,
As no fortune may be weyved;
With Falssemblant sche was deceived,
That whan sche wende best have wonne,
Sche lost al that sche hath begonne.
For thilke scherte unto the bon
His body sette afyre anon,
And cleveth so, it mai noght twinne,
For the venym that was therinne.
And he thanne as a wilde man
Unto the hihe wode he ran,
And as the Clerk Ovide telleth,
The grete tres to grounde he felleth
With strengthe al of his oghne myght,
And made an huge fyr upriht,
And lepte himself therinne at ones
And brende him bothe fleissh and bones.
Which thing cam al thurgh Falssemblant,
That false Nessus the Geant
Made unto him and to his wif;
Wherof that he hath lost his lif,
And sche sori for everemo.
Forthi, my Sone, er thee be wo,
I rede, be wel war therfore;
For whan so gret a man was lore,
It oghte yive a gret conceipte
To warne alle othre of such deceipte.
Grant mercy, fader, I am war
So fer that I nomore dar
Of Falssemblant take aqueintance;
Bot rathere I wol do penance
That I have feigned chiere er this.
Now axeth forth, what so ther is
Of that belongeth to my schrifte.
Mi Sone, yit ther is the fifte
Which is conceived of Envie,
And cleped is Supplantarie,
Thurgh whos compassement and guile
Ful many a man hath lost his while
In love als wel as otherwise,
Hierafter as I schal devise.
The vice of Supplantacioun
With many a fals collacioun,
Which he conspireth al unknowe,
Full ofte time hath overthrowe
The worschipe of an other man.
So wel no lif awayte can
Ayein his sleyhte forto caste,
That he his pourpos ate laste
Ne hath, er that it be withset.
Bot most of alle his herte is set
In court upon these grete Offices
Of dignitees and benefices:
Thus goth he with his sleyhte aboute
To hindre and schowve an other oute
And stonden with his slyh compas
In stede there an other was;
And so to sette himselven inne,
He reccheth noght, be so he winne,
Of that an other man schal lese,
And thus fulofte chalk for chese
He changeth with ful litel cost,
Wherof an other hath the lost
And he the profit schal receive.
For his fortune is to deceive
And forto change upon the whel
His wo with othre mennes wel:
Of that an other man avaleth,
His oghne astat thus up he haleth,
And takth the bridd to his beyete,
Wher othre men the buisshes bete.
Mi Sone, and in the same wise
Ther ben lovers of such emprise,
That schapen hem to be relieved
Where it is wrong to ben achieved:
For it is other mannes riht,
Which he hath taken dai and niht
To kepe for his oghne Stor
Toward himself for everemor,
And is his propre be the lawe,
Which thing that axeth no felawe,
If love holde his covenant.
Bot thei that worchen be supplaunt,
Yit wolden thei a man supplaunte,
And take a part of thilke plaunte
Which he hath for himselve set:
And so fulofte is al unknet,
That som man weneth be riht fast.
For Supplant with his slyhe cast
Fulofte happneth forto mowe
Thing which an other man hath sowe,
And makth comun of proprete
With sleihte and with soubtilite,
As men mai se fro yer to yere.
Thus cleymeth he the bot to stiere,
Of which an other maister is.
Forthi, my Sone, if thou er this
Hast ben of such professioun,
Discovere thi confessioun:
Hast thou supplanted eny man?
For oght that I you telle can,
Min holi fader, as of the dede
I am withouten eny drede
Al gulteles; bot of my thoght
Mi conscience excuse I noght.
For were it wrong or were it riht,
Me lakketh nothing bote myht,
That I ne wolde longe er this
Of other mannes love ywiss
Be weie of Supplantacioun
Have mad apropriacioun
And holde that I nevere boghte,
Thogh it an other man forthoghte.
And al this speke I bot of on,
For whom I lete alle othre gon;
Bot hire I mai noght overpasse,
That I ne mot alwey compasse,
Me roghte noght be what queintise,
So that I mihte in eny wise
Fro suche that mi ladi serve
Hire herte make forto swerve
Withouten eny part of love.
For be the goddes alle above
I wolde it mihte so befalle,
That I al one scholde hem alle
Supplante, and welde hire at mi wille.
And that thing mai I noght fulfille,
Bot if I scholde strengthe make;
And that I dar noght undertake,
Thogh I were as was Alisaundre,
For therof mihte arise sklaundre;
And certes that schal I do nevere,
For in good feith yit hadde I levere
In my simplesce forto die,
Than worche such Supplantarie.
Of otherwise I wol noght seie
That if I founde a seker weie,
I wolde as for conclusioun
Worche after Supplantacioun,
So hihe a love forto winne.
Now, fader, if that this be Sinne,
I am al redy to redresce
The gilt of which I me confesse.
Mi goode Sone, as of Supplant
Thee thar noght drede tant ne quant,
As for nothing that I have herd,
Bot only that thou hast misferd
Thenkende, and that me liketh noght,
For godd beholt a mannes thoght.
And if thou understode in soth
In loves cause what it doth,
A man to ben a Supplantour,
Thou woldest for thin oghne honour
Be double weie take kepe:
Ferst for thin oghne astat to kepe,
To be thiself so wel bethoght
That thou supplanted were noght,
And ek for worschipe of thi name
Towardes othre do the same,
And soffren every man have his.
Bot natheles it was and is,
That in a wayt at alle assaies
Supplant of love in oure daies
The lief fulofte for the levere
Forsakth, and so it hath don evere.
Ensample I finde therupon,
At Troie how that Agamenon
Supplantede the worthi knyht
Achilles of that swete wiht,
Which named was Brexeida;
And also of Criseida,
Whom Troilus to love ches,
Supplanted hath Diomedes.
Of Geta and Amphitrion,
That whilom weren bothe as on
Of frendschipe and of compaignie,
I rede how that Supplantarie
In love, as it betidde tho,
Beguiled hath on of hem tuo.
For this Geta that I of meene,
To whom the lusti faire Almeene
Assured was be weie of love,
Whan he best wende have ben above
And sikerest of that he hadde,
Cupido so the cause ladde,
That whil he was out of the weie,
Amphitrion hire love aweie
Hath take, and in this forme he wroghte.
Be nyhte unto the chambre he soghte,
Wher that sche lay, and with a wyle
He contrefeteth for the whyle
The vois of Gete in such a wise,
That made hire of hire bedd arise,
Wenende that it were he,
And let him in, and whan thei be
Togedre abedde in armes faste,
This Geta cam thanne ate laste
Unto the Dore and seide, 'Undo.'
And sche ansuerde and bad him go,
And seide how that abedde al warm
Hir lief lay naked in hir arm;
Sche wende that it were soth.
Lo, what Supplant of love doth:
This Geta forth bejaped wente,
And yit ne wiste he what it mente;
Amphitrion him hath supplanted
With sleyhte of love and hire enchaunted:
And thus put every man out other,
The Schip of love hath lost his Rother,
So that he can no reson stiere.
And forto speke of this matiere
Touchende love and his Supplant,
A tale which is acordant
Unto thin Ere I thenke enforme.
Now herkne, for this is the forme.
Of thilke Cite chief of alle
Which men the noble Rome calle,
Er it was set to Cristes feith,
Ther was, as the Cronique seith,
An Emperour, the which it ladde
In pes, that he no werres hadde:
Ther was nothing desobeissant
Which was to Rome appourtenant,
Bot al was torned into reste.
To some it thoghte for the beste,
To some it thoghte nothing so,
And that was only unto tho
Whos herte stod upon knyhthode:
Bot most of alle of his manhode
The worthi Sone of themperour,
Which wolde ben a werreiour,
As he that was chivalerous
Of worldes fame and desirous,
Began his fadre to beseche
That he the werres mihte seche,
In strange Marches forto ride.
His fader seide he scholde abide,
And wolde granten him no leve:
Bot he, which wolde noght beleve,
A kniht of his to whom he triste,
So that his fader nothing wiste,
He tok and tolde him his corage,
That he pourposeth a viage.
If that fortune with him stonde,
He seide how that he wolde fonde
The grete See to passe unknowe,
And there abyde for a throwe
Upon the werres to travaile.
And to this point withoute faile
This kniht, whan he hath herd his lord,
Is swore, and stant of his acord,
As thei that bothe yonge were;
So that in prive conseil there
Thei ben assented forto wende.
And therupon to make an ende,
Tresor ynowh with hem thei token,
And whan the time is best thei loken,
That sodeinliche in a Galeie
Fro Romelond thei wente here weie
And londe upon that other side.
The world fell so that ilke tide,
Which evere hise happes hath diverse,
The grete Soldan thanne of Perse
Ayein the Caliphe of Egipte
A werre, which that him beclipte,
Hath in a Marche costeiant.
And he, which was a poursuiant
Worschipe of armes to atteigne,
This Romein, let anon ordeigne,
That he was redi everydel:
And whan he was arraied wel
Of every thing which him belongeth,
Straght unto Kaire his weie he fongeth,
Wher he the Soldan thanne fond,
And axeth that withinne his lond
He mihte him for the werre serve,
As he which wolde his thonk deserve.
The Soldan was riht glad with al,
And wel the more in special
Whan that he wiste he was Romein;
Bot what was elles in certein,
That mihte he wite be no weie.
And thus the kniht of whom I seie
Toward the Soldan is beleft,
And in the Marches now and eft,
Wher that the dedli werres were,
He wroghte such knihthode there,
That every man spak of him good.
And thilke time so it stod,
This mihti Soldan be his wif
A Dowhter hath, that in this lif
Men seiden ther was non so fair.
Sche scholde ben hir fader hair,
And was of yeres ripe ynowh:
Hire beaute many an herte drowh
To bowe unto that ilke lawe
Fro which no lif mai be withdrawe,
And that is love, whos nature
Set lif and deth in aventure
Of hem that knyhthode undertake.
This lusti peine hath overtake
The herte of this Romein so sore,
That to knihthode more and more
Prouesce avanceth his corage.
Lich to the Leoun in his rage,
Fro whom that alle bestes fle,
Such was the knyht in his degre:
Wher he was armed in the feld,
Ther dorste non abide his scheld;
Gret pris upon the werre he hadde.
Bot sche which al the chance ladde,
Fortune, schop the Marches so,
That be thassent of bothe tuo,
The Soldan and the Caliphe eke,
Bataille upon a dai thei seke,
Which was in such a wise set
That lengere scholde it noght be let.
Thei made hem stronge on every side,
And whan it drowh toward the tide
That the bataille scholde be,
The Soldan in gret privete
A goldring of his dowhter tok,
And made hire swere upon a bok
And ek upon the goddes alle,
That if fortune so befalle
In the bataille that he deie,
That sche schal thilke man obeie
And take him to hire housebonde,
Which thilke same Ring to honde
Hire scholde bringe after his deth.
This hath sche swore, and forth he geth
With al the pouer of his lond
Unto the Marche, where he fond
His enemy full embatailled.
The Soldan hath the feld assailed:
Thei that ben hardy sone assemblen,
Wherof the dredfull hertes tremblen:
That on sleth, and that other sterveth,
Bot above all his pris deserveth
This knihtly Romein; where he rod,
His dedly swerd noman abod,
Ayein the which was no defence;
Egipte fledde in his presence,
And thei of Perse upon the chace
Poursuien: bot I not what grace
Befell, an Arwe out of a bowe
Al sodeinly that ilke throwe
The Soldan smot, and ther he lay:
The chace is left for thilke day,
And he was bore into a tente.
The Soldan sih how that it wente,
And that he scholde algate die;
And to this knyht of Romanie,
As unto him whom he most triste,
His Dowhter Ring, that non it wiste,
He tok, and tolde him al the cas,
Upon hire oth what tokne it was
Of that sche scholde ben his wif.
Whan this was seid, the hertes lif
Of this Soldan departeth sone;
And therupon, as was to done,
The dede body wel and faire
Thei carie til thei come at Kaire,
Wher he was worthily begrave.
The lordes, whiche as wolden save
The Regne which was desolat,
To bringe it into good astat
A parlement thei sette anon.
Now herkne what fell therupon:
This yonge lord, this worthi kniht
Of Rome, upon the same niht
That thei amorwe trete scholde,
Unto his Bacheler he tolde
His conseil, and the Ring with al
He scheweth, thurgh which that he schal,
He seith, the kinges Dowhter wedde,
For so the Ring was leid to wedde,
He tolde, into hir fader hond,
That with what man that sche it fond
Sche scholde him take to hire lord.
And this, he seith, stant of record,
Bot noman wot who hath this Ring.
This Bacheler upon this thing
His Ere and his entente leide,
And thoghte more thanne he seide,
And feigneth with a fals visage
That he was glad, bot his corage
Was al set in an other wise.
These olde Philosophres wise
Thei writen upon thilke while,
That he mai best a man beguile
In whom the man hath most credence;
And this befell in evidence
Toward this yonge lord of Rome.
His Bacheler, which hadde tome,
Whan that his lord be nihte slepte,
This Ring, the which his maister kepte,
Out of his Pours awey he dede,
And putte an other in the stede.
Amorwe, whan the Court is set,
The yonge ladi was forth fet,
To whom the lordes don homage,
And after that of Mariage
Thei trete and axen of hir wille.
Bot sche, which thoghte to fulfille
Hire fader heste in this matiere,
Seide openly, that men mai hiere,
The charge which hire fader bad.
Tho was this Lord of Rome glad
And drowh toward his Pours anon,
Bot al for noght, it was agon:
His Bacheler it hath forthdrawe,
And axeth ther upon the lawe
That sche him holde covenant.
The tokne was so sufficant
That it ne mihte be forsake,
And natheles his lord hath take
Querelle ayein his oghne man;
Bot for nothing that evere he can
He mihte as thanne noght ben herd,
So that his cleym is unansuerd,
And he hath of his pourpos failed.
This Bacheler was tho consailed
And wedded, and of thilke Empire
He was coroned Lord and Sire,
And al the lond him hath received;
Wherof his lord, which was deceived,
A seknesse er the thridde morwe
Conceived hath of dedly sorwe:
And as he lay upon his deth,
Therwhile him lasteth speche and breth,
He sende for the worthieste
Of al the lond and ek the beste,
And tolde hem al the sothe tho,
That he was Sone and Heir also
Of themperour of grete Rome,
And how that thei togedre come,
This kniht and he; riht as it was,
He tolde hem al the pleine cas,
And for that he his conseil tolde,
That other hath al that he wolde,
And he hath failed of his mede:
As for the good he takth non hiede,
He seith, bot only of the love,
Of which he wende have ben above.
And therupon be lettre write
He doth his fader forto wite
Of al this matiere as it stod;
And thanne with an hertly mod
Unto the lordes he besoghte
To telle his ladi how he boghte
Hire love, of which an other gladeth;
And with that word his hewe fadeth,
And seide, 'A dieu, my ladi swete.'
The lif hath lost his kindly hete,
And he lay ded as eny ston;
Wherof was sory manyon,
Bot non of alle so as sche.
This false knyht in his degree
Arested was and put in hold:
For openly whan it was told
Of the tresoun which is befalle,
Thurghout the lond thei seiden alle,
If it be soth that men suppose,
His oghne untrowthe him schal depose.
And forto seche an evidence,
With honour and gret reverence,
Wherof they mihten knowe an ende,
To themperour anon thei sende
The lettre which his Sone wrot.
And whan that he the sothe wot,
To telle his sorwe is endeles,
Bot yit in haste natheles
Upon the tale which he herde
His Stieward into Perse ferde
With many a worthi Romein eke,
His liege tretour forto seke;
And whan thei thider come were,
This kniht him hath confessed there
How falsly that he hath him bore,
Wherof his worthi lord was lore.
Tho seiden some he scholde deie,
Bot yit thei founden such a weie
That he schal noght be ded in Perse;
And thus the skiles ben diverse.
Be cause that he was coroned,
And that the lond was abandoned
To him, althogh it were unriht,
Ther is no peine for him diht;
Bot to this point and to this ende
Thei granten wel that he schal wende
With the Romeins to Rome ayein.
And thus acorded ful and plein,
The qwike body with the dede
With leve take forth thei lede,
Wher that Supplant hath his juise.
Wherof that thou thee miht avise
Upon this enformacioun
Touchende of Supplantacioun,
That thou, my Sone, do noght so:
And forto take hiede also
What Supplant doth in other halve,
Ther is noman can finde a salve
Pleinly to helen such a Sor;
It hath and schal ben everemor,
Whan Pride is with Envie joint,
He soffreth noman in good point,
Wher that he mai his honour lette.
And therupon if I schal sette
Ensample, in holy cherche I finde
How that Supplant is noght behinde;
God wot if that it now be so:
For in Cronique of time ago
I finde a tale concordable
Of Supplant, which that is no fable,
In the manere as I schal telle,
So as whilom the thinges felle.
At Rome, as it hath ofte falle,
The vicair general of alle
Of hem that lieven Cristes feith
His laste day, which non withseith,
Hath schet as to the worldes ije,
Whos name if I schal specefie,
He hihte Pope Nicolas.
And thus whan that he passed was,
The Cardinals, that wolden save
The forme of lawe, in the conclave
Gon forto chese a newe Pope,
And after that thei cowthe agrope
Hath ech of hem seid his entente:
Til ate laste thei assente
Upon an holy clerk reclus,
Which full was of gostli vertus;
His pacience and his simplesse
Hath set him into hih noblesse.
Thus was he Pope canonized,
With gret honour and intronized,
And upon chance as it is falle,
His name Celestin men calle;
Which notefied was be bulle
To holi cherche and to the fulle
In alle londes magnified.
Bot every worschipe is envied,
And that was thilke time sene:
For whan this Pope of whom I meene
Was chose, and othre set beside,
A Cardinal was thilke tide
Which the papat longe hath desired
And therupon gretli conspired;
Bot whan he sih fortune is failed,
For which long time he hath travailed,
That ilke fyr which Ethna brenneth
Thurghout his wofull herte renneth,
Which is resembled to Envie,
Wherof Supplant and tricherie
Engendred is; and natheles
He feigneth love, he feigneth pes,
Outward he doth the reverence,
Bot al withinne his conscience
Thurgh fals ymaginacioun
He thoghte Supplantacioun.
And therupon a wonder wyle
He wroghte: for at thilke whyle
It fell so that of his lignage
He hadde a clergoun of yong age,
Whom he hath in his chambre affaited.
This Cardinal his time hath waited,
And with his wordes slyhe and queinte,
The whiche he cowthe wysly peinte,
He schop this clerk of which I telle
Toward the Pope forto duelle,
So that withinne his chambre anyht
He lai, and was a prive wyht
Toward the Pope on nyhtes tide.
Mai noman fle that schal betide.
This Cardinal, which thoghte guile,
Upon a day whan he hath while
This yonge clerc unto him tok,
And made him swere upon a bok,
And told him what his wille was.
And forth withal a Trompe of bras
He hath him take, and bad him this:
'Thou schalt,' he seide, 'whan time is
Awaite, and take riht good kepe,
Whan that the Pope is fast aslepe
And that non other man by nyh;
And thanne that thou be so slyh
Thurghout the Trompe into his Ere,
Fro hevene as thogh a vois it were,
To soune of such prolacioun
That he his meditacioun
Therof mai take and understonde,
As thogh it were of goddes sonde.
And in this wise thou schalt seie,
That he do thilke astat aweie
Of Pope, in which he stant honoured,
So schal his Soule be socoured
Of thilke worschipe ate laste
In hevene which schal evere laste.'
This clerc, whan he hath herd the forme
How he the Pope scholde enforme,
Tok of the Cardinal his leve,
And goth him hom, til it was Eve,
And prively the trompe he hedde,
Til that the Pope was abedde.
And at the Midnyht, whan he knewh
The Pope slepte, thanne he blewh
Withinne his trompe thurgh the wal,
And tolde in what manere he schal
His Papacie leve, and take
His ferste astat: and thus awake
This holi Pope he made thries,
Wherof diverse fantasies
Upon his grete holinesse
Withinne his herte he gan impresse.
The Pope ful of innocence
Conceiveth in his conscience
That it is goddes wille he cesse;
Bot in what wise he may relesse
His hihe astat, that wot he noght.
And thus withinne himself bethoght,
He bar it stille in his memoire,
Til he cam to the Consistoire;
And there in presence of hem alle
He axeth, if it so befalle
That eny Pope cesse wolde,
How that the lawe it soffre scholde.
Thei seten alle stille and herde,
Was non which to the point ansuerde,
For to what pourpos that it mente
Ther was noman knew his entente,
Bot only he which schop the guile.
This Cardinal the same while
Al openly with wordes pleine
Seith, if the Pope wolde ordeigne
That ther be such a lawe wroght,
Than mihte he cesse, and elles noght.
And as he seide, don it was;
The Pope anon upon the cas
Of his Papal Autorite
Hath mad and yove the decre:
And whan that lawe was confermed
In due forme and al affermed,
This innocent, which was deceived,
His Papacie anon hath weyved,
Renounced and resigned eke.
That other was nothing to seke,
Bot undernethe such a jape
He hath so for himselve schape,
That how as evere it him beseme,
The Mitre with the Diademe
He hath thurgh Supplantacion:
And in his confirmacion
Upon the fortune of his grace
His name is cleped Boneface.
Under the viser of Envie,
Lo, thus was hid the tricherie,
Which hath beguiled manyon.
Bot such conseil ther mai be non,
With treson whan it is conspired,
That it nys lich the Sparke fyred
Up in the Rof, which for a throwe
Lith hidd, til whan the wyndes blowe
It blaseth out on every side.
This Bonefas, which can noght hyde
The tricherie of his Supplant,
Hath openly mad his avant
How he the Papacie hath wonne.
Bot thing which is with wrong begonne
Mai nevere stonde wel at ende;
Wher Pride schal the bowe bende,
He schet fulofte out of the weie:
And thus the Pope of whom I seie,
Whan that he stod on hih the whiel,
He can noght soffre himself be wel.
Envie, which is loveles,
And Pride, which is laweles,
With such tempeste made him erre,
That charite goth out of herre:
So that upon misgovernance
Ayein Lowyz the king of France
He tok querelle of his oultrage,
And seide he scholde don hommage
Unto the cherche bodily.
Bot he, that wiste nothing why
He scholde do so gret servise
After the world in such a wise,
Withstod the wrong of that demande;
For noght the Pope mai comande
The king wol noght the Pope obeie.
This Pope tho be alle weie
That he mai worche of violence
Hath sent the bulle of his sentence
With cursinge and with enterdit.
The king upon this wrongful plyt,
To kepe his regne fro servage,
Conseiled was of his Barnage
That miht with miht schal be withstonde.
Thus was the cause take on honde,
And seiden that the Papacie
Thei wolde honoure and magnefie
In al that evere is spirital;
Bot thilke Pride temporal
Of Boneface in his persone,
Ayein that ilke wrong al one
Thei wolde stonden in debat:
And thus the man and noght the stat
The Frensche schopen be her miht
To grieve. And fell ther was a kniht,
Sire Guilliam de Langharet,
Which was upon this cause set;
And therupon he tok a route
Of men of Armes and rod oute,
So longe and in a wayt he lay,
That he aspide upon a day
The Pope was at Avinoun,
And scholde ryde out of the toun
Unto Pontsorge, the which is
A Castell in Provence of his.
Upon the weie and as he rod,
This kniht, which hoved and abod
Embuisshed upon horse bak,
Al sodeinliche upon him brak
And hath him be the bridel sesed,
And seide: 'O thou, which hast desesed
The Court of France be thi wrong,
Now schalt thou singe an other song:
Thin enterdit and thi sentence
Ayein thin oghne conscience
Hierafter thou schalt fiele and grope.
We pleigne noght ayein the Pope,
For thilke name is honourable,
Bot thou, which hast be deceivable
And tricherous in al thi werk,
Thou Bonefas, thou proude clerk,
Misledere of the Papacie,
Thi false bodi schal abye
And soffre that it hath deserved.'
Lo, thus the Supplantour was served;
For thei him ladden into France
And setten him to his penance
Withinne a tour in harde bondes,
Wher he for hunger bothe hise hondes
Eet of and deide, god wot how:
Of whom the wrytinge is yit now
Registred, as a man mai hiere,
Which spekth and seith in this manere:
Thin entre lich the fox was slyh,
Thi regne also with pride on hih
Was lich the Leon in his rage;
Bot ate laste of thi passage
Thi deth was to the houndes like.
Such is the lettre of his Cronique
Proclamed in the Court of Rome,
Wherof the wise ensample nome.
And yit, als ferforth as I dar,
I rede alle othre men be war,
And that thei loke wel algate
That non his oghne astat translate
Of holi cherche in no degree
Be fraude ne soubtilite:
For thilke honour which Aaron tok
Schal non receive, as seith the bok,
Bot he be cleped as he was.
What I schal thenken in this cas
Of that I hiere now aday,
I not: bot he which can and may,
Be reson bothe and be nature
The help of every mannes cure,
He kepe Simon fro the folde.
For Joachim thilke Abbot tolde
How suche daies scholden falle,
That comunliche in places alle
The Chapmen of such mercerie
With fraude and with Supplantarie
So manye scholden beie and selle,
That he ne may for schame telle
So foul a Senne in mannes Ere.
Bot god forbiede that it were
In oure daies that he seith:
For if the Clerc beware his feith
In chapmanhod at such a feire,
The remenant mot nede empeire
Of al that to the world belongeth;
For whan that holi cherche wrongeth,
I not what other thing schal rihte.
And natheles at mannes sihte
Envie forto be preferred
Hath conscience so differred,
That noman loketh to the vice
Which is the Moder of malice,
And that is thilke false Envie,
Which causeth many a tricherie;
For wher he may an other se
That is mor gracious than he,
It schal noght stonden in his miht
Bot if he hindre such a wiht:
And that is welnyh overal,
This vice is now so general.
Envie thilke unhapp indrowh,
Whan Joab be deceipte slowh
Abner, for drede he scholde be
With king David such as was he.
And thurgh Envie also it fell
Of thilke false Achitofell,
For his conseil was noght achieved,
Bot that he sih Cusy believed
With Absolon and him forsake,
He heng himself upon a stake.
Senec witnesseth openly
How that Envie proprely
Is of the Court the comun wenche,
And halt taverne forto schenche
That drink which makth the herte brenne,
And doth the wit aboute renne,
Be every weie to compasse
How that he mihte alle othre passe,
As he which thurgh unkindeschipe
Envieth every felaschipe;
So that thou miht wel knowe and se,
Ther is no vice such as he,
Ferst toward godd abhominable,
And to mankinde unprofitable:
And that be wordes bot a fewe
I schal be reson prove and schewe.
Envie if that I schal descrive,
He is noght schaply forto wyve
In Erthe among the wommen hiere;
For ther is in him no matiere
Wherof he mihte do plesance.
Ferst for his hevy continance
Of that he semeth evere unglad,
He is noght able to ben had;
And ek he brenneth so withinne,
That kinde mai no profit winne,
Wherof he scholde his love plese:
For thilke blod which scholde have ese
To regne among the moiste veines,
Is drye of thilke unkendeli peines
Thurgh whiche Envie is fyred ay.
And thus be reson prove I may
That toward love Envie is noght;
And otherwise if it be soght,
Upon what side as evere it falle,
It is the werste vice of alle,
Which of himself hath most malice.
For understond that every vice
Som cause hath, wherof it groweth,
Bot of Envie noman knoweth
Fro whenne he cam bot out of helle.
For thus the wise clerkes telle,
That no spirit bot of malice
Be weie of kinde upon a vice
Is tempted, and be such a weie
Envie hath kinde put aweie
And of malice hath his steringe,
Wherof he makth his bakbitinge,
And is himself therof desesed.
So mai ther be no kinde plesed;
For ay the mor that he envieth,
The more ayein himself he plieth.
Thus stant Envie in good espeir
To ben himself the develes heir,
As he which is his nexte liche
And forthest fro the heveneriche,
For there mai he nevere wone.
Forthi, my goode diere Sone,
If thou wolt finde a siker weie
To love, put Envie aweie.
Min holy fader, reson wolde
That I this vice eschuie scholde:
Bot yit to strengthe mi corage,
If that ye wolde in avantage
Therof sette a recoverir,
It were tome a gret desir,
That I this vice mihte flee.
Nou understond, my Sone, and se,
Ther is phisique for the seke,
And vertus for the vices eke.
Who that the vices wolde eschuie,
He mot be resoun thanne suie
The vertus; for be thilke weie
He mai the vices don aweie,
For thei togedre mai noght duelle:
For as the water of a welle
Of fyr abateth the malice,
Riht so vertu fordoth the vice.
Ayein Envie is Charite,
Which is the Moder of Pite,
That makth a mannes herte tendre,
That it mai no malice engendre
In him that is enclin therto.
For his corage is tempred so,
That thogh he mihte himself relieve,
Yit wolde he noght an other grieve,
Bot rather forto do plesance
He berth himselven the grevance,
So fain he wolde an other ese.
Wherof, mi Sone, for thin ese
Now herkne a tale which I rede,
And understond it wel, I rede.
Among the bokes of latin
I finde write of Constantin
The worthi Emperour of Rome,
Suche infortunes to him come,
Whan he was in his lusti age,
The lepre cawhte in his visage
And so forth overal aboute,
That he ne mihte ryden oute:
So lefte he bothe Schield and spere,
As he that mihte him noght bestere,
And hield him in his chambre clos.
Thurgh al the world the fame aros,
The grete clerkes ben asent
And come at his comandement
To trete upon this lordes hele.
So longe thei togedre dele,
That thei upon this medicine
Apointen hem, and determine
That in the maner as it stod
Thei wolde him bathe in childes blod
Withinne sevene wynter age:
For, as thei sein, that scholde assuage
The lepre and al the violence,
Which that thei knewe of Accidence
And noght be weie of kinde is falle.
And therto thei acorden alle
As for final conclusioun,
And tolden here opinioun
To themperour: and he anon
His conseil tok, and therupon
With lettres and with seales oute
Thei sende in every lond aboute
The yonge children forto seche,
Whos blod, thei seiden, schal be leche
For themperoures maladie.
Ther was ynowh to wepe and crie
Among the Modres, whan thei herde
Hou wofully this cause ferde,
Bot natheles thei moten bowe;
And thus wommen ther come ynowhe
With children soukende on the Tete.
Tho was ther manye teres lete,
Bot were hem lieve or were hem lothe,
The wommen and the children bothe
Into the Paleis forth be broght
With many a sory hertes thoght
Of hem whiche of here bodi bore
The children hadde, and so forlore
Withinne a while scholden se.
The Modres wepe in here degre,
And manye of hem aswoune falle,
The yonge babes criden alle:
This noyse aros, the lord it herde,
And loked out, and how it ferde
He sih, and as who seith abreide
Out of his slep, and thus he seide:
'O thou divine pourveance,
Which every man in the balance
Of kinde hast formed to be liche,
The povere is bore as is the riche
And deieth in the same wise,
Upon the fol, upon the wise
Siknesse and hele entrecomune;
Mai non eschuie that fortune
Which kinde hath in hire lawe set;
Hire strengthe and beaute ben beset
To every man aliche fre,
That sche preferreth no degre
As in the disposicioun
Of bodili complexioun:
And ek of Soule resonable
The povere child is bore als able
To vertu as the kinges Sone;
For every man his oghne wone
After the lust of his assay
The vice or vertu chese may.
Thus stonden alle men franchised,
Bot in astat thei ben divised;
To some worschipe and richesse,
To some poverte and distresse,
On lordeth and an other serveth;
Bot yit as every man deserveth
The world yifth noght his yiftes hiere.
Bot certes he hath gret matiere
To ben of good condicioun,
Which hath in his subjeccioun
The men that ben of his semblance.'
And ek he tok a remembrance
How he that made lawe of kinde
Wolde every man to lawe binde,
And bad a man, such as he wolde
Toward himself, riht such he scholde
Toward an other don also.
And thus this worthi lord as tho
Sette in balance his oghne astat
And with himself stod in debat,
And thoghte hou that it was noght good
To se so mochel mannes blod
Be spilt for cause of him alone.
He sih also the grete mone,
Of that the Modres were unglade,
And of the wo the children made,
Wherof that al his herte tendreth,
And such pite withinne engendreth,
That him was levere forto chese
His oghne bodi forto lese,
Than se so gret a moerdre wroght
Upon the blod which gulteth noght.
Thus for the pite which he tok
Alle othre leches he forsok,
And put him out of aventure
Al only into goddes cure;
And seith, 'Who that woll maister be,
He mot be servant to pite.'
So ferforth he was overcome
With charite, that he hath nome
His conseil and hise officers,
And bad unto hise tresorers
That thei his tresour al aboute
Departe among the povere route
Of wommen and of children bothe,
Wherof thei mihte hem fede and clothe
And saufli tornen hom ayein
Withoute lost of eny grein.
Thurgh charite thus he despendeth
His good, wherof that he amendeth
The povere poeple, and contrevaileth
The harm, that he hem so travaileth:
And thus the woful nyhtes sorwe
To joie is torned on the morwe;
Al was thonkinge, al was blessinge,
Which erst was wepinge and cursinge;
Thes wommen gon hom glade ynowh,
Echon for joie on other lowh,
And preiden for this lordes hele,
Which hath relessed the querele,
And hath his oghne will forsake
In charite for goddes sake.
Bot now hierafter thou schalt hiere
What god hath wroght in this matiere,
As he which doth al equite.
To him that wroghte charite
He was ayeinward charitous,
And to pite he was pitous:
For it was nevere knowe yit
That charite goth unaquit.
The nyht, whan he was leid to slepe,
The hihe god, which wolde him kepe,
Seint Peter and seint Poul him sende,
Be whom he wolde his lepre amende.
Thei tuo to him slepende appiere
Fro god, and seide in this manere:
'O Constantin, for thou hast served
Pite, thou hast pite deserved:
Forthi thou schalt such pite have
That god thurgh pite woll thee save.
So schalt thou double hele finde,
Ferst for thi bodiliche kinde,
And for thi wofull Soule also,
Thou schalt ben hol of bothe tuo.
And for thou schalt thee noght despeire,
Thi lepre schal nomore empeire
Til thou wolt sende therupon
Unto the Mont of Celion,
Wher that Silvestre and his clergie
Togedre duelle in compaignie
For drede of thee, which many day
Hast ben a fo to Cristes lay,
And hast destruid to mochel schame
The prechours of his holy name.
Bot now thou hast somdiel appesed
Thi god, and with good dede plesed,
That thou thi pite hast bewared
Upon the blod which thou hast spared.
Forthi to thi salvacion
Thou schalt have enformacioun,
Such as Silvestre schal the teche:
The nedeth of non other leche.'
This Emperour, which al this herde,
'Grant merci lordes,' he ansuerde,
'I wol do so as ye me seie.
Bot of o thing I wolde preie:
What schal I telle unto Silvestre
Or of youre name or of youre estre?'
And thei him tolden what thei hihte,
And forth withal out of his sihte
Thei passen up into the hevene.
And he awok out of his swevene,
And clepeth, and men come anon:
He tolde his drem, and therupon
In such a wise as he hem telleth
The Mont wher that Silvestre duelleth
Thei have in alle haste soght,
And founde he was and with hem broght
To themperour, which to him tolde
His swevene and elles what he wolde.
And whan Silvestre hath herd the king,
He was riht joiful of this thing,
And him began with al his wit
To techen upon holi writ
Ferst how mankinde was forlore,
And how the hihe god therfore
His Sone sende from above,
Which bore was for mannes love,
And after of his oghne chois
He tok his deth upon the crois;
And how in grave he was beloke,
And how that he hath helle broke,
And tok hem out that were him lieve;
And forto make ous full believe
That he was verrai goddes Sone,
Ayein the kinde of mannes wone
Fro dethe he ros the thridde day,
And whanne he wolde, as he wel may,
He styh up to his fader evene
With fleissh and blod into the hevene;
And riht so in the same forme
In fleissh and blod he schal reforme,
Whan time comth, the qwike and dede
At thilke woful dai of drede,
Where every man schal take his dom,
Als wel the Maister as the grom.
The mihti kinges retenue
That dai may stonde of no value
With worldes strengthe to defende;
For every man mot thanne entende
To stonde upon his oghne dedes
And leve alle othre mennes nedes.
That dai mai no consail availe,
The pledour and the plee schal faile,
The sentence of that ilke day
Mai non appell sette in delay;
Ther mai no gold the Jugge plie,
That he ne schal the sothe trie
And setten every man upriht,
Als wel the plowman as the kniht:
The lewed man, the grete clerk
Schal stonde upon his oghne werk,
And such as he is founde tho,
Such schal he be for everemo.
Ther mai no peine be relessed,
Ther mai no joie ben encressed,
Bot endeles, as thei have do,
He schal receive on of the tuo.
And thus Silvestre with his sawe
The ground of al the newe lawe
With gret devocion he precheth,
Fro point to point and pleinly techeth
Unto this hethen Emperour;
And seith, the hihe creatour
Hath underfonge his charite,
Of that he wroghte such pite,
Whan he the children hadde on honde.
Thus whan this lord hath understonde
Of al this thing how that it ferde,
Unto Silvestre he thanne ansuerde,
With al his hole herte and seith
That he is redi to the feith.
And so the vessel which for blod
Was mad, Silvestre, ther it stod,
With clene water of the welle
In alle haste he let do felle,
And sette Constantin therinne
Al naked up unto the chinne.
And in the while it was begunne,
A liht, as thogh it were a Sunne,
Fro hevene into the place com
Wher that he tok his cristendom;
And evere among the holi tales
Lich as thei weren fisshes skales
Ther fellen from him now and eft,
Til that ther was nothing beleft
Of al his grete maladie.
For he that wolde him purefie,
The hihe god hath mad him clene,
So that ther lefte nothing sene;
He hath him clensed bothe tuo,
The bodi and the Soule also.
Tho knew this Emperour in dede
That Cristes feith was forto drede,
And sende anon hise lettres oute
And let do crien al aboute,
Up peine of deth that noman weyve
That he baptesme ne receive:
After his Moder qweene Heleine
He sende, and so betwen hem tweine
Thei treten, that the Cite all
Was cristned, and sche forth withall.
This Emperour, which hele hath founde,
Withinne Rome anon let founde
Tuo cherches, which he dede make
For Peter and for Poules sake,
Of whom he hadde avisioun;
And yaf therto possessioun
Of lordschipe and of worldes good.
Bot how so that his will was good
Toward the Pope and his Franchise,
Yit hath it proved other wise,
To se the worchinge of the dede:
For in Cronique this I rede;
Anon as he hath mad the yifte,
A vois was herd on hih the lifte,
Of which al Rome was adrad,
And seith: 'To day is venym schad
In holi cherche of temporal,
Which medleth with the spirital.'
And hou it stant of that degree
Yit mai a man the sothe se:
God mai amende it, whan he wile,
I can ther to non other skile.
Bot forto go ther I began,
How charite mai helpe a man
To bothe worldes, I have seid:
And if thou have an Ere leid,
Mi Sone, thou miht understonde,
If charite be take on honde,
Ther folweth after mochel grace.
Forthi, if that thou wolt pourchace
How that thou miht Envie flee,
Aqueinte thee with charite,
Which is the vertu sovereine.
Mi fader, I schal do my peine:
For this ensample which ye tolde
With al myn herte I have withholde,
So that I schal for everemore
Eschuie Envie wel the more:
And that I have er this misdo,
Yif me my penance er I go.
And over that to mi matiere
Of schrifte, why we sitten hiere
In privete betwen ous tweie,
Now axeth what ther is, I preie.
Mi goode Sone, and for thi lore
I woll thee telle what is more,
So that thou schalt the vices knowe:
For whan thei be to thee full knowe,
Thou miht hem wel the betre eschuie.
And for this cause I thenke suie
The forme bothe and the matiere,
As now suiende thou schalt hiere
Which vice stant next after this:
And whan thou wost how that it is,
As thou schalt hiere me devise,
Thow miht thiself the betre avise.

Confessio Amantis. Explicit Liber Tercius

Incipit Liber Quartus


Dicunt accidiam fore nutricem viciorum,
Torpet et in cunctis tarda que lenta bonis:
Que fieri possent hodie transfert piger in cras,
Furatoque prius ostia claudit equo.
Poscenti tardo negat emolumenta Cupido,
Set Venus in celeri ludit amore viri.

Upon the vices to procede
After the cause of mannes dede,
The ferste point of Slowthe I calle
Lachesce, and is the chief of alle,
And hath this propreliche of kinde,
To leven alle thing behinde.
Of that he mihte do now hier
He tarieth al the longe yer,
And everemore he seith, 'Tomorwe';
And so he wol his time borwe,
And wissheth after 'God me sende,'
That whan he weneth have an ende,
Thanne is he ferthest to beginne.
Thus bringth he many a meschief inne
Unwar, til that he be meschieved,
And may noght thanne be relieved.
And riht so nowther mor ne lesse
It stant of love and of lachesce:
Som time he slowtheth in a day
That he nevere after gete mai.
Now, Sone, as of this ilke thing,
If thou have eny knowleching,
That thou to love hast don er this,
Tell on. Mi goode fader, yis.
As of lachesce I am beknowe
That I mai stonde upon his rowe,
As I that am clad of his suite:
For whanne I thoghte mi poursuite
To make, and therto sette a day
To speke unto the swete May,
Lachesce bad abide yit,
And bar on hond it was no wit
Ne time forto speke as tho.
Thus with his tales to and fro
Mi time in tariinge he drowh:
Whan ther was time good ynowh,
He seide, 'An other time is bettre;
Thou schalt mowe senden hire a lettre,
And per cas wryte more plein
Than thou be Mowthe durstest sein.'
Thus have I lete time slyde
For Slowthe, and kepte noght my tide,
So that lachesce with his vice
Fulofte hath mad my wit so nyce,
That what I thoghte speke or do
With tariinge he hield me so,
Til whanne I wolde and mihte noght.
I not what thing was in my thoght,
Or it was drede, or it was schame;
Bot evere in ernest and in game
I wot ther is long time passed.
Bot yit is noght the love lassed,
Which I unto mi ladi have;
For thogh my tunge is slowh to crave
At alle time, as I have bede,
Min herte stant evere in o stede
And axeth besiliche grace,
The which I mai noght yit embrace.
And god wot that is malgre myn;
For this I wot riht wel a fin,
Mi grace comth so selde aboute,
That is the Slowthe of which I doute
Mor than of al the remenant
Which is to love appourtenant.
And thus as touchende of lachesce,
As I have told, I me confesse
To you, mi fader, and beseche
That furthermor ye wol me teche;
And if ther be to this matiere
Som goodly tale forto liere
How I mai do lachesce aweie,
That ye it wolden telle I preie.
To wisse thee, my Sone, and rede,
Among the tales whiche I rede,
An old ensample therupon
Now herkne, and I wol tellen on.
Ayein Lachesce in loves cas
I finde how whilom Eneas,
Whom Anchises to Sone hadde,
With gret navie, which he ladde
Fro Troie, aryveth at Cartage,
Wher for a while his herbergage
He tok; and it betidde so,
With hire which was qweene tho
Of the Cite his aqueintance
He wan, whos name in remembrance
Is yit, and Dido sche was hote;
Which loveth Eneas so hote
Upon the wordes whiche he seide,
That al hire herte on him sche leide
And dede al holi what he wolde.
Bot after that, as it be scholde,
Fro thenne he goth toward Ytaile
Be Schipe, and there his arivaile
Hath take, and schop him forto ryde.
Bot sche, which mai noght longe abide
The hote peine of loves throwe,
Anon withinne a litel throwe
A lettre unto hir kniht hath write,
And dede him pleinly forto wite,
If he made eny tariinge,
To drecche of his ayeincomynge,
That sche ne mihte him fiele and se,
Sche scholde stonde in such degre
As whilom stod a Swan tofore,
Of that sche hadde hire make lore;
For sorwe a fethere into hire brain
Sche schof and hath hireselve slain;
As king Menander in a lay
The sothe hath founde, wher sche lay
Sprantlende with hire wynges tweie,
As sche which scholde thanne deie
For love of him which was hire make.
'And so schal I do for thi sake,'
This qweene seide, 'wel I wot.'
Lo, to Enee thus sche wrot
With many an other word of pleinte:
Bot he, which hadde hise thoghtes feinte
Towardes love and full of Slowthe,
His time lette, and that was rowthe:
For sche, which loveth him tofore,
Desireth evere more and more,
And whan sche sih him tarie so,
Hire herte was so full of wo,
That compleignende manyfold
Sche hath hire oghne tale told,
Unto hirself and thus sche spak:
'Ha, who fond evere such a lak
Of Slowthe in eny worthi kniht?
Now wot I wel my deth is diht
Thurgh him which scholde have be mi lif.'
Bot forto stinten al this strif,
Thus whan sche sih non other bote,
Riht evene unto hire herte rote
A naked swerd anon sche threste,
And thus sche gat hireselve reste
In remembrance of alle slowe.
Wherof, my Sone, thou miht knowe
How tariinge upon the nede
In loves cause is forto drede;
And that hath Dido sore aboght,
Whos deth schal evere be bethoght.
And overmore if I schal seche
In this matiere an other spieche,
In a Cronique I finde write
A tale which is good to wite.
At Troie whan king Ulixes
Upon the Siege among the pres
Of hem that worthi knihtes were
Abod long time stille there,
In thilke time a man mai se
How goodli that Penolope,
Which was to him his trewe wif,
Of his lachesce was pleintif;
Wherof to Troie sche him sende
Hire will be lettre, thus spekende:
'Mi worthi love and lord also,
It is and hath ben evere so,
That wher a womman is al one,
It makth a man in his persone
The more hardi forto wowe,
In hope that sche wolde bowe
To such thing as his wille were,
Whil that hire lord were elleswhere.
And of miself I telle this;
For it so longe passed is,
Sithe ferst than ye fro home wente,
That welnyh every man his wente
To there I am, whil ye ben oute,
Hath mad, and ech of hem aboute,
Which love can, my love secheth,
With gret preiere and me besecheth:
And some maken gret manace,
That if thei mihten come in place,
Wher that thei mihte here wille have,
Ther is nothing me scholde save,
That thei ne wolde werche thinges;
And some tellen me tidynges
That ye ben ded, and some sein
That certeinly ye ben besein
To love a newe and leve me.
Bot hou as evere that it be,
I thonke unto the goddes alle,
As yit for oght that is befalle
Mai noman do my chekes rede:
Bot natheles it is to drede,
That Lachesse in continuance
Fortune mihte such a chance,
Which noman after scholde amende.'
Lo, thus this ladi compleignende
A lettre unto hire lord hath write,
And preyde him that he wolde wite
And thenke hou that sche was al his,
And that he tarie noght in this,
Bot that he wolde his love aquite,
To hire ayeinward and noght wryte,
Bot come himself in alle haste,
That he non other paper waste;
So that he kepe and holde his trowthe
Withoute lette of eny Slowthe.
Unto hire lord and love liege
To Troie, wher the grete Siege
Was leid, this lettre was conveied.
And he, which wisdom hath pourveied
Of al that to reson belongeth,
With gentil herte it underfongeth:
And whan he hath it overrad,
In part he was riht inly glad,
And ek in part he was desesed:
Bot love his herte hath so thorghsesed
With pure ymaginacioun,
That for non occupacioun
Which he can take on other side,
He mai noght flitt his herte aside
Fro that his wif him hadde enformed;
Wherof he hath himself conformed
With al the wille of his corage
To schape and take the viage
Homward, what time that he mai:
So that him thenketh of a day
A thousand yer, til he mai se
The visage of Penolope,
Which he desireth most of alle.
And whan the time is so befalle
That Troie was destruid and brent,
He made non delaiement,
Bot goth him home in alle hihe,
Wher that he fond tofore his yhe
His worthi wif in good astat:
And thus was cessed the debat
Of love, and Slowthe was excused,
Which doth gret harm, where it is used,
And hindreth many a cause honeste.
For of the grete Clerc Grossteste
I rede how besy that he was
Upon clergie an Hed of bras
To forge, and make it forto telle
Of suche thinges as befelle.
And sevene yeres besinesse
He leyde, bot for the lachesse
Of half a Minut of an houre,
Fro ferst that he began laboure
He loste all that he hadde do.
And otherwhile it fareth so,
In loves cause who is slow,
That he withoute under the wow
Be nyhte stant fulofte acold,
Which mihte, if that he hadde wold
His time kept, have be withinne.
Bot Slowthe mai no profit winne,
Bot he mai singe in his karole
How Latewar cam to the Dole,
Wher he no good receive mihte.
And that was proved wel be nyhte
Whilom of the Maidenes fyve,
Whan thilke lord cam forto wyve:
For that here oyle was aweie
To lihte here lampes in his weie,
Here Slowthe broghte it so aboute,
Fro him that thei ben schet withoute.
Wherof, my Sone, be thou war,
Als ferforth as I telle dar.
For love moste ben awaited:
And if thou be noght wel affaited
In love to eschuie Slowthe,
Mi Sone, forto telle trowthe,
Thou miht noght of thiself ben able
To winne love or make it stable,
All thogh thou mihtest love achieve.
Mi fader, that I mai wel lieve.
Bot me was nevere assigned place,
Wher yit to geten eny grace,
Ne me was non such time apointed;
For thanne I wolde I were unjoynted
Of every lime that I have,
If I ne scholde kepe and save
Min houre bothe and ek my stede,
If my ladi it hadde bede.
Bot sche is otherwise avised
Than grante such a time assised;
And natheles of mi lachesse
Ther hath be no defalte I gesse
Of time lost, if that I mihte:
Bot yit hire liketh noght alyhte
Upon no lure which I caste;
For ay the more I crie faste,
The lasse hire liketh forto hiere.
So forto speke of this matiere,
I seche that I mai noght finde,
I haste and evere I am behinde,
And wot noght what it mai amounte.
Bot, fader, upon myn acompte,
Which ye be sett to examine
Of Schrifte after the discipline,
Sey what your beste conseil is.
Mi Sone, my conseil is this:
Hou so it stonde of time go,
Do forth thi besinesse so,
That no Lachesce in the be founde:
For Slowthe is mihti to confounde
The spied of every mannes werk.
For many a vice, as seith the clerk,
Ther hongen upon Slowthes lappe
Of suche as make a man mishappe,
To pleigne and telle of hadde I wist.
And therupon if that thee list
To knowe of Slowthes cause more,
In special yit overmore
Ther is a vice full grevable
To him which is therof coupable,
And stant of alle vertu bare,
Hierafter as I schal declare.
Touchende of Slowthe in his degre,
Ther is yit Pusillamite,
Which is to seie in this langage,
He that hath litel of corage
And dar no mannes werk beginne:
So mai he noght be resoun winne;
For who that noght dar undertake,
Be riht he schal no profit take.
Bot of this vice the nature
Dar nothing sette in aventure,
Him lacketh bothe word and dede,
Wherof he scholde his cause spede:
He woll no manhed understonde,
For evere he hath drede upon honde:
Al is peril that he schal seie,
Him thenkth the wolf is in the weie,
And of ymaginacioun
He makth his excusacioun
And feigneth cause of pure drede,
And evere he faileth ate nede,
Til al be spilt that he with deleth.
He hath the sor which noman heleth,
The which is cleped lack of herte;
Thogh every grace aboute him sterte,
He wol noght ones stere his fot;
So that be resoun lese he mot,
That wol noght auntre forto winne.
And so forth, Sone, if we beginne
To speke of love and his servise,
Ther ben truantz in such a wise,
That lacken herte, whan best were
To speke of love, and riht for fere
Thei wexen doumb and dar noght telle,
Withoute soun as doth the belle,
Which hath no claper forto chyme;
And riht so thei as for the tyme
Ben herteles withoute speche
Of love, and dar nothing beseche;
And thus thei lese and winne noght.
Forthi, my Sone, if thou art oght
Coupable as touchende of this Slowthe,
Schrif thee therof and tell me trowthe.
Mi fader, I am al beknowe
That I have ben on of tho slowe,
As forto telle in loves cas.
Min herte is yit and evere was,
As thogh the world scholde al tobreke,
So ferful, that I dar noght speke
Of what pourpos that I have nome,
Whan I toward mi ladi come,
Bot let it passe and overgo.
Mi Sone, do nomore so:
For after that a man poursuieth
To love, so fortune suieth,
Fulofte and yifth hire happi chance
To him which makth continuance
To preie love and to beseche;
As be ensample I schal thee teche.
I finde hou whilom ther was on,
Whos name was Pymaleon,
Which was a lusti man of yowthe:
The werkes of entaile he cowthe
Above alle othre men as tho;
And thurgh fortune it fell him so,
As he whom love schal travaile,
He made an ymage of entaile
Lich to a womman in semblance
Of feture and of contienance,
So fair yit nevere was figure.
Riht as a lyves creature
Sche semeth, for of yvor whyt
He hath hire wroght of such delit,
That sche was rody on the cheke
And red on bothe hire lippes eke;
Wherof that he himself beguileth.
For with a goodly lok sche smyleth,
So that thurgh pure impression
Of his ymaginacion
With al the herte of his corage
His love upon this faire ymage
He sette, and hire of love preide;
Bot sche no word ayeinward seide.
The longe day, what thing he dede,
This ymage in the same stede
Was evere bi, that ate mete
He wolde hire serve and preide hire ete,
And putte unto hire mowth the cuppe;
And whan the bord was taken uppe,
He hath hire into chambre nome,
And after, whan the nyht was come,
He leide hire in his bed al nakid.
He was forwept, he was forwakid,
He keste hire colde lippes ofte,
And wissheth that thei weren softe,
And ofte he rouneth in hire Ere,
And ofte his arm now hier now there
He leide, as he hir wolde embrace,
And evere among he axeth grace,
As thogh sche wiste what he mente:
And thus himself he gan tormente
With such desese of loves peine,
That noman mihte him more peine.
Bot how it were, of his penance
He made such continuance
Fro dai to nyht, and preith so longe,
That his preiere is underfonge,
Which Venus of hire grace herde;
Be nyhte and whan that he worst ferde,
And it lay in his nakede arm,
The colde ymage he fieleth warm
Of fleissh and bon and full of lif.
Lo, thus he wan a lusti wif,
Which obeissant was at his wille;
And if he wolde have holde him stille
And nothing spoke, he scholde have failed:
Bot for he hath his word travailed
And dorste speke, his love he spedde,
And hadde al that he wolde abedde.
For er thei wente thanne atwo,
A knave child betwen hem two
Thei gete, which was after hote
Paphus, of whom yit hath the note
A certein yle, which Paphos
Men clepe, and of his name it ros.
Be this ensample thou miht finde
That word mai worche above kinde.
Forthi, my Sone, if that thou spare
To speke, lost is al thi fare,
For Slowthe bringth in alle wo.
And over this to loke also,
The god of love is favorable
To hem that ben of love stable,
And many a wonder hath befalle:
Wherof to speke amonges alle,
If that thee list to taken hede,
Therof a solein tale I rede,
Which I schal telle in remembraunce
Upon the sort of loves chaunce.
The king Ligdus upon a strif
Spak unto Thelacuse his wif,
Which thanne was with childe grete;
He swor it scholde noght be lete,
That if sche have a dowhter bore,
That it ne scholde be forlore
And slain, wherof sche sory was.
So it befell upon this cas,
Whan sche delivered scholde be,
Isis be nyhte in privete,
Which of childinge is the goddesse,
Cam forto helpe in that destresse,
Til that this lady was al smal,
And hadde a dowhter forth withal;
Which the goddesse in alle weie
Bad kepe, and that thei scholden seie
It were a Sone: and thus Iphis
Thei namede him, and upon this
The fader was mad so to wene.
And thus in chambre with the qweene
This Iphis was forthdrawe tho,
And clothed and arraied so
Riht as a kinges Sone scholde.
Til after, as fortune it wolde,
Whan it was of a ten yer age,
Him was betake in mariage
A Duckes dowhter forto wedde,
Which Iante hihte, and ofte abedde
These children leien, sche and sche,
Whiche of on age bothe be.
So that withinne time of yeeres,
Togedre as thei ben pleiefieres,
Liggende abedde upon a nyht,
Nature, which doth every wiht
Upon hire lawe forto muse,
Constreigneth hem, so that thei use
Thing which to hem was al unknowe;
Wherof Cupide thilke throwe
Tok pite for the grete love,
And let do sette kinde above,
So that hir lawe mai ben used,
And thei upon here lust excused.
For love hateth nothing more
Than thing which stant ayein the lore
Of that nature in kinde hath sett:
Forthi Cupide hath so besett
His grace upon this aventure,
That he acordant to nature,
Whan that he syh the time best,
That ech of hem hath other kest,
Transformeth Iphe into a man,
Wherof the kinde love he wan
Of lusti yonge Iante his wif;
And tho thei ladde a merie lif,
Which was to kinde non offence.
And thus to take an evidence,
It semeth love is welwillende
To hem that ben continuende
With besy herte to poursuie
Thing which that is to love due.
Wherof, my Sone, in this matiere
Thou miht ensample taken hiere,
That with thi grete besinesse
Thou miht atteigne the richesse
Of love, if that ther be no Slowthe.
I dar wel seie be mi trowthe,
Als fer as I my witt can seche,
Mi fader, as for lacke of speche,
Bot so as I me schrof tofore,
Ther is non other time lore,
Wherof ther mihte ben obstacle
To lette love of his miracle,
Which I beseche day and nyht.
Bot, fader, so as it is riht
In forme of schrifte to beknowe
What thing belongeth to the slowe,
Your faderhode I wolde preie,
If ther be forthere eny weie
Touchende unto this ilke vice.
Mi Sone, ye, of this office
Ther serveth on in special,
Which lost hath his memorial,
So that he can no wit withholde
In thing which he to kepe is holde,
Wherof fulofte himself he grieveth:
And who that most upon him lieveth,
Whan that hise wittes ben so weyved,
He mai full lihtly be deceived.
To serve Accidie in his office,
Ther is of Slowthe an other vice,
Which cleped is Foryetelnesse;
That noght mai in his herte impresse
Of vertu which reson hath sett,
So clene his wittes he foryet.
For in the tellinge of his tale
Nomore his herte thanne his male
Hath remembrance of thilke forme,
Wherof he scholde his wit enforme
As thanne, and yit ne wot he why.
Thus is his pourpos noght forthi
Forlore of that he wolde bidde,
And skarsly if he seith the thridde
To love of that he hadde ment:
Thus many a lovere hath be schent.
Tell on therfore, hast thou be oon
Of hem that Slowthe hath so begon?
Ye, fader, ofte it hath be so,
That whanne I am mi ladi fro
And thenke untoward hire drawe,
Than cast I many a newe lawe
And al the world torne up so doun,
And so recorde I mi lecoun
And wryte in my memorial
What I to hire telle schal,
Riht al the matiere of mi tale:
Bot al nys worth a note schale;
For whanne I come ther sche is,
I have it al foryete ywiss;
Of that I thoghte forto telle
I can noght thanne unethes spelle
That I wende altherbest have rad,
So sore I am of hire adrad.
For as a man that sodeinli
A gost behelde, so fare I;
So that for feere I can noght gete
Mi witt, bot I miself foryete,
That I wot nevere what I am,
Ne whider I schal, ne whenne I cam,
Bot muse as he that were amased.
Lich to the bok in which is rased
The lettre, and mai nothing be rad,
So ben my wittes overlad,
That what as evere I thoghte have spoken,
It is out fro myn herte stoken,
And stonde, as who seith, doumb and def,
That all nys worth an yvy lef,
Of that I wende wel have seid.
And ate laste I make abreid,
Caste up myn hed and loke aboute,
Riht as a man that were in doute
And wot noght wher he schal become.
Thus am I ofte al overcome,
Ther as I wende best to stonde:
Bot after, whanne I understonde,
And am in other place al one,
I make many a wofull mone
Unto miself, and speke so:
'Ha fol, wher was thin herte tho,
Whan thou thi worthi ladi syhe?
Were thou afered of hire yhe?
For of hire hand ther is no drede:
So wel I knowe hir wommanhede,
That in hire is nomore oultrage
Than in a child of thre yeer age.
Whi hast thou drede of so good on,
Whom alle vertu hath begon,
That in hire is no violence
Bot goodlihiede and innocence
Withouten spot of eny blame?
Ha, nyce herte, fy for schame]
Ha, couard herte of love unlered,
Wherof art thou so sore afered,
That thou thi tunge soffrest frese,
And wolt thi goode wordes lese,
Whan thou hast founde time and space?
How scholdest thou deserve grace,
Whan thou thiself darst axe non,
Bot al thou hast foryete anon?'
And thus despute I loves lore,
Bot help ne finde I noght the more,
Bot stomble upon myn oghne treine
And make an ekinge of my peine.
For evere whan I thenke among
How al is on miself along,
I seie, 'O fol of alle foles,
Thou farst as he betwen tuo stoles
That wolde sitte and goth to grounde.
It was ne nevere schal be founde,
Betwen foryetelnesse and drede
That man scholde any cause spede.'
And thus, myn holi fader diere,
Toward miself, as ye mai hiere,
I pleigne of my foryetelnesse;
Bot elles al the besinesse,
That mai be take of mannes thoght,
Min herte takth, and is thorghsoght
To thenken evere upon that swete
Withoute Slowthe, I you behete.
For what so falle, or wel or wo,
That thoght foryete I neveremo,
Wher so I lawhe or so I loure:
Noght half the Minut of an houre
Ne mihte I lete out of my mende,
Bot if I thoghte upon that hende.
Therof me schal no Slowthe lette,
Til deth out of this world me fette,
Althogh I hadde on such a Ring,
As Moises thurgh his enchanting
Som time in Ethiope made,
Whan that he Tharbis weddid hade.
Which Ring bar of Oblivion
The name, and that was be resoun
That where it on a finger sat,
Anon his love he so foryat,
As thogh he hadde it nevere knowe:
And so it fell that ilke throwe,
Whan Tharbis hadde it on hire hond,
No knowlechinge of him sche fond,
Bot al was clene out of memoire,
As men mai rede in his histoire;
And thus he wente quit away,
That nevere after that ilke day
Sche thoghte that ther was such on;
Al was foryete and overgon.
Bot in good feith so mai noght I:
For sche is evere faste by,
So nyh that sche myn herte toucheth,
That for nothing that Slowthe voucheth
I mai foryete hire, lief ne loth;
For overal, where as sche goth,
Min herte folwith hire aboute.
Thus mai I seie withoute doute,
For bet, for wers, for oght, for noght,
Sche passeth nevere fro my thoght;
Bot whanne I am ther as sche is,
Min herte, as I you saide er this,
Som time of hire is sore adrad,
And som time it is overglad,
Al out of reule and out of space.
For whan I se hir goodli face
And thenke upon hire hihe pris,
As thogh I were in Paradis,
I am so ravisht of the syhte,
That speke unto hire I ne myhte
As for the time, thogh I wolde:
For I ne mai my wit unfolde
To finde o word of that I mene,
Bot al it is foryete clene;
And thogh I stonde there a myle,
Al is foryete for the while,
A tunge I have and wordes none.
And thus I stonde and thenke al one
Of thing that helpeth ofte noght;
Bot what I hadde afore thoght
To speke, whanne I come there,
It is foryete, as noght ne were,
And stonde amased and assoted,
That of nothing which I have noted
I can noght thanne a note singe,
Bot al is out of knowlechinge:
Thus, what for joie and what for drede,
Al is foryeten ate nede.
So that, mi fader, of this Slowthe
I have you said the pleine trowthe;
Ye mai it as you list redresce:
For thus stant my foryetelnesse
And ek my pusillamite.
Sey now forth what you list to me,
For I wol only do be you.
Mi Sone, I have wel herd how thou
Hast seid, and that thou most amende:
For love his grace wol noght sende
To that man which dar axe non.
For this we knowen everichon,
A mannes thoght withoute speche
God wot, and yit that men beseche
His will is; for withoute bedes
He doth his grace in fewe stedes:
And what man that foryet himselve,
Among a thousand be noght tuelve,
That wol him take in remembraunce,
Bot lete him falle and take his chaunce.
Forthi pull up a besi herte,
Mi Sone, and let nothing asterte
Of love fro thi besinesse:
For touchinge of foryetelnesse,
Which many a love hath set behinde,
A tale of gret ensample I finde,
Wherof it is pite to wite
In the manere as it is write.
King Demephon, whan he be Schipe
To Troieward with felaschipe
Sailende goth, upon his weie
It hapneth him at Rodopeie,
As Eolus him hadde blowe,
To londe, and rested for a throwe.
And fell that ilke time thus,
The dowhter of Ligurgius,
Which qweene was of the contre,
Was sojournende in that Cite
Withinne a Castell nyh the stronde,
Wher Demephon cam up to londe.
Phillis sche hihte, and of yong age
And of stature and of visage
Sche hadde al that hire best besemeth.
Of Demephon riht wel hire qwemeth,
Whan he was come, and made him chiere;
And he, that was of his manere
A lusti knyht, ne myhte asterte
That he ne sette on hire his herte;
So that withinne a day or tuo
He thoghte, how evere that it go,
He wolde assaie the fortune,
And gan his herte to commune
With goodly wordes in hire Ere;
And forto put hire out of fere,
He swor and hath his trowthe pliht
To be for evere hire oghne knyht.
And thus with hire he stille abod,
Ther while his Schip on Anker rod,
And hadde ynowh of time and space
To speke of love and seche grace.
This ladi herde al that he seide,
And hou he swor and hou he preide,
Which was as an enchantement
To hire, that was innocent:
As thogh it were trowthe and feith,
Sche lieveth al that evere he seith,
And as hire infortune scholde,
Sche granteth him al that he wolde.
Thus was he for the time in joie,
Til that he scholde go to Troie;
Bot tho sche made mochel sorwe,
And he his trowthe leith to borwe
To come, if that he live may,
Ayein withinne a Monthe day,
And therupon thei kisten bothe:
Bot were hem lieve or were hem lothe,
To Schipe he goth and forth he wente
To Troie, as was his ferste entente.
The daies gon, the Monthe passeth,
Hire love encresceth and his lasseth,
For him sche lefte slep and mete,
And he his time hath al foryete;
So that this wofull yonge qweene,
Which wot noght what it mihte meene,
A lettre sende and preide him come,
And seith how sche is overcome
With strengthe of love in such a wise,
That sche noght longe mai suffise
To liven out of his presence;
And putte upon his conscience
The trowthe which he hath behote,
Wherof sche loveth him so hote,
Sche seith, that if he lengere lette
Of such a day as sche him sette,
Sche scholde sterven in his Slowthe,
Which were a schame unto his trowthe.
This lettre is forth upon hire sonde,
Wherof somdiel confort on honde
Sche tok, as she that wolde abide
And waite upon that ilke tyde
Which sche hath in hire lettre write.
Bot now is pite forto wite,
As he dede erst, so he foryat
His time eftsone and oversat.
Bot sche, which mihte noght do so,
The tyde awayteth everemo,
And caste hire yhe upon the See:
Somtime nay, somtime yee,
Somtime he cam, somtime noght,
Thus sche desputeth in hire thoght
And wot noght what sche thenke mai;
Bot fastende al the longe day
Sche was into the derke nyht,
And tho sche hath do set up lyht
In a lanterne on hih alofte
Upon a Tour, wher sche goth ofte,
In hope that in his cominge
He scholde se the liht brenninge,
Wherof he mihte his weies rihte
To come wher sche was be nyhte.
Bot al for noght, sche was deceived,
For Venus hath hire hope weyved,
And schewede hire upon the Sky
How that the day was faste by,
So that withinne a litel throwe
The daies lyht sche mihte knowe.
Tho sche behield the See at large;
And whan sche sih ther was no barge
Ne Schip, als ferr as sche may kenne,
Doun fro the Tour sche gan to renne
Into an Herber all hire one,
Wher many a wonder woful mone
Sche made, that no lif it wiste,
As sche which all hire joie miste,
That now sche swouneth, now sche pleigneth,
And al hire face sche desteigneth
With teres, whiche, as of a welle
The stremes, from hire yhen felle;
So as sche mihte and evere in on
Sche clepede upon Demephon,
And seide, 'Helas, thou slowe wiht,
Wher was ther evere such a knyht,
That so thurgh his ungentilesce
Of Slowthe and of foryetelnesse
Ayein his trowthe brak his stevene?'
And tho hire yhe up to the hevene
Sche caste, and seide, 'O thou unkinde,
Hier schalt thou thurgh thi Slowthe finde,
If that thee list to come and se,
A ladi ded for love of thee,
So as I schal myselve spille;
Whom, if it hadde be thi wille,
Thou mihtest save wel ynowh.'
With that upon a grene bowh
A Ceinte of Selk, which sche ther hadde,
Sche knette, and so hireself sche ladde,
That sche aboute hire whyte swere
It dede, and hyng hirselven there.
Wherof the goddes were amoeved,
And Demephon was so reproeved,
That of the goddes providence
Was schape such an evidence
Evere afterward ayein the slowe,
That Phillis in the same throwe
Was schape into a Notetre,
That alle men it mihte se,
And after Phillis Philliberd
This tre was cleped in the yerd,
And yit for Demephon to schame
Into this dai it berth the name.
This wofull chance how that it ferde
Anon as Demephon it herde,
And every man it hadde in speche,
His sorwe was noght tho to seche;
He gan his Slowthe forto banne,
Bot it was al to late thanne.
Lo thus, my Sone, miht thou wite
Ayein this vice how it is write;
For noman mai the harmes gesse,
That fallen thurgh foryetelnesse,
Wherof that I thi schrifte have herd.
Bot yit of Slowthe hou it hath ferd
In other wise I thenke oppose,
If thou have gult, as I suppose.
Fulfild of Slowthes essamplaire
Ther is yit on, his Secretaire,
And he is cleped Negligence:
Which wol noght loke his evidence,
Wherof he mai be war tofore;
Bot whanne he hath his cause lore,
Thanne is he wys after the hond:
Whanne helpe may no maner bond,
Thanne ate ferste wolde he binde:
Thus everemore he stant behinde.
Whanne he the thing mai noght amende,
Thanne is he war, and seith at ende,
'Ha, wolde god I hadde knowe]'
Wherof bejaped with a mowe
He goth, for whan the grete Stiede
Is stole, thanne he taketh hiede,
And makth the stable dore fast:
Thus evere he pleith an aftercast
Of al that he schal seie or do.
He hath a manere eke also,
Him list noght lerne to be wys,
For he set of no vertu pris
Bot as him liketh for the while;
So fieleth he fulofte guile,
Whan that he weneth siker stonde.
And thus thou miht wel understonde,
Mi Sone, if thou art such in love,
Thou miht noght come at thin above
Of that thou woldest wel achieve.
Mi holi fader, as I lieve,
I mai wel with sauf conscience
Excuse me of necgligence
Towardes love in alle wise:
For thogh I be non of the wise,
I am so trewly amerous,
That I am evere curious
Of hem that conne best enforme
To knowe and witen al the forme,
What falleth unto loves craft.
Bot yit ne fond I noght the haft,
Which mihte unto that bladd acorde;
For nevere herde I man recorde
What thing it is that myhte availe
To winne love withoute faile.
Yit so fer cowthe I nevere finde
Man that be resoun ne be kinde
Me cowthe teche such an art,
That he ne failede of a part;
And as toward myn oghne wit,
Controeve cowthe I nevere yit
To finden eny sikernesse,
That me myhte outher more or lesse
Of love make forto spede:
For lieveth wel withoute drede,
If that ther were such a weie,
As certeinliche as I schal deie
I hadde it lerned longe ago.
Bot I wot wel ther is non so:
And natheles it may wel be,
I am so rude in my degree
And ek mi wittes ben so dulle,
That I ne mai noght to the fulle
Atteigne to so hih a lore.
Bot this I dar seie overmore,
Althogh mi wit ne be noght strong,
It is noght on mi will along,
For that is besi nyht and day
To lerne al that he lerne may,
How that I mihte love winne:
Bot yit I am as to beginne
Of that I wolde make an ende,
And for I not how it schal wende,
That is to me mi moste sorwe.
Bot I dar take god to borwe,
As after min entendement,
Non other wise necgligent
Thanne I yow seie have I noght be:
Forthi per seinte charite
Tell me, mi fader, what you semeth.
In good feith, Sone, wel me qwemeth,
That thou thiself hast thus aquit
Toward this vice, in which no wit
Abide mai, for in an houre
He lest al that he mai laboure
The longe yer, so that men sein,
What evere he doth it is in vein.
For thurgh the Slowthe of Negligence
Ther was yit nevere such science
Ne vertu, which was bodely,
That nys destruid and lost therby.
Ensample that it hath be so
In boke I finde write also.
Phebus, which is the Sonne hote,
That schyneth upon Erthe hote
And causeth every lyves helthe,
He hadde a Sone in al his welthe,
Which Pheton hihte, and he desireth
And with his Moder he conspireth,
The which was cleped Clemenee,
For help and conseil, so that he
His fader carte lede myhte
Upon the faire daies brihte.
And for this thing thei bothe preide
Unto the fader, and he seide
He wolde wel, bot forth withal
Thre pointz he bad in special
Unto his Sone in alle wise,
That he him scholde wel avise
And take it as be weie of lore.
Ferst was, that he his hors to sore
Ne prike, and over that he tolde
That he the renes faste holde;
And also that he be riht war
In what manere he lede his charr,
That he mistake noght his gate,
Bot up avisement algate
He scholde bere a siker yhe,
That he to lowe ne to hyhe
His carte dryve at eny throwe,
Wherof that he mihte overthrowe.
And thus be Phebus ordinance
Tok Pheton into governance
The Sonnes carte, which he ladde:
Bot he such veine gloire hadde
Of that he was set upon hyh,
That he his oghne astat ne syh
Thurgh negligence and tok non hiede;
So mihte he wel noght longe spede.
For he the hors withoute lawe
The carte let aboute drawe
Wher as hem liketh wantounly,
That ate laste sodeinly,
For he no reson wolde knowe,
This fyri carte he drof to lowe,
And fyreth al the world aboute;
Wherof thei weren alle in doubte,
And to the god for helpe criden
Of suche unhappes as betyden.
Phebus, which syh the necgligence,
How Pheton ayein his defence
His charr hath drive out of the weie,
Ordeigneth that he fell aweie
Out of the carte into a flod
And dreynte. Lo now, hou it stod
With him that was so necgligent,
That fro the hyhe firmament,
For that he wolde go to lowe,
He was anon doun overthrowe.
In hih astat it is a vice
To go to lowe, and in service
It grieveth forto go to hye,
Wherof a tale in poesie
I finde, how whilom Dedalus,
Which hadde a Sone, and Icharus
He hihte, and thogh hem thoghte lothe,
In such prison thei weren bothe
With Minotaurus, that aboute
Thei mihten nawher wenden oute;
So thei begonne forto schape
How thei the prison mihte ascape.
This Dedalus, which fro his yowthe
Was tawht and manye craftes cowthe,
Of fetheres and of othre thinges
Hath mad to fle diverse wynges
For him and for his Sone also;
To whom he yaf in charge tho
And bad him thenke therupon,
How that his wynges ben set on
With wex, and if he toke his flyhte
To hyhe, al sodeinliche he mihte
Make it to melte with the Sonne.
And thus thei have her flyht begonne
Out of the prison faire and softe;
And whan thei weren bothe alofte,
This Icharus began to monte,
And of the conseil non accompte
He sette, which his fader tawhte,
Til that the Sonne his wynges cawhte,
Wherof it malt, and fro the heihte
Withouten help of eny sleihte
He fell to his destruccion.
And lich to that condicion
Ther fallen ofte times fele
For lacke of governance in wele,
Als wel in love as other weie.
Now goode fader, I you preie,
If ther be more in the matiere
Of Slowthe, that I mihte it hiere.
Mi Sone, and for thi diligence,
Which every mannes conscience
Be resoun scholde reule and kepe,
If that thee list to taken kepe,
I wol thee telle, aboven alle
In whom no vertu mai befalle,
Which yifth unto the vices reste
And is of slowe the sloweste.
Among these othre of Slowthes kinde,
Which alle labour set behinde,
And hateth alle besinesse,
Ther is yit on, which Ydelnesse
Is cleped, and is the Norrice
In mannes kinde of every vice,
Which secheth eases manyfold.
In Wynter doth he noght for cold,
In Somer mai he noght for hete;
So whether that he frese or swete,
Or he be inne, or he be oute,
He wol ben ydel al aboute,
Bot if he pleie oght ate Dees.
For who as evere take fees
And thenkth worschipe to deserve,
Ther is no lord whom he wol serve,
As forto duelle in his servise,
Bot if it were in such a wise,
Of that he seth per aventure
That be lordschipe and coverture
He mai the more stonde stille,
And use his ydelnesse at wille.
For he ne wol no travail take
To ryde for his ladi sake,
Bot liveth al upon his wisshes;
And as a cat wolde ete fisshes
Withoute wetinge of his cles,
So wolde he do, bot natheles
He faileth ofte of that he wolde.
Mi Sone, if thou of such a molde
Art mad, now tell me plein thi schrifte.
Nay, fader, god I yive a yifte.
That toward love, as be mi wit,
Al ydel was I nevere yit,
Ne nevere schal, whil I mai go.
Now, Sone, tell me thanne so,
What hast thou don of besischipe
To love and to the ladischipe
Of hire which thi ladi is?
Mi fader, evere yit er this
In every place, in every stede,
What so mi lady hath me bede,
With al myn herte obedient
I have therto be diligent.
And if so is sche bidde noght,
What thing that thanne into my thoght
Comth ferst of that I mai suffise,
I bowe and profre my servise,
Somtime in chambre, somtime in halle,
Riht as I se the times falle.
And whan sche goth to hiere masse,
That time schal noght overpasse,
That I naproche hir ladihede,
In aunter if I mai hire lede
Unto the chapelle and ayein.
Thanne is noght al mi weie in vein,
Somdiel I mai the betre fare,
Whan I, that mai noght fiele hir bare,
Mai lede hire clothed in myn arm:
Bot afterward it doth me harm
Of pure ymaginacioun;
For thanne this collacioun
I make unto miselven ofte,
And seie, 'Ha lord, hou sche is softe,
How sche is round, hou sche is smal]
Now wolde god I hadde hire al
Withoute danger at mi wille]'
And thanne I sike and sitte stille,
Of that I se mi besi thoght
Is torned ydel into noght.
Bot for al that lete I ne mai,
Whanne I se time an other dai,
That I ne do my besinesse
Unto mi ladi worthinesse.
For I therto mi wit afaite
To se the times and awaite
What is to done and what to leve:
And so, whan time is, be hir leve,
What thing sche bit me don, I do,
And wher sche bidt me gon, I go,
And whanne hir list to clepe, I come.
Thus hath sche fulliche overcome
Min ydelnesse til I sterve,
So that I mot hire nedes serve,
For as men sein, nede hath no lawe.
Thus mot I nedly to hire drawe,
I serve, I bowe, I loke, I loute,
Min yhe folweth hire aboute,
What so sche wole so wol I,
Whan sche wol sitte, I knele by,
And whan sche stant, than wol I stonde:
Bot whan sche takth hir werk on honde
Of wevinge or enbrouderie,
Than can I noght bot muse and prie
Upon hir fingres longe and smale,
And now I thenke, and now I tale,
And now I singe, and now I sike,
And thus mi contienance I pike.
And if it falle, as for a time
Hir liketh noght abide bime,
Bot besien hire on other thinges,
Than make I othre tariinges
To dreche forth the longe dai,
For me is loth departe away.
And thanne I am so simple of port,
That forto feigne som desport
I pleie with hire litel hound
Now on the bedd, now on the ground,
Now with hir briddes in the cage;
For ther is non so litel page,
Ne yit so simple a chamberere,
That I ne make hem alle chere,
Al for thei scholde speke wel:
Thus mow ye sen mi besi whiel,
That goth noght ydeliche aboute.
And if hir list to riden oute
On pelrinage or other stede,
I come, thogh I be noght bede,
And take hire in min arm alofte
And sette hire in hire sadel softe,
And so forth lede hire be the bridel,
For that I wolde noght ben ydel.
And if hire list to ride in Char,
And thanne I mai therof be war,
Anon I schape me to ryde
Riht evene be the Chares side;
And as I mai, I speke among,
And otherwhile I singe a song,
Which Ovide in his bokes made,
And seide, 'O whiche sorwes glade,
O which wofull prosperite
Belongeth to the proprete
Of love, who so wole him serve]
And yit therfro mai noman swerve,
That he ne mot his lawe obeie.'
And thus I ryde forth mi weie,
And am riht besi overal
With herte and with mi body al,
As I have said you hier tofore.
My goode fader, tell therfore,
Of Ydelnesse if I have gilt.
Mi Sone, bot thou telle wilt
Oght elles than I mai now hiere,
Thou schalt have no penance hiere.
And natheles a man mai se,
How now adayes that ther be
Ful manye of suche hertes slowe,
That wol noght besien hem to knowe
What thing love is, til ate laste,
That he with strengthe hem overcaste,
That malgre hem thei mote obeie
And don al ydelschipe aweie,
To serve wel and besiliche.
Bot, Sone, thou art non of swiche,
For love schal the wel excuse:
Bot otherwise, if thou refuse
To love, thou miht so per cas
Ben ydel, as somtime was
A kinges dowhter unavised,
Til that Cupide hire hath chastised:
Wherof thou schalt a tale hiere
Acordant unto this matiere.
Of Armenye, I rede thus,
Ther was a king, which Herupus
Was hote, and he a lusti Maide
To dowhter hadde, and as men saide
Hire name was Rosiphelee;
Which tho was of gret renomee,
For sche was bothe wys and fair
And scholde ben hire fader hair.
Bot sche hadde o defalte of Slowthe
Towardes love, and that was rowthe;
For so wel cowde noman seie,
Which mihte sette hire in the weie
Of loves occupacion
Thurgh non ymaginacion;
That scole wolde sche noght knowe.
And thus sche was on of the slowe
As of such hertes besinesse,
Til whanne Venus the goddesse,
Which loves court hath forto reule,
Hath broght hire into betre reule,
Forth with Cupide and with his miht:
For thei merveille how such a wiht,
Which tho was in hir lusti age,
Desireth nother Mariage
Ne yit the love of paramours,
Which evere hath be the comun cours
Amonges hem that lusti were.
So was it schewed after there:
For he that hihe hertes loweth
With fyri Dartes whiche he throweth,
Cupide, which of love is godd,
In chastisinge hath mad a rodd
To dryve awei hir wantounesse;
So that withinne a while, I gesse,
Sche hadde on such a chance sporned,
That al hire mod was overtorned,
Which ferst sche hadde of slow manere:
For thus it fell, as thou schalt hiere.
Whan come was the Monthe of Maii,
Sche wolde walke upon a dai,
And that was er the Sonne Ariste;
Of wommen bot a fewe it wiste,
And forth sche wente prively
Unto the Park was faste by,
Al softe walkende on the gras,
Til sche cam ther the Launde was,
Thurgh which ther ran a gret rivere.
It thoghte hir fair, and seide, 'Here
I wole abide under the schawe':
And bad hire wommen to withdrawe,
And ther sche stod al one stille,
To thenke what was in hir wille.
Sche sih the swote floures springe,
Sche herde glade foules singe,
Sche sih the bestes in her kinde,
The buck, the do, the hert, the hinde,
The madle go with the femele;
And so began ther a querele
Betwen love and hir oghne herte,
Fro which sche couthe noght asterte.
And as sche caste hire yhe aboute,
Sche syh clad in o suite a route
Of ladis, wher thei comen ryde
Along under the wodes syde:
On faire amblende hors thei sete,
That were al whyte, fatte and grete,
And everichon thei ride on side.
The Sadles were of such a Pride,
With Perle and gold so wel begon,
So riche syh sche nevere non;
In kertles and in Copes riche
Thei weren clothed, alle liche,
Departed evene of whyt and blew;
With alle lustes that sche knew
Thei were enbrouded overal.
Here bodies weren long and smal,
The beaute faye upon her face
Non erthly thing it may desface;
Corones on here hed thei beere,
As ech of hem a qweene weere,
That al the gold of Cresus halle
The leste coronal of alle
Ne mihte have boght after the worth:
Thus come thei ridende forth.
The kinges dowhter, which this syh,
For pure abaissht drowh hire adryh
And hield hire clos under the bowh,
And let hem passen stille ynowh;
For as hire thoghte in hire avis,
To hem that were of such a pris
Sche was noght worthi axen there,
Fro when they come or what thei were:
Bot levere than this worldes good
Sche wolde have wist hou that it stod,
And putte hire hed alitel oute;
And as sche lokede hire aboute,
Sche syh comende under the linde
A womman up an hors behinde.
The hors on which sche rod was blak,
Al lene and galled on the back,
And haltede, as he were encluyed,
Wherof the womman was annuied;
Thus was the hors in sori plit,
Bot for al that a sterre whit
Amiddes in the front he hadde.
Hir Sadel ek was wonder badde,
In which the wofull womman sat,
And natheles ther was with that
A riche bridel for the nones
Of gold and preciouse Stones.
Hire cote was somdiel totore;
Aboute hir middel twenty score
Of horse haltres and wel mo
Ther hyngen ate time tho.
Thus whan sche cam the ladi nyh,
Than tok sche betre hiede and syh
This womman fair was of visage,
Freyssh, lusti, yong and of tendre age;
And so this ladi, ther sche stod,
Bethoghte hire wel and understod
That this, which com ridende tho,
Tidinges couthe telle of tho,
Which as sche sih tofore ryde,
And putte hir forth and preide abide,
And seide, 'Ha, Suster, let me hiere,
What ben thei, that now riden hiere,
And ben so richeliche arraied?'
This womman, which com so esmaied,
Ansuerde with ful softe speche,
And seith, 'Ma Dame, I schal you teche.
These ar of tho that whilom were
Servantz to love, and trowthe beere,
Ther as thei hadde here herte set.
Fare wel, for I mai noght be let:
Ma Dame, I go to mi servise,
So moste I haste in alle wise;
Forthi, ma Dame, yif me leve,
I mai noght longe with you leve.'
'Ha, goode Soster, yit I preie,
Tell me whi ye ben so beseie
And with these haltres thus begon.'
'Ma Dame, whilom I was on
That to mi fader hadde a king;
Bot I was slow, and for no thing
Me liste noght to love obeie,
And that I now ful sore abeie.
For I whilom no love hadde,
Min hors is now so fieble and badde,
And al totore is myn arai,
And every yeer this freisshe Maii
These lusti ladis ryde aboute,
And I mot nedes suie here route
In this manere as ye now se,
And trusse here haltres forth with me,
And am bot as here horse knave.
Non other office I ne have,
Hem thenkth I am worthi nomore,
For I was slow in loves lore,
Whan I was able forto lere,
And wolde noght the tales hiere
Of hem that couthen love teche.'
'Now tell me thanne, I you beseche,
Wherof that riche bridel serveth.'
With that hire chere awei sche swerveth,
And gan to wepe, and thus sche tolde:
'This bridel, which ye nou beholde
So riche upon myn horse hed,-
Ma Dame, afore, er I was ded,
Whan I was in mi lusti lif,
Ther fel into myn herte a strif
Of love, which me overcom,
So that therafter hiede I nom
And thoghte I wolde love a kniht:
That laste wel a fourtenyht,
For it no lengere mihte laste,
So nyh my lif was ate laste.
Bot now, allas, to late war
That I ne hadde him loved ar:
For deth cam so in haste bime,
Er I therto hadde eny time,
That it ne mihte ben achieved.
Bot for al that I am relieved,
Of that mi will was good therto,
That love soffreth it be so
That I schal swiche a bridel were.
Now have ye herd al myn ansuere:
To godd, ma Dame, I you betake,
And warneth alle for mi sake,
Of love that thei ben noght ydel,
And bidd hem thenke upon mi brydel.'
And with that word al sodeinly
Sche passeth, as it were a Sky,
Al clene out of this ladi sihte:
And tho for fere hire herte afflihte,
And seide to hirself, 'Helas]
I am riht in the same cas.
Bot if I live after this day,
I schal amende it, if I may.'
And thus homward this lady wente,
And changede al hire ferste entente,
Withinne hire herte and gan to swere
That sche none haltres wolde bere.
Lo, Sone, hier miht thou taken hiede,
How ydelnesse is forto drede,
Namliche of love, as I have write.
For thou miht understonde and wite,
Among the gentil nacion
Love is an occupacion,
Which forto kepe hise lustes save
Scholde every gentil herte have:
For as the ladi was chastised,
Riht so the knyht mai ben avised,
Which ydel is and wol noght serve
To love, he mai per cas deserve
A grettere peine than sche hadde,
Whan sche aboute with hire ladde
The horse haltres; and forthi
Good is to be wel war therbi.
Bot forto loke aboven alle,
These Maidens, hou so that it falle,
Thei scholden take ensample of this
Which I have told, for soth it is.
Mi ladi Venus, whom I serve,
What womman wole hire thonk deserve,
Sche mai noght thilke love eschuie
Of paramours, bot sche mot suie
Cupides lawe; and natheles
Men sen such love sielde in pes,
That it nys evere upon aspie
Of janglinge and of fals Envie,
Fulofte medlid with disese:
Bot thilke love is wel at ese,
Which set is upon mariage;
For that dar schewen the visage
In alle places openly.
A gret mervaile it is forthi,
How that a Maiden wolde lette,
That sche hir time ne besette
To haste unto that ilke feste,
Wherof the love is al honeste.
Men mai recovere lost of good,
Bot so wys man yit nevere stod,
Which mai recovere time lore:
So mai a Maiden wel therfore
Ensample take, of that sche strangeth
Hir love, and longe er that sche changeth
Hir herte upon hir lustes greene
To mariage, as it is seene.
For thus a yer or tuo or thre
Sche lest, er that sche wedded be,
Whyl sche the charge myhte bere
Of children, whiche the world forbere
Ne mai, bot if it scholde faile.
Bot what Maiden hire esposaile
Wol tarie, whan sche take mai,
Sche schal per chance an other dai
Be let, whan that hire lievest were.
Wherof a tale unto hire Ere,
Which is coupable upon this dede,
I thenke telle of that I rede.
Among the Jewes, as men tolde,
Ther was whilom be daies olde
A noble Duck, which Jepte hihte.
And fell, he scholde go to fyhte
Ayein Amon the cruel king:
And forto speke upon this thing,
Withinne his herte he made avou
To god and seide, 'Ha lord, if thou
Wolt grante unto thi man victoire,
I schal in tokne of thi memoire
The ferste lif that I mai se,
Of man or womman wher it be,
Anon as I come hom ayein,
To thee, which art god sovereign,
Slen in thi name and sacrifie.'
And thus with his chivalerie
He goth him forth, wher that he scholde,
And wan al that he winne wolde
And overcam his fomen alle.
Mai noman lette that schal falle.
This Duc a lusti dowhter hadde,
And fame, which the wordes spradde,
Hath broght unto this ladi Ere
How that hire fader hath do there.
Sche waiteth upon his cominge
With dansinge and with carolinge,
As sche that wolde be tofore
Al othre, and so sche was therfore
In Masphat at hir fader gate
The ferste; and whan he com therate,
And sih his douhter, he tobreide
Hise clothes and wepende he seide:
'O mihti god among ous hiere,
Nou wot I that in no manere
This worldes joie mai be plein.
I hadde al that I coude sein
Ayein mi fomen be thi grace,
So whan I cam toward this place
Ther was non gladdere man than I:
But now, mi lord, al sodeinli
Mi joie is torned into sorwe,
For I mi dowhter schal tomorwe
Tohewe and brenne in thi servise
To loenge of thi sacrifise
Thurgh min avou, so as it is.'
The Maiden, whan sche wiste of this,
And sih the sorwe hir fader made,
So as sche mai with wordes glade
Conforteth him, and bad him holde
The covenant which he is holde
Towardes god, as he behihte.
Bot natheles hire herte aflihte
Of that sche sih hire deth comende;
And thanne unto the ground knelende
Tofore hir fader sche is falle,
And seith, so as it is befalle
Upon this point that sche schal deie,
Of o thing ferst sche wolde him preie,
That fourty daies of respit
He wolde hir grante upon this plit,
That sche the whyle mai bewepe
Hir maidenhod, which sche to kepe
So longe hath had and noght beset;
Wherof her lusti youthe is let,
That sche no children hath forthdrawe
In Mariage after the lawe,
So that the poeple is noght encressed.
Bot that it mihte be relessed,
That sche hir time hath lore so,
Sche wolde be his leve go
With othre Maidens to compleigne,
And afterward unto the peine
Of deth sche wolde come ayein.
The fader herde his douhter sein,
And therupon of on assent
The Maidens were anon asent,
That scholden with this Maiden wende.
So forto speke unto this ende,
Thei gon the dounes and the dales
With wepinge and with wofull tales,
And every wyht hire maidenhiede
Compleigneth upon thilke nede,
That sche no children hadde bore,
Wherof sche hath hir youthe lore,
Which nevere sche recovere mai:
For so fell that hir laste dai
Was come, in which sche scholde take
Hir deth, which sche may noght forsake.
Lo, thus sche deiede a wofull Maide
For thilke cause which I saide,
As thou hast understonde above.
Mi fader, as toward the Love
Of Maidens forto telle trowthe,
Ye have thilke vice of Slowthe,
Me thenkth, riht wonder wel declared,
That ye the wommen have noght spared
Of hem that tarien so behinde.
Bot yit it falleth in my minde,
Toward the men hou that ye spieke
Of hem that wole no travail sieke
In cause of love upon decerte:
To speke in wordes so coverte,
I not what travaill that ye mente.
Mi Sone, and after min entente
I woll thee telle what I thoghte,
Hou whilom men here loves boghte
Thurgh gret travaill in strange londes,
Wher that thei wroghten with here hondes
Of armes many a worthi dede,
In sondri place as men mai rede.
That every love of pure kinde
Is ferst forthdrawe, wel I finde:
Bot natheles yit overthis
Decerte doth so that it is
The rather had in mani place.
Forthi who secheth loves grace,
Wher that these worthi wommen are,
He mai noght thanne himselve spare
Upon his travail forto serve,
Wherof that he mai thonk deserve,
There as these men of Armes be,
Somtime over the grete Se:
So that be londe and ek be Schipe
He mot travaile for worschipe
And make manye hastyf rodes,
Somtime in Prus, somtime in Rodes,
And somtime into Tartarie;
So that these heraldz on him crie,
'Vailant, vailant, lo, wher he goth]'
And thanne he yifth hem gold and cloth,
So that his fame mihte springe,
And to his ladi Ere bringe
Som tidinge of his worthinesse;
So that sche mihte of his prouesce
Of that sche herde men recorde,
The betre unto his love acorde
And danger pute out of hire mod,
Whanne alle men recorden good,
And that sche wot wel, for hir sake
That he no travail wol forsake.
Mi Sone, of this travail I meene:
Nou schrif thee, for it schal be sene
If thou art ydel in this cas.
My fader ye, and evere was:
For as me thenketh trewely
That every man doth mor than I
As of this point, and if so is
That I have oght so don er this,
It is so litel of acompte,
As who seith, it mai noght amonte
To winne of love his lusti yifte.
For this I telle you in schrifte,
That me were levere hir love winne
Than Kaire and al that is ther inne:
And forto slen the hethen alle,
I not what good ther mihte falle,
So mochel blod thogh ther be schad.
This finde I writen, hou Crist bad
That noman other scholde sle.
What scholde I winne over the Se,
If I mi ladi loste at hom?
Bot passe thei the salte fom,
To whom Crist bad thei scholden preche
To al the world and his feith teche:
Bot now thei rucken in here nest
And resten as hem liketh best
In all the swetnesse of delices.
Thus thei defenden ous the vices,
And sitte hemselven al amidde;
To slen and feihten thei ous bidde
Hem whom thei scholde, as the bok seith,
Converten unto Cristes feith.
Bot hierof have I gret mervaile,
Hou thei wol bidde me travaile:
A Sarazin if I sle schal,
I sle the Soule forth withal,
And that was nevere Cristes lore.
Bot nou ho ther, I seie nomore.
Bot I wol speke upon mi schrifte;
And to Cupide I make a yifte,
That who as evere pris deserve
Of armes, I wol love serve;
And thogh I scholde hem bothe kepe,
Als wel yit wolde I take kepe
Whan it were time to abide,
As forto travaile and to ryde:
For how as evere a man laboure,
Cupide appointed hath his houre.
For I have herd it telle also,
Achilles lefte hise armes so
Bothe of himself and of his men
At Troie for Polixenen,
Upon hire love whanne he fell,
That for no chance that befell
Among the Grecs or up or doun,
He wolde noght ayein the toun
Ben armed, for the love of hire.
And so me thenketh, lieve Sire,
A man of armes mai him reste
Somtime in hope for the beste,
If he mai finde a weie nerr.
What scholde I thanne go so ferr
In strange londes many a mile
To ryde, and lese at hom therwhile
Mi love? It were a schort beyete
To winne chaf and lese whete.
Bot if mi ladi bidde wolde,
That I for hire love scholde
Travaile, me thenkth trewely
I mihte fle thurghout the Sky,
And go thurghout the depe Se,
For al ne sette I at a stre
What thonk that I mihte elles gete.
What helpeth it a man have mete,
Wher drinke lacketh on the bord?
What helpeth eny mannes word
To seie hou I travaile faste,
Wher as me faileth ate laste
That thing which I travaile fore?
O in good time were he bore,
That mihte atteigne such a mede.
Bot certes if I mihte spede
With eny maner besinesse
Of worldes travail, thanne I gesse,
Ther scholde me non ydelschipe
Departen fro hir ladischipe.
Bot this I se, on daies nou
The blinde god, I wot noght hou,
Cupido, which of love is lord,
He set the thinges in discord,
That thei that lest to love entende
Fulofte he wole hem yive and sende
Most of his grace; and thus I finde
That he that scholde go behinde,
Goth many a time ferr tofore:
So wot I noght riht wel therfore,
On whether bord that I schal seile.
Thus can I noght miself conseile,
Bot al I sette on aventure,
And am, as who seith, out of cure
For ought that I can seie or do:
For everemore I finde it so,
The more besinesse I leie,
The more that I knele and preie
With goode wordes and with softe,
The more I am refused ofte,
With besinesse and mai noght winne.
And in good feith that is gret Sinne;
For I mai seie, of dede and thoght
That ydel man have I be noght;
For hou as evere I be deslaied,
Yit evermore I have assaied.
Bot thogh my besinesse laste,
Al is bot ydel ate laste,
For whan theffect is ydelnesse,
I not what thing is besinesse.
Sei, what availeth al the dede,
Which nothing helpeth ate nede?
For the fortune of every fame
Schal of his ende bere a name.
And thus for oght is yit befalle,
An ydel man I wol me calle
As after myn entendement:
Bot upon youre amendement,
Min holi fader, as you semeth,
Mi reson and my cause demeth.
Mi Sone, I have herd thi matiere,
Of that thou hast thee schriven hiere:
And forto speke of ydel fare,
Me semeth that thou tharst noght care,
Bot only that thou miht noght spede.
And therof, Sone, I wol thee rede,
Abyd, and haste noght to faste;
Thi dees ben every dai to caste,
Thou nost what chance schal betyde.
Betre is to wayte upon the tyde
Than rowe ayein the stremes stronge:
For thogh so be thee thenketh longe,
Per cas the revolucion
Of hevene and thi condicion
Ne be noght yit of on acord.
Bot I dar make this record
To Venus, whos Prest that I am,
That sithen that I hidir cam
To hiere, as sche me bad, thi lif,
Wherof thou elles be gultif,
Thou miht hierof thi conscience
Excuse, and of gret diligence,
Which thou to love hast so despended,
Thou oghtest wel to be comended.
Bot if so be that ther oght faile,
Of that thou slowthest to travaile
In armes forto ben absent,
And for thou makst an argument
Of that thou seidest hiere above,
Hou Achilles thurgh strengthe of love
Hise armes lefte for a throwe,
Thou schalt an other tale knowe,
Which is contraire, as thou schalt wite.
For this a man mai finde write,
Whan that knyhthode schal be werred,
Lust mai noght thanne be preferred;
The bedd mot thanne be forsake
And Schield and spere on honde take,
Which thing schal make hem after glade,
Whan thei ben worthi knihtes made.
Wherof, so as it comth to honde,
A tale thou schalt understonde,
Hou that a kniht schal armes suie,
And for the while his ese eschuie.
Upon knyhthode I rede thus,
How whilom whan the king Nauplus,
The fader of Palamades,
Cam forto preien Ulixes
With othre Gregois ek also,
That he with hem to Troie go,
Wher that the Siege scholde be,
Anon upon Penolope
His wif, whom that he loveth hote,
Thenkende, wolde hem noght behote.
Bot he schop thanne a wonder wyle,
How that he scholde hem best beguile,
So that he mihte duelle stille
At home and welde his love at wille:
Wherof erli the morwe day
Out of his bedd, wher that he lay,
Whan he was uppe, he gan to fare
Into the field and loke and stare,
As he which feigneth to be wod:
He tok a plowh, wher that it stod,
Wherinne anon in stede of Oxes
He let do yoken grete foxes,
And with gret salt the lond he siew.
But Nauplus, which the cause kniew,
Ayein the sleihte which he feigneth
An other sleihte anon ordeigneth.
And fell that time Ulixes hadde
A chyld to Sone, and Nauplus radde
How men that Sone taken scholde,
And setten him upon the Molde,
Wher that his fader hield the plowh,
In thilke furgh which he tho drowh.
For in such wise he thoghte assaie,
Hou it Ulixes scholde paie,
If that he were wod or non.
The knihtes for this child forthgon;
Thelamacus anon was fett,
Tofore the plowh and evene sett,
Wher that his fader scholde dryve.
Bot whan he sih his child, als blyve
He drof the plowh out of the weie,
And Nauplus tho began to seie,
And hath half in a jape cryd:
'O Ulixes, thou art aspyd:
What is al this thou woldest meene?
For openliche it is now seene
That thou hast feigned al this thing,
Which is gret schame to a king,
Whan that for lust of eny slowthe
Thou wolt in a querele of trowthe
Of armes thilke honour forsake,
And duelle at hom for loves sake:
For betre it were honour to winne
Than love, which likinge is inne.
Forthi tak worschipe upon honde,
And elles thou schalt understonde
These othre worthi kinges alle
Of Grece, which unto thee calle,
Towardes thee wol be riht wrothe,
And grieve thee per chance bothe:
Which schal be tothe double schame
Most for the hindrynge of thi name,
That thou for Slouthe of eny love
Schalt so thi lustes sette above
And leve of armes the knyhthode,
Which is the pris of thi manhode
And oghte ferst to be desired.'
Bot he, which hadde his herte fyred
Upon his wif, whan he this herde,
Noght o word therayein ansuerde,
Bot torneth hom halvinge aschamed,
And hath withinne himself so tamed
His herte, that al the sotie
Of love for chivalerie
He lefte, and be him lief or loth,
To Troie forth with hem he goth,
That he him mihte noght excuse.
Thus stant it, if a knyht refuse
The lust of armes to travaile,
Ther mai no worldes ese availe,
Bot if worschipe be with al.
And that hath schewed overal;
For it sit wel in alle wise
A kniht to ben of hih emprise
And puten alle drede aweie;
For in this wise, I have herd seie,
The worthi king Protheselai
On his passage wher he lai
Towardes Troie thilke Siege,
Sche which was al his oghne liege,
Laodomie his lusti wif,
Which for his love was pensif,
As he which al hire herte hadde,
Upon a thing wherof sche dradde
A lettre, forto make him duelle
Fro Troie, sende him, thus to telle,
Hou sche hath axed of the wyse
Touchende of him in such a wise,
That thei have don hire understonde,
Towardes othre hou so it stonde,
The destine it hath so schape
That he schal noght the deth ascape
In cas that he arryve at Troie.
Forthi as to hir worldes joie
With al hire herte sche him preide,
And many an other cause alleide,
That he with hire at home abide.
Bot he hath cast hir lettre aside,
As he which tho no maner hiede
Tok of hire wommannysshe drede;
And forth he goth, as noght ne were,
To Troie, and was the ferste there
Which londeth, and tok arryvaile:
For him was levere in the bataille,
He seith, to deien as a knyht,
Than forto lyve in al his myht
And be reproeved of his name.
Lo, thus upon the worldes fame
Knyhthode hath evere yit be set,
Which with no couardie is let.
Of king Sal also I finde,
Whan Samuel out of his kinde,
Thurgh that the Phitonesse hath lered,
In Samarie was arered
Long time after that he was ded,
The king Sal him axeth red,
If that he schal go fyhte or non.
And Samuel him seide anon,
'The ferste day of the bataille
Thou schalt be slain withoute faile
And Jonathas thi Sone also.'
Bot hou as evere it felle so,
This worthi kniht of his corage
Hath undertake the viage,
And wol noght his knyhthode lette
For no peril he couthe sette;
Wherof that bothe his Sone and he
Upon the Montz of Gelboe
Assemblen with here enemys:
For thei knyhthode of such a pris
Be olde daies thanne hielden,
That thei non other thing behielden.
And thus the fader for worschipe
Forth with his Sone of felaschipe
Thurgh lust of armes weren dede,
As men mai in the bible rede;
The whos knyhthode is yit in mende,
And schal be to the worldes ende.
And forto loken overmore,
It hath and schal ben evermore
That of knihthode the prouesse
Is grounded upon hardinesse
Of him that dar wel undertake.
And who that wolde ensample take
Upon the forme of knyhtes lawe,
How that Achilles was forthdrawe
With Chiro, which Centaurus hihte,
Of many a wondre hiere he mihte.
For it stod thilke time thus,
That this Chiro, this Centaurus,
Withinne a large wildernesse,
Wher was Leon and Leonesse,
The Lepard and the Tigre also,
With Hert and Hynde, and buck and doo,
Hadde his duellinge, as tho befell,
Of Pileon upon the hel,
Wherof was thanne mochel speche.
Ther hath Chiro this Chyld to teche,
What time he was of tuelve yer age;
Wher forto maken his corage
The more hardi be other weie,
In the forest to hunte and pleie
Whan that Achilles walke wolde,
Centaurus bad that he ne scholde
After no beste make his chace,
Which wolde flen out of his place,
As buck and doo and hert and hynde,
With whiche he mai no werre finde;
Bot tho that wolden him withstonde,
Ther scholde he with his Dart on honde
Upon the Tigre and the Leon
Pourchace and take his veneison,
As to a kniht is acordant.
And therupon a covenant
This Chiro with Achilles sette,
That every day withoute lette
He scholde such a cruel beste
Or slen or wounden ate leste,
So that he mihte a tokne bringe
Of blod upon his hom cominge.
And thus of that Chiro him tawhte
Achilles such an herte cawhte,
That he nomore a Leon dradde,
Whan he his Dart on honde hadde,
Thanne if a Leon were an asse:
And that hath mad him forto passe
Alle othre knihtes of his dede,
Whan it cam to the grete nede,
As it was afterward wel knowe.
Lo, thus, my Sone, thou miht knowe
That the corage of hardiesce
Is of knyhthode the prouesce,
Which is to love sufficant
Aboven al the remenant
That unto loves court poursuie.
Bot who that wol no Slowthe eschuie,
Upon knihthode and noght travaile,
I not what love him scholde availe;
Bot every labour axeth why
Of som reward, wherof that I
Ensamples couthe telle ynowe
Of hem that toward love drowe
Be olde daies, as thei scholde.
Mi fader, therof hiere I wolde.
Mi Sone, it is wel resonable,
In place which is honorable
If that a man his herte sette,
That thanne he for no Slowthe lette
To do what longeth to manhede.
For if thou wolt the bokes rede
Of Lancelot and othre mo,
Ther miht thou sen hou it was tho
Of armes, for thei wolde atteigne
To love, which withoute peine
Mai noght be gete of ydelnesse.
And that I take to witnesse
An old Cronique in special,
The which into memorial
Is write, for his loves sake
Hou that a kniht schal undertake.
Ther was a king, which Oenes
Was hote, and he under his pes
Hield Calidoyne in his Empire,
And hadde a dowhter Deianire.
Men wiste in thilke time non
So fair a wiht as sche was on;
And as sche was a lusti wiht,
Riht so was thanne a noble kniht,
To whom Mercurie fader was.
This kniht the tuo pilers of bras,
The whiche yit a man mai finde,
Sette up in the desert of Ynde;
That was the worthi Hercules,
Whos name schal ben endeles
For the merveilles whiche he wroghte.
This Hercules the love soghte
Of Deianire, and of this thing
Unto hir fader, which was king,
He spak touchende of Mariage.
The king knowende his hih lignage,
And dradde also hise mihtes sterne,
To him ne dorste his dowhter werne;
And natheles this he him seide,
How Achelons er he ferst preide
To wedden hire, and in accord
Thei stode, as it was of record:
Bot for al that this he him granteth,
That which of hem that other daunteth
In armes, him sche scholde take,
And that the king hath undertake.
This Achelons was a Geant,
A soubtil man, a deceivant,
Which thurgh magique and sorcerie
Couthe al the world of tricherie:
And whan that he this tale herde,
Hou upon that the king ansuerde
With Hercules he moste feighte,
He tristeth noght upon his sleighte
Al only, whan it comth to nede,
Bot that which voydeth alle drede
And every noble herte stereth,
The love, that no lif forbereth,
For his ladi, whom he desireth,
With hardiesse his herte fyreth,
And sende him word withoute faile
That he wol take the bataille.
Thei setten day, they chosen field,
The knihtes coevered under Schield
Togedre come at time set,
And echon is with other met.
It fell thei foghten bothe afote,
Ther was no ston, ther was no rote,
Which mihte letten hem the weie,
But al was voide and take aweie.
Thei smyten strokes bot a fewe,
For Hercules, which wolde schewe
His grete strengthe as for the nones,
He sterte upon him al at ones
And cawhte him in hise armes stronge.
This Geant wot he mai noght longe
Endure under so harde bondes,
And thoghte he wolde out of hise hondes
Be sleyhte in som manere ascape.
And as he couthe himself forschape,
In liknesse of an Eddre he slipte
Out of his hond, and forth he skipte;
And efte, as he that feighte wole,
He torneth him into a Bole,
And gan to belwe of such a soun,
As thogh the world scholde al go doun:
The ground he sporneth and he tranceth,
Hise large hornes he avanceth
And caste hem here and there aboute.
Bot he, which stant of him no doute,
Awaiteth wel whan that he cam,
And him be bothe hornes nam
And al at ones he him caste
Unto the ground, and hield him faste,
That he ne mihte with no sleighte
Out of his hond gete upon heighte,
Til he was overcome and yolde,
And Hercules hath what he wolde.
The king him granteth to fulfille
His axinge at his oghne wille,
And sche for whom he hadde served,
Hire thoghte he hath hire wel deserved.
And thus with gret decerte of Armes
He wan him forto ligge in armes,
As he which hath it dere aboght,
For otherwise scholde he noght.
And overthis if thou wolt hiere
Upon knihthode of this matiere,
Hou love and armes ben aqueinted,
A man mai se bothe write and peinted
So ferforth that Pantasilee,
Which was the queene of Feminee,
The love of Hector forto sieke
And for thonour of armes eke,
To Troie cam with Spere and Schield,
And rod hirself into the field
With Maidens armed al a route
In rescouss of the toun aboute,
Which with the Gregois was belein.
Fro Pafagoine and as men sein,
Which stant upon the worldes ende,
That time it likede ek to wende
To Philemenis, which was king,
To Troie, and come upon this thing
In helpe of thilke noble toun;
And al was that for the renoun
Of worschipe and of worldes fame,
Of which he wolde bere a name:
And so he dede, and forth withal
He wan of love in special
A fair tribut for everemo.
For it fell thilke time so;
Pirrus the Sone of Achilles
This worthi queene among the press
With dedli swerd soghte out and fond,
And slowh hire with his oghne hond;
Wherof this king of Pafagoine
Pantasilee of Amazoine,
Wher sche was queene, with him ladde,
With suche Maidens as sche hadde
Of hem that were left alyve,
Forth in his Schip, til thei aryve;
Wher that the body was begrave
With worschipe, and the wommen save.
And for the goodschipe of this dede
Thei granten him a lusti mede,
That every yeer as for truage
To him and to his heritage
Of Maidens faire he schal have thre.
And in this wise spedde he,
Which the fortune of armes soghte,
With his travail his ese he boghte;
For otherwise he scholde have failed,
If that he hadde noght travailed.
Eneas ek withinne Ytaile,
Ne hadde he wonne the bataille
And don his miht so besily
Ayein king Turne his enemy,
He hadde noght Lavine wonne;
Bot for he hath him overronne
And gete his pris, he gat hire love.
Be these ensamples here above,
Lo, now, mi Sone, as I have told,
Thou miht wel se, who that is bold
And dar travaile and undertake
The cause of love, he schal be take
The rathere unto loves grace;
For comunliche in worthi place
The wommen loven worthinesse
Of manhode and of gentilesse,
For the gentils ben most desired.
Mi fader, bot I were enspired
Thurgh lore of you, I wot no weie
What gentilesce is forto seie,
Wherof to telle I you beseche.
The ground, Mi Sone, forto seche
Upon this diffinicion,
The worldes constitucion
Hath set the name of gentilesse
Upon the fortune of richesse
Which of long time is falle in age.
Thanne is a man of hih lignage
After the forme, as thou miht hiere,
Bot nothing after the matiere.
For who that resoun understonde,
Upon richesse it mai noght stonde,
For that is thing which faileth ofte:
For he that stant to day alofte
And al the world hath in hise wones,
Tomorwe he falleth al at ones
Out of richesse into poverte,
So that therof is no decerte,
Which gentilesce makth abide.
And forto loke on other side
Hou that a gentil man is bore,
Adam, which alle was tofore
With Eve his wif, as of hem tuo,
Al was aliche gentil tho;
So that of generacion
To make declaracion,
Ther mai no gentilesce be.
For to the reson if we se,
Of mannes berthe the mesure,
It is so comun to nature,
That it yifth every man aliche,
Als wel to povere as to the riche;
For naked thei ben bore bothe,
The lord nomore hath forto clothe
As of himself that ilke throwe,
Than hath the povereste of the rowe.
And whan thei schulle both passe,
I not of hem which hath the lasse
Of worldes good, bot as of charge
The lord is more forto charge,
Whan god schal his accompte hiere,
For he hath had hise lustes hiere.
Bot of the bodi, which schal deie,
Althogh ther be diverse weie
To deth, yit is ther bot on ende,
To which that every man schal wende,
Als wel the beggere as the lord,
Of o nature, of on acord:
Sche which oure Eldemoder is,
The Erthe, bothe that and this
Receiveth and alich devoureth,
That sche to nouther part favoureth.
So wot I nothing after kinde
Where I mai gentilesse finde.
For lacke of vertu lacketh grace,
Wherof richesse in many place,
Whan men best wene forto stonde,
Al sodeinly goth out of honde:
Bot vertu set in the corage,
Ther mai no world be so salvage,
Which mihte it take and don aweie,
Til whanne that the bodi deie;
And thanne he schal be riched so,
That it mai faile neveremo;
So mai that wel be gentilesse,
Which yifth so gret a sikernesse.
For after the condicion
Of resonable entencion,
The which out of the Soule groweth
And the vertu fro vice knoweth,
Wherof a man the vice eschuieth,
Withoute Slowthe and vertu suieth,
That is a verrai gentil man,
And nothing elles which he can,
Ne which he hath, ne which he mai.
Bot for al that yit nou aday,
In loves court to taken hiede,
The povere vertu schal noght spiede,
Wher that the riche vice woweth;
For sielde it is that love alloweth
The gentil man withoute good,
Thogh his condicion be good.
Bot if a man of bothe tuo
Be riche and vertuous also,
Thanne is he wel the more worth:
Bot yit to putte himselve forth
He moste don his besinesse,
For nowther good ne gentilesse
Mai helpen him whiche ydel be.
Bot who that wole in his degre
Travaile so as it belongeth,
It happeth ofte that he fongeth
Worschipe and ese bothe tuo.
For evere yit it hath be so,
That love honeste in sondri weie
Profiteth, for it doth aweie
The vice, and as the bokes sein,
It makth curteis of the vilein,
And to the couard hardiesce
It yifth, so that verrai prouesse
Is caused upon loves reule
To him that can manhode reule;
And ek toward the wommanhiede,
Who that therof wol taken hiede,
For thei the betre affaited be
In every thing, as men may se.
For love hath evere hise lustes grene
In gentil folk, as it is sene,
Which thing ther mai no kinde areste:
I trowe that ther is no beste,
If he with love scholde aqueinte,
That he ne wolde make it queinte
As for the while that it laste.
And thus I conclude ate laste,
That thei ben ydel, as me semeth,
Whiche unto thing that love demeth
Forslowthen that thei scholden do.
And overthis, mi Sone, also
After the vertu moral eke
To speke of love if I schal seke,
Among the holi bokes wise
I finde write in such a wise,
'Who loveth noght is hier as ded';
For love above alle othre is hed,
Which hath the vertus forto lede,
Of al that unto mannes dede
Belongeth: for of ydelschipe
He hateth all the felaschipe.
For Slowthe is evere to despise,
Which in desdeign hath al apprise,
And that acordeth noght to man:
For he that wit and reson kan,
It sit him wel that he travaile
Upon som thing which mihte availe,
For ydelschipe is noght comended,
Bot every lawe it hath defended.
And in ensample therupon
The noble wise Salomon,
Which hadde of every thing insihte,
Seith, 'As the briddes to the flihte
Ben made, so the man is bore
To labour,' which is noght forbore
To hem that thenken forto thryve.
For we, whiche are now alyve,
Of hem that besi whylom were,
Als wel in Scole as elleswhere,
Mowe every day ensample take,
That if it were now to make
Thing which that thei ferst founden oute,
It scholde noght be broght aboute.
Here lyves thanne were longe,
Here wittes grete, here mihtes stronge,
Here hertes ful of besinesse,
Wherof the worldes redinesse
In bodi bothe and in corage
Stant evere upon his avantage.
And forto drawe into memoire
Here names bothe and here histoire,
Upon the vertu of her dede
In sondri bokes thou miht rede.
Of every wisdom the parfit
The hyhe god of his spirit
Yaf to the men in Erthe hiere
Upon the forme and the matiere
Of that he wolde make hem wise:
And thus cam in the ferste apprise
Of bokes and of alle goode
Thurgh hem that whilom understode
The lore which to hem was yive,
Wherof these othre, that now live,
Ben every day to lerne newe.
Bot er the time that men siewe,
And that the labour forth it broghte,
Ther was no corn, thogh men it soghte,
In non of al the fieldes oute;
And er the wisdom cam aboute
Of hem that ferst the bokes write,
This mai wel every wys man wite,
Ther was gret labour ek also.
Thus was non ydel of the tuo,
That on the plogh hath undertake
With labour which the hond hath take,
That other tok to studie and muse,
As he which wolde noght refuse
The labour of hise wittes alle.
And in this wise it is befalle,
Of labour which that thei begunne
We be now tawht of that we kunne:
Here besinesse is yit so seene,
That it stant evere alyche greene;
Al be it so the bodi deie,
The name of hem schal nevere aweie.
In the Croniqes as I finde,
Cham, whos labour is yit in minde,
Was he which ferst the lettres fond
And wrot in Hebreu with his hond:
Of naturel Philosophie
He fond ferst also the clergie.
Cadmus the lettres of Gregois
Ferst made upon his oghne chois.
Theges of thing which schal befalle,
He was the ferste Augurre of alle:
And Philemon be the visage
Fond to descrive the corage.
Cladyns, Esdras and Sulpices,
Termegis, Pandulf, Frigidilles,
Menander, Ephiloquorus,
Solins, Pandas and Josephus
The ferste were of Enditours,
Of old Cronique and ek auctours:
And Heredot in his science
Of metre, of rime and of cadence
The ferste was of which men note.
And of Musique also the note
In mannes vois or softe or scharpe,
That fond Jubal; and of the harpe
The merie soun, which is to like,
That fond Poulins forth with phisique.
Zenzis fond ferst the pourtreture,
And Promothes the Sculpture;
After what forme that hem thoghte,
The resemblance anon thei wroghte.
Tubal in Iren and in Stel
Fond ferst the forge and wroghte it wel:
And Jadahel, as seith the bok,
Ferst made Net and fisshes tok:
Of huntynge ek he fond the chace,
Which now is knowe in many place:
A tente of cloth with corde and stake
He sette up ferst and dede it make.
Verconius of cokerie
Ferst made the delicacie.
The craft Minerve of wolle fond
And made cloth hire oghne hond;
And Delbora made it of lyn:
Tho wommen were of great engyn.
Bot thing which yifth ous mete and drinke
And doth the labourer to swinke
To tile lond and sette vines,
Wherof the cornes and the wynes
Ben sustenance to mankinde,
In olde bokes as I finde,
Saturnus of his oghne wit
Hath founde ferst, and more yit
Of Chapmanhode he fond the weie,
And ek to coigne the moneie
Of sondri metall, as it is,
He was the ferste man of this.
Bot hou that metall cam a place
Thurgh mannes wit and goddes grace
The route of Philosophres wise
Controeveden be sondri wise,
Ferst forto gete it out of Myne,
And after forto trie and fyne.
And also with gret diligence
Thei founden thilke experience,
Which cleped is Alconomie,
Wherof the Selver multeplie
Thei made and ek the gold also.
And forto telle hou it is so,
Of bodies sevene in special
With foure spiritz joynt withal
Stant the substance of this matiere.
The bodies whiche I speke of hiere
Of the Planetes ben begonne:
The gold is titled to the Sonne,
The mone of Selver hath his part,
And Iren that stant upon Mart,
The Led after Satorne groweth,
And Jupiter the Bras bestoweth,
The Coper set is to Venus,
And to his part Mercurius
Hath the quikselver, as it falleth,
The which, after the bok it calleth,
Is ferst of thilke fowre named
Of Spiritz, whiche ben proclamed;
And the spirit which is secounde
In Sal Armoniak is founde:
The thridde spirit Sulphur is;
The ferthe suiende after this
Arcennicum be name is hote.
With blowinge and with fyres hote
In these thinges, whiche I seie,
Thei worchen be diverse weie.
For as the philosophre tolde
Of gold and selver, thei ben holde
Tuo principal extremites,
To whiche alle othre be degres
Of the metalls ben acordant,
And so thurgh kinde resemblant,
That what man couthe aweie take
The rust, of which thei waxen blake,
And the savour and the hardnesse,
Thei scholden take the liknesse
Of gold or Selver parfitly.
Bot forto worche it sikirly,
Betwen the corps and the spirit,
Er that the metall be parfit,
In sevene formes it is set;
Of alle and if that on be let,
The remenant mai noght availe,
Bot otherwise it mai noght faile.
For thei be whom this art was founde
To every point a certain bounde
Ordeignen, that a man mai finde
This craft is wroght be weie of kinde,
So that ther is no fallas inne.
Bot what man that this werk beginne,
He mot awaite at every tyde,
So that nothing be left aside,
Ferst of the distillacion,
Forth with the congelacion,
Solucion, descencion,
And kepe in his entencion
The point of sublimacion,
And forth with calcinacion
Of veray approbacion
Do that ther be fixacion
With tempred hetes of the fyr,
Til he the parfit Elixir
Of thilke philosophres Ston
Mai gete, of which that many on
Of Philosophres whilom write.
And if thou wolt the names wite
Of thilke Ston with othre tuo,
Whiche as the clerkes maden tho,
So as the bokes it recorden,
The kinde of hem I schal recorden.
These olde Philosophres wyse
Be weie of kinde in sondri wise
Thre Stones maden thurgh clergie.
The ferste, if I schal specefie,
Was lapis vegetabilis,
Of which the propre vertu is
To mannes hele forto serve,
As forto kepe and to preserve
The bodi fro siknesses alle,
Til deth of kinde upon him falle.
The Ston seconde I thee behote
Is lapis animalis hote,
The whos vertu is propre and cowth
For Ere and yhe and nase and mouth,
Wherof a man mai hiere and se
And smelle and taste in his degre,
And forto fiele and forto go
It helpeth man of bothe tuo:
The wittes fyve he underfongeth
To kepe, as it to him belongeth.
The thridde Ston in special
Be name is cleped Minerall,
Which the metalls of every Mine
Attempreth, til that thei ben fyne,
And pureth hem be such a weie,
That al the vice goth aweie
Of rust, of stink and of hardnesse:
And whan thei ben of such clennesse,
This Mineral, so as I finde,
Transformeth al the ferste kynde
And makth hem able to conceive
Thurgh his vertu, and to receive
Bothe in substance and in figure
Of gold and selver the nature.
For thei tuo ben thextremetes,
To whiche after the propretes
Hath every metal his desir,
With help and confort of the fyr
Forth with this Ston, as it is seid,
Which to the Sonne and Mone is leid;
For to the rede and to the whyte
This Ston hath pouer to profite.
It makth mulptiplicacioun
Of gold, and the fixacioun
It causeth, and of his habit
He doth the werk to be parfit
Of thilke Elixer which men calle
Alconomie, as is befalle
To hem that whilom weren wise.
Bot now it stant al otherwise;
Thei speken faste of thilke Ston,
Bot hou to make it, nou wot non
After the sothe experience.
And natheles gret diligence
Thei setten upon thilke dede,
And spille more than thei spede;
For allewey thei finde a lette,
Which bringeth in poverte and dette
To hem that riche were afore:
The lost is had, the lucre is lore,
To gete a pound thei spenden fyve;
I not hou such a craft schal thryve
In the manere as it is used:
It were betre be refused
Than forto worchen upon weene
In thing which stant noght as thei weene.
Bot noght forthi, who that it knewe,
The science of himself is trewe
Upon the forme as it was founded,
Wherof the names yit ben grounded
Of hem that ferste it founden oute;
And thus the fame goth aboute
To suche as soghten besinesse
Of vertu and of worthinesse.
Of whom if I the names calle,
Hermes was on the ferste of alle,
To whom this art is most applied;
Geber therof was magnefied,
And Ortolan and Morien,
Among the whiche is Avicen,
Which fond and wrot a gret partie
The practique of Alconomie;
Whos bokes, pleinli as thei stonde
Upon this craft, fewe understonde;
Bot yit to put hem in assai
Ther ben full manye now aday,
That knowen litel what thei meene.
It is noght on to wite and weene;
In forme of wordes thei it trete,
Bot yit they failen of beyete,
For of tomoche or of tolyte
Ther is algate founde a wyte,
So that thei folwe noght the lyne
Of the parfite medicine,
Which grounded is upon nature.
Bot thei that writen the scripture
Of Grek, Arabe and of Caldee,
Thei were of such Auctorite
That thei ferst founden out the weie
Of al that thou hast herd me seie;
Wherof the Cronique of her lore
Schal stonde in pris for everemore.
Bot toward oure Marches hiere,
Of the Latins if thou wolt hiere,
Of hem that whilom vertuous
Were and therto laborious,
Carmente made of hire engin
The ferste lettres of Latin,
Of which the tunge Romein cam,
Wherof that Aristarchus nam
Forth with Donat and Dindimus
The ferste reule of Scole, as thus,
How that Latin schal be componed
And in what wise it schal be soned,
That every word in his degre
Schal stonde upon congruite.
And thilke time at Rome also
Was Tullius with Cithero,
That writen upon Rethorike,
Hou that men schal the wordes pike
After the forme of eloquence,
Which is, men sein, a gret prudence:
And after that out of Hebreu
Jerom, which the langage kneu,
The Bible, in which the lawe is closed,
Into Latin he hath transposed;
And many an other writere ek
Out of Caldee, Arabe and Grek
With gret labour the bokes wise
Translateden. And otherwise
The Latins of hemself also
Here studie at thilke time so
With gret travaile of Scole toke
In sondri forme forto boke,
That we mai take here evidences
Upon the lore of the Sciences,
Of craftes bothe and of clergie;
Among the whiche in Poesie
To the lovers Ovide wrot
And tawhte, if love be to hot,
In what manere it scholde akiele.
Forthi, mi Sone, if that thou fiele
That love wringe thee to sore,
Behold Ovide and take his lore.
My fader, if thei mihte spede
Mi love, I wolde his bokes rede;
And if thei techen to restreigne
Mi love, it were an ydel peine
To lerne a thing which mai noght be.
For lich unto the greene tree,
If that men toke his rote aweie,
Riht so myn herte scholde deie,
If that mi love be withdrawe.
Wherof touchende unto this sawe
There is bot only to poursuie
Mi love, and ydelschipe eschuie.
Mi goode Sone, soth to seie,
If ther be siker eny weie
To love, thou hast seid the beste:
For who that wolde have al his reste
And do no travail at the nede,
It is no resoun that he spede
In loves cause forto winne;
For he which dar nothing beginne,
I not what thing he scholde achieve.
Bot overthis thou schalt believe,
So as it sit thee wel to knowe,
That ther ben othre vices slowe,
Whiche unto love don gret lette,
If thou thin herte upon hem sette.
Toward the Slowe progenie
Ther is yit on of compaignie,
And he is cleped Sompnolence,
Which doth to Slouthe his reverence,
As he which is his Chamberlein,
That many an hundrid time hath lein
To slepe, whan he scholde wake.
He hath with love trewes take,
That wake who so wake wile,
If he mai couche a doun his bile,
He hath al wowed what him list;
That ofte he goth to bedde unkist,
And seith that for no Druerie
He wol noght leve his sluggardie.
For thogh noman it wole allowe,
To slepe levere than to wowe
Is his manere, and thus on nyhtes,
Whan that he seth the lusti knyhtes
Revelen, wher these wommen are,
Awey he skulketh as an hare,
And goth to bedde and leith him softe,
And of his Slouthe he dremeth ofte
Hou that he stiketh in the Myr,
And hou he sitteth be the fyr
And claweth on his bare schanckes,
And hou he clymbeth up the banckes
And falleth into Slades depe.
Bot thanne who so toke kepe,
Whanne he is falle in such a drem,
Riht as a Schip ayein the Strem,
He routeth with a slepi noise,
And brustleth as a monkes froise,
Whanne it is throwe into the Panne.
And otherwhile sielde whanne
That he mai dreme a lusti swevene,
Him thenkth as thogh he were in hevene
And as the world were holi his:
And thanne he spekth of that and this,
And makth his exposicion
After the disposicion
Of that he wolde, and in such wise
He doth to love all his service;
I not what thonk he schal deserve.
Bot, Sone, if thou wolt love serve,
I rede that thou do noght so.
Ha, goode fader, certes no.
I hadde levere be mi trowthe,
Er I were set on such a slouthe
And beere such a slepi snoute,
Bothe yhen of myn hed were oute.
For me were betre fulli die,
Thanne I of such a slugardie
Hadde eny name, god me schilde;
For whan mi moder was with childe,
And I lay in hire wombe clos,
I wolde rathere Atropos,
Which is goddesse of alle deth,
Anon as I hadde eny breth,
Me hadde fro mi Moder cast.
Bot now I am nothing agast,
I thonke godd; for Lachesis,
Ne Cloto, which hire felawe is,
Me schopen no such destine,
Whan thei at mi nativite
My weerdes setten as thei wolde;
Bot thei me schopen that I scholde
Eschuie of slep the truandise,
So that I hope in such a wise
To love forto ben excused,
That I no Sompnolence have used.
For certes, fader Genius,
Yit into nou it hath be thus,
At alle time if it befelle
So that I mihte come and duelle
In place ther my ladi were,
I was noght slow ne slepi there:
For thanne I dar wel undertake,
That whanne hir list on nyhtes wake
In chambre as to carole and daunce,
Me thenkth I mai me more avaunce,
If I mai gon upon hir hond,
Thanne if I wonne a kinges lond.
For whanne I mai hire hand beclippe,
With such gladnesse I daunce and skippe,
Me thenkth I touche noght the flor;
The Ro, which renneth on the Mor,
Is thanne noght so lyht as I:
So mow ye witen wel forthi,
That for the time slep I hate.
And whanne it falleth othergate,
So that hire like noght to daunce,
Bot on the Dees to caste chaunce
Or axe of love som demande,
Or elles that hir list comaunde
To rede and here of Troilus,
Riht as sche wole or so or thus,
I am al redi to consente.
And if so is that I mai hente
Somtime among a good leisir,
So as I dar of mi desir
I telle a part; bot whanne I preie,
Anon sche bidt me go mi weie
And seith it is ferr in the nyht;
And I swere it is even liht.
Bot as it falleth ate laste,
Ther mai no worldes joie laste,
So mot I nedes fro hire wende
And of my wachche make an ende:
And if sche thanne hiede toke,
Hou pitousliche on hire I loke,
Whan that I schal my leve take,
Hire oghte of mercy forto slake
Hire daunger, which seith evere nay.
Bot he seith often, 'Have good day,'
That loth is forto take his leve:
Therfore, while I mai beleve,
I tarie forth the nyht along,
For it is noght on me along
To slep that I so sone go,
Til that I mot algate so;
And thanne I bidde godd hire se,
And so doun knelende on mi kne
I take leve, and if I schal,
I kisse hire, and go forth withal.
And otherwhile, if that I dore,
Er I come fulli to the Dore,
I torne ayein and feigne a thing,
As thogh I hadde lost a Ring
Or somwhat elles, for I wolde
Kisse hire eftsones, if I scholde,
Bot selden is that I so spede.
And whanne I se that I mot nede
Departen, I departe, and thanne
With al myn herte I curse and banne
That evere slep was mad for yhe;
For, as me thenkth, I mihte dryhe
Withoute slep to waken evere,
So that I scholde noght dissevere
Fro hire, in whom is al my liht:
And thanne I curse also the nyht
With al the will of mi corage,
And seie, 'Awey, thou blake ymage,
Which of thi derke cloudy face
Makst al the worldes lyht deface,
And causest unto slep a weie,
Be which I mot nou gon aweie
Out of mi ladi compaignie.
O slepi nyht, I thee defie,
And wolde that thou leye in presse
With Proserpine the goddesse
And with Pluto the helle king:
For til I se the daies spring,
I sette slep noght at a risshe.'
And with that word I sike and wisshe,
And seie, 'Ha, whi ne were it day?
For yit mi ladi thanne I may
Beholde, thogh I do nomore.'
And efte I thenke forthermore,
To som man hou the niht doth ese,
Whan he hath thing that mai him plese
The longe nyhtes be his side,
Where as I faile and go beside.
Bot slep, I not wherof it serveth,
Of which noman his thonk deserveth
To gete him love in eny place,
Bot is an hindrere of his grace
And makth him ded as for a throwe,
Riht as a Stok were overthrowe.
And so, mi fader, in this wise
The slepi nyhtes I despise,
And evere amiddes of mi tale
I thenke upon the nyhtingale,
Which slepeth noght be weie of kinde
For love, in bokes as I finde.
Thus ate laste I go to bedde,
And yit min herte lith to wedde
With hire, wher as I cam fro;
Thogh I departe, he wol noght so,
Ther is no lock mai schette him oute,
Him nedeth noght to gon aboute,
That perce mai the harde wall;
Thus is he with hire overall,
That be hire lief, or be hire loth,
Into hire bedd myn herte goth,
And softly takth hire in his arm
And fieleth hou that sche is warm,
And wissheth that his body were
To fiele that he fieleth there.
And thus miselven I tormente,
Til that the dede slep me hente:
Bot thanne be a thousand score
Welmore than I was tofore
I am tormented in mi slep,
Bot that I dreme is noght of schep;
For I ne thenke noght on wulle,
Bot I am drecched to the fulle
Of love, that I have to kepe,
That nou I lawhe and nou I wepe,
And nou I lese and nou I winne,
And nou I ende and nou beginne.
And otherwhile I dreme and mete
That I al one with hire mete
And that Danger is left behinde;
And thanne in slep such joie I finde,
That I ne bede nevere awake.
Bot after, whanne I hiede take,
And schal arise upon the morwe,
Thanne is al torned into sorwe,
Noght for the cause I schal arise,
Bot for I mette in such a wise,
And ate laste I am bethoght
That al is vein and helpeth noght:
Bot yit me thenketh be my wille
I wolde have leie and slepe stille,
To meten evere of such a swevene,
For thanne I hadde a slepi hevene.
Mi Sone, and for thou tellest so,
A man mai finde of time ago
That many a swevene hath be certein,
Al be it so, that som men sein
That swevenes ben of no credence.
Bot forto schewe in evidence
That thei fulofte sothe thinges
Betokne, I thenke in my wrytinges
To telle a tale therupon,
Which fell be olde daies gon.
This finde I write in Poesie:
Ceix the king of Trocinie
Hadde Alceone to his wif,
Which as hire oghne hertes lif
Him loveth; and he hadde also
A brother, which was cleped tho
Dedalion, and he per cas
Fro kinde of man forschape was
Into a Goshauk of liknesse;
Wherof the king gret hevynesse
Hath take, and thoghte in his corage
To gon upon a pelrinage
Into a strange regioun,
Wher he hath his devocioun
To don his sacrifice and preie,
If that he mihte in eny weie
Toward the goddes finde grace
His brother hele to pourchace,
So that he mihte be reformed
Of that he hadde be transformed.
To this pourpos and to this ende
This king is redy forto wende,
As he which wolde go be Schipe;
And forto don him felaschipe
His wif unto the See him broghte,
With al hire herte and him besoghte,
That he the time hire wolde sein,
Whan that he thoghte come ayein:
'Withinne,' he seith, 'tuo Monthe day.'
And thus in al the haste he may
He tok his leve, and forth he seileth
Wepende, and sche hirself beweileth,
And torneth hom, ther sche cam fro.
Bot whan the Monthes were ago,
The whiche he sette of his comynge,
And that sche herde no tydinge,
Ther was no care forto seche:
Wherof the goddes to beseche
Tho sche began in many wise,
And to Juno hire sacrifise
Above alle othre most sche dede,
And for hir lord sche hath so bede
To wite and knowe hou that he ferde,
That Juno the goddesse hire herde,
Anon and upon this matiere
Sche bad Yris hir Messagere
To Slepes hous that sche schal wende,
And bidde him that he make an ende
Be swevene and schewen al the cas
Unto this ladi, hou it was.
This Yris, fro the hihe stage
Which undertake hath the Message,
Hire reyny Cope dede upon,
The which was wonderli begon
With colours of diverse hewe,
An hundred mo than men it knewe;
The hevene lich into a bowe
Sche bende, and so she cam doun lowe,
The god of Slep wher that sche fond.
And that was in a strange lond,
Which marcheth upon Chymerie:
For ther, as seith the Poesie,
The god of Slep hath mad his hous,
Which of entaille is merveilous.
Under an hell ther is a Cave,
Which of the Sonne mai noght have,
So that noman mai knowe ariht
The point betwen the dai and nyht:
Ther is no fyr, ther is no sparke,
Ther is no dore, which mai charke,
Wherof an yhe scholde unschette,
So that inward ther is no lette.
And forto speke of that withoute,
Ther stant no gret Tree nyh aboute
Wher on ther myhte crowe or pie
Alihte, forto clepe or crie:
Ther is no cok to crowe day,
Ne beste non which noise may
The hell, bot al aboute round
Ther is growende upon the ground
Popi, which berth the sed of slep,
With othre herbes suche an hep.
A stille water for the nones
Rennende upon the smale stones,
Which hihte of Lethes the rivere,
Under that hell in such manere
Ther is, which yifth gret appetit
To slepe. And thus full of delit
Slep hath his hous; and of his couche
Withinne his chambre if I schal touche,
Of hebenus that slepi Tree
The bordes al aboute be,
And for he scholde slepe softe,
Upon a fethrebed alofte
He lith with many a pilwe of doun:
The chambre is strowed up and doun
With swevenes many thousendfold.
Thus cam Yris into this hold,
And to the bedd, which is al blak,
Sche goth, and ther with Slep sche spak,
And in the wise as sche was bede
The Message of Juno sche dede.
Fulofte hir wordes sche reherceth,
Er sche his slepi Eres perceth;
With mochel wo bot ate laste
His slombrende yhen he upcaste
And seide hir that it schal be do.
Wherof among a thousend tho,
Withinne his hous that slepi were,
In special he ches out there
Thre, whiche scholden do this dede:
The ferste of hem, so as I rede,
Was Morphes, the whos nature
Is forto take the figure
Of what persone that him liketh,
Wherof that he fulofte entriketh
The lif which slepe schal be nyhte;
And Ithecus that other hihte,
Which hath the vois of every soun,
The chiere and the condicioun
Of every lif, what so it is:
The thridde suiende after this
Is Panthasas, which may transforme
Of every thing the rihte forme,
And change it in an other kinde.
Upon hem thre, so as I finde,
Of swevenes stant al thapparence,
Which otherwhile is evidence
And otherwhile bot a jape.
Bot natheles it is so schape,
That Morphes be nyht al one
Appiereth until Alceone
In liknesse of hir housebonde
Al naked ded upon the stronde,
And hou he dreynte in special
These othre tuo it schewen al.
The tempeste of the blake cloude,
The wode See, the wyndes loude,
Al this sche mette, and sih him dyen;
Wherof that sche began to crien,
Slepende abedde ther sche lay,
And with that noise of hire affray
Hir wommen sterten up aboute,
Whiche of here ladi were in doute,
And axen hire hou that sche ferde;
And sche, riht as sche syh and herde,
Hir swevene hath told hem everydel.
And thei it halsen alle wel
And sein it is a tokne of goode;
Bot til sche wiste hou that it stode,
Sche hath no confort in hire herte,
Upon the morwe and up sche sterte,
And to the See, wher that sche mette
The bodi lay, withoute lette
Sche drowh, and whan that sche cam nyh,
Stark ded, hise harmes sprad, sche syh
Hire lord flietende upon the wawe.
Wherof hire wittes ben withdrawe,
And sche, which tok of deth no kepe,
Anon forth lepte into the depe
And wolde have cawht him in hire arm.
This infortune of double harm
The goddes fro the hevene above
Behielde, and for the trowthe of love,
Which in this worthi ladi stod,
Thei have upon the salte flod
Hire dreinte lord and hire also
Fro deth to lyve torned so,
That thei ben schapen into briddes
Swimmende upon the wawe amiddes.
And whan sche sih hire lord livende
In liknesse of a bridd swimmende,
And sche was of the same sort,
So as sche mihte do desport,
Upon the joie which sche hadde
Hire wynges bothe abrod sche spradde,
And him, so as sche mai suffise,
Beclipte and keste in such a wise,
As sche was whilom wont to do:
Hire wynges for hire armes tuo
Sche tok, and for hire lippes softe
Hire harde bile, and so fulofte
Sche fondeth in hire briddes forme,
If that sche mihte hirself conforme
To do the plesance of a wif,
As sche dede in that other lif:
For thogh sche hadde hir pouer lore,
Hir will stod as it was tofore,
And serveth him so as sche mai.
Wherof into this ilke day
Togedre upon the See thei wone,
Wher many a dowhter and a Sone
Thei bringen forth of briddes kinde;
And for men scholden take in mynde
This Alceoun the trewe queene,
Hire briddes yit, as it is seene,
Of Alceoun the name bere.
Lo thus, mi Sone, it mai thee stere
Of swevenes forto take kepe,
For ofte time a man aslepe
Mai se what after schal betide.
Forthi it helpeth at som tyde
A man to slepe, as it belongeth,
Bot slowthe no lif underfongeth
Which is to love appourtenant.
Mi fader, upon covenant
I dar wel make this avou,
Of all mi lif that into nou,
Als fer as I can understonde,
Yit tok I nevere Slep on honde,
Whan it was time forto wake;
For thogh myn yhe it wolde take,
Min herte is evere therayein.
Bot natheles to speke it plein,
Al this that I have seid you hiere
Of my wakinge, as ye mai hiere,
It toucheth to mi lady swete;
For otherwise, I you behiete,
In strange place whanne I go,
Me list nothing to wake so.
For whan the wommen listen pleie,
And I hir se noght in the weie,
Of whom I scholde merthe take,
Me list noght longe forto wake,
Bot if it be for pure schame,
Of that I wolde eschuie a name,
That thei ne scholde have cause non
To seie, 'Ha, lo, wher goth such on,
That hath forlore his contenaunce]'
And thus among I singe and daunce,
And feigne lust ther as non is.
For ofte sithe I fiele this;
Of thoght, which in mi herte falleth
Whanne it is nyht, myn hed appalleth,
And that is for I se hire noght,
Which is the wakere of mi thoght:
And thus as tymliche as I may,
Fulofte whanne it is brod day,
I take of all these othre leve
And go my weie, and thei beleve,
That sen per cas here loves there;
And I go forth as noght ne were
Unto mi bedd, so that al one
I mai ther ligge and sighe and grone
And wisshen al the longe nyht,
Til that I se the daies lyht.
I not if that be Sompnolence,
Bot upon youre conscience,
Min holi fader, demeth ye.
My Sone, I am wel paid with thee,
Of Slep that thou the Sluggardie
Be nyhte in loves compaignie
Eschuied hast, and do thi peine
So that thi love thar noght pleine:
For love upon his lust wakende
Is evere, and wolde that non ende
Were of the longe nyhtes set.
Wherof that thou be war the bet,
To telle a tale I am bethoght,
Hou love and Slep acorden noght.
For love who that list to wake
Be nyhte, he mai ensample take
Of Cephalus, whan that he lay
With Aurora that swete may
In armes all the longe nyht.
Bot whanne it drogh toward the liht,
That he withinne his herte sih
The dai which was amorwe nyh,
Anon unto the Sonne he preide
For lust of love, and thus he seide:
'O Phebus, which the daies liht
Governest, til that it be nyht,
And gladest every creature
After the lawe of thi nature,-
Bot natheles ther is a thing,
Which onli to the knouleching
Belongeth as in privete
To love and to his duete,
Which asketh noght to ben apert,
Bot in cilence and in covert
Desireth forto be beschaded:
And thus whan that thi liht is faded
And Vesper scheweth him alofte,
And that the nyht is long and softe,
Under the cloudes derke and stille
Thanne hath this thing most of his wille.
Forthi unto thi myhtes hyhe,
As thou which art the daies yhe,
Of love and myht no conseil hyde,
Upon this derke nyhtes tyde
With al myn herte I thee beseche
That I plesance myhte seche
With hire which lith in min armes.
Withdrawgh the Banere of thin Armes,
And let thi lyhtes ben unborn,
And in the Signe of Capricorn,
The hous appropred to Satorne,
I preie that thou wolt sojorne,
Wher ben the nihtes derke and longe:
For I mi love have underfonge,
Which lith hier be mi syde naked,
As sche which wolde ben awaked,
And me lest nothing forto slepe.
So were it good to take kepe
Nou at this nede of mi preiere,
And that the like forto stiere
Thi fyri Carte, and so ordeigne,
That thou thi swifte hors restreigne
Lowe under Erthe in Occident,
That thei towardes Orient
Be Cercle go the longe weie.
And ek to thee, Diane, I preie,
Which cleped art of thi noblesse
The nyhtes Mone and the goddesse,
That thou to me be gracious:
And in Cancro thin oghne hous
Ayein Phebus in opposit
Stond al this time, and of delit
Behold Venus with a glad yhe.
For thanne upon Astronomie
Of due constellacion
Thou makst prolificacion,
And dost that children ben begete:
Which grace if that I mihte gete,
With al myn herte I wolde serve
Be nyhte, and thi vigile observe.'
Lo, thus this lusti Cephalus
Preide unto Phebe and to Phebus
The nyht in lengthe forto drawe,
So that he mihte do the lawe
In thilke point of loves heste,
Which cleped is the nyhtes feste,
Withoute Slep of sluggardie;
Which Venus out of compaignie
Hath put awey, as thilke same,
Which lustles ferr from alle game
In chambre doth fulofte wo
Abedde, whanne it falleth so
That love scholde ben awaited.
But Slowthe, which is evele affaited,
With Slep hath mad his retenue,
That what thing is to love due,
Of all his dette he paieth non:
He wot noght how the nyht is gon
Ne hou the day is come aboute,
Bot onli forto slepe and route
Til hyh midday, that he arise.
Bot Cephalus dede otherwise,
As thou, my Sone, hast herd above.
Mi fader, who that hath his love
Abedde naked be his syde,
And wolde thanne hise yhen hyde
With Slep, I not what man is he:
Bot certes as touchende of me,
That fell me nevere yit er this.
Bot otherwhile, whan so is
That I mai cacche Slep on honde
Liggende al one, thanne I fonde
To dreme a merie swevene er day;
And if so falle that I may
Mi thought with such a swevene plese,
Me thenkth I am somdiel in ese,
For I non other confort have.
So nedeth noght that I schal crave
The Sonnes Carte forto tarie,
Ne yit the Mone, that sche carie
Hire cours along upon the hevene,
For I am noght the more in evene
Towardes love in no degree:
Bot in mi slep yit thanne I se
Somwhat in swevene of that me liketh,
Which afterward min herte entriketh,
Whan that I finde it otherwise.
So wot I noght of what servise
That Slep to mannes ese doth.
Mi Sone, certes thou seist soth,
Bot only that it helpeth kinde
Somtyme, in Phisique as I finde,
Whan it is take be mesure:
Bot he which can no Slep mesure
Upon the reule as it belongeth,
Fulofte of sodein chance he fongeth
Such infortune that him grieveth.
Bot who these olde bokes lieveth,
Of Sompnolence hou it is write,
Ther may a man the sothe wite,
If that he wolde ensample take,
That otherwhile is good to wake:
Wherof a tale in Poesie
I thenke forto specefie.
Ovide telleth in his sawes,
How Jupiter be olde dawes
Lay be a Mayde, which Yo
Was cleped, wherof that Juno
His wif was wroth, and the goddesse
Of Yo torneth the liknesse
Into a cow, to gon theroute
The large fieldes al aboute
And gete hire mete upon the griene.
And therupon this hyhe queene
Betok hire Argus forto kepe,
For he was selden wont to slepe,
And yit he hadde an hundred yhen,
And alle alyche wel thei syhen.
Now herkne hou that he was beguiled.
Mercurie, which was al affiled
This Cow to stele, he cam desguised,
And hadde a Pipe wel devised
Upon the notes of Musiqe,
Wherof he mihte hise Eres like.
And over that he hadde affaited
Hise lusti tales, and awaited
His time; and thus into the field
He cam, where Argus he behield
With Yo, which beside him wente.
With that his Pype on honde he hente,
And gan to pipe in his manere
Thing which was slepi forto hiere;
And in his pipinge evere among
He tolde him such a lusti song,
That he the fol hath broght aslepe.
Ther was non yhe mihte kepe
His hed, the which Mercurie of smot,
And forth withal anon fot hot
He stal the Cow which Argus kepte,
And al this fell for that he slepte.
Ensample it was to manye mo,
That mochel Slep doth ofte wo,
Whan it is time forto wake:
For if a man this vice take,
In Sompnolence and him delite,
Men scholde upon his Dore wryte
His epitaphe, as on his grave;
For he to spille and noght to save
Is schape, as thogh he were ded.
Forthi, mi Sone, hold up thin hed,
And let no Slep thin yhe englue,
Bot whanne it is to resoun due.
Mi fader, as touchende of this,
Riht so as I you tolde it is,
That ofte abedde, whanne I scholde,
I mai noght slepe, thogh I wolde;
For love is evere faste byme,
Which takth no hiede of due time.
For whanne I schal myn yhen close,
Anon min herte he wole oppose
And holde his Scole in such a wise,
Til it be day that I arise,
That selde it is whan that I slepe.
And thus fro Sompnolence I kepe
Min yhe: and forthi if ther be
Oght elles more in this degre,
Now axeth forth. Mi Sone, yis:
For Slowthe, which as Moder is
The forthdrawere and the Norrice
To man of many a dredful vice,
Hath yit an other laste of alle,
Which many a man hath mad to falle,
Wher that he mihte nevere arise;
Wherof for thou thee schalt avise,
Er thou so with thiself misfare,
What vice it is I wol declare.
Whan Slowthe hath don al that he may
To dryve forth the longe day,
Til it be come to the nede,
Thanne ate laste upon the dede
He loketh hou his time is lore,
And is so wo begon therfore,
That he withinne his thoght conceiveth
Tristesce, and so himself deceiveth,
That he wanhope bringeth inne,
Wher is no confort to beginne,
Bot every joie him is deslaied:
So that withinne his herte affraied
A thousend time with o breth
Wepende he wissheth after deth,
Whan he fortune fint adverse.
For thanne he wole his hap reherce,
As thogh his world were al forlore,
And seith, 'Helas, that I was bore]
Hou schal I live? hou schal I do?
For nou fortune is thus mi fo,
I wot wel god me wol noght helpe.
What scholde I thanne of joies yelpe,
Whan ther no bote is of mi care?
So overcast is my welfare,
That I am schapen al to strif.
Helas, that I nere of this lif,
Er I be fulliche overtake]'
And thus he wol his sorwe make,
As god him mihte noght availe:
Bot yit ne wol he noght travaile
To helpe himself at such a nede,
Bot slowtheth under such a drede,
Which is affermed in his herte,
Riht as he mihte noght asterte
The worldes wo which he is inne.
Also whan he is falle in Sinne,
Him thenkth he is so ferr coupable,
That god wol noght be merciable
So gret a Sinne to foryive;
And thus he leeveth to be schrive.
And if a man in thilke throwe
Wolde him consaile, he wol noght knowe
The sothe, thogh a man it finde:
For Tristesce is of such a kinde,
That forto meintiene his folie,
He hath with him Obstinacie,
Which is withinne of such a Slouthe,
That he forsaketh alle trouthe,
And wole unto no reson bowe;
And yit ne can he noght avowe
His oghne skile bot of hed:
Thus dwyneth he, til he be ded,
In hindringe of his oghne astat.
For where a man is obstinat,
Wanhope folweth ate laste,
Which mai noght after longe laste,
Till Slouthe make of him an ende.
Bot god wot whider he schal wende.
Mi Sone, and riht in such manere
Ther be lovers of hevy chiere,
That sorwen mor than it is ned,
Whan thei be taried of here sped
And conne noght hemselven rede,
Bot lesen hope forto spede
And stinten love to poursewe;
And thus thei faden hyde and hewe,
And lustles in here hertes waxe.
Hierof it is that I wolde axe,
If thou, mi Sone, art on of tho.
Ha, goode fader, it is so,
Outake a point, I am beknowe;
For elles I am overthrowe
In al that evere ye have seid.
Mi sorwe is everemore unteid,
And secheth overal my veines;
Bot forto conseile of mi peines,
I can no bote do therto;
And thus withouten hope I go,
So that mi wittes ben empeired,
And I, as who seith, am despeired
To winne love of thilke swete,
Withoute whom, I you behiete,
Min herte, that is so bestad,
Riht inly nevere mai be glad.
For be my trouthe I schal noght lie,
Of pure sorwe, which I drye
For that sche seith sche wol me noght,
With drecchinge of myn oghne thoght
In such a wanhope I am falle,
That I ne can unethes calle,
As forto speke of eny grace,
Mi ladi merci to pourchace.
Bot yit I seie noght for this
That al in mi defalte it is;
For I cam nevere yit in stede,
Whan time was, that I my bede
Ne seide, and as I dorste tolde:
Bot nevere fond I that sche wolde,
For oght sche knew of min entente,
To speke a goodly word assente.
And natheles this dar I seie,
That if a sinful wolde preie
To god of his foryivenesse
With half so gret a besinesse
As I have do to my ladi,
In lacke of askinge of merci
He scholde nevere come in Helle.
And thus I mai you sothli telle,
Save only that I crie and bidde,
I am in Tristesce al amidde
And fulfild of Desesperance:
And therof yif me mi penance,
Min holi fader, as you liketh.
Mi Sone, of that thin herte siketh
With sorwe, miht thou noght amende,
Til love his grace wol thee sende,
For thou thin oghne cause empeirest
What time as thou thiself despeirest.
I not what other thing availeth,
Of hope whan the herte faileth,
For such a Sor is incurable,
And ek the goddes ben vengable:
And that a man mai riht wel frede,
These olde bokes who so rede,
Of thing which hath befalle er this:
Now hier of what ensample it is.
Whilom be olde daies fer
Of Mese was the king Theucer,
Which hadde a kniht to Sone, Iphis:
Of love and he so maistred is,
That he hath set al his corage,
As to reguard of his lignage,
Upon a Maide of lou astat.
Bot thogh he were a potestat
Of worldes good, he was soubgit
To love, and put in such a plit,
That he excedeth the mesure
Of reson, that himself assure
He can noght; for the more he preide,
The lass love on him sche leide.
He was with love unwys constreigned,
And sche with resoun was restreigned:
The lustes of his herte he suieth,
And sche for dred schame eschuieth,
And as sche scholde, tok good hiede
To save and kepe hir wommanhiede.
And thus the thing stod in debat
Betwen his lust and hire astat:
He yaf, he sende, he spak be mouthe,
Bot yit for oght that evere he couthe
Unto his sped he fond no weie,
So that he caste his hope aweie,
Withinne his herte and gan despeire
Fro dai to dai, and so empeire,
That he hath lost al his delit
Of lust, of Slep, of Appetit,
That he thurgh strengthe of love lasseth
His wit, and resoun overpasseth.
As he which of his lif ne rowhte,
His deth upon himself he sowhte,
So that be nyhte his weie he nam,
Ther wiste non wher he becam;
The nyht was derk, ther schon no Mone,
Tofore the gates he cam sone,
Wher that this yonge Maiden was
And with this wofull word, 'Helas!'
Hise dedli pleintes he began
So stille that ther was noman
It herde, and thanne he seide thus:
'O thou Cupide, o thou Venus,
Fortuned be whos ordinaunce
Of love is every mannes chaunce,
Ye knowen al min hole herte,
That I ne mai your hond asterte;
On you is evere that I crie,
And yit you deigneth noght to plie,
Ne toward me youre Ere encline.
Thus for I se no medicine
To make an ende of mi querele,
My deth schal be in stede of hele.
Ha, thou mi wofull ladi diere,
Which duellest with thi fader hiere
And slepest in thi bedd at ese,
Thou wost nothing of my desese.
Hou thou and I be now unmete.
Ha lord, what swevene schalt thou mete,
What dremes hast thou nou on honde?
Thou slepest there, and I hier stonde.
Thogh I no deth to the deserve,
Hier schal I for thi love sterve,
Hier schal a kinges Sone dye
For love and for no felonie;
Wher thou therof have joie or sorwe,
Hier schalt thou se me ded tomorwe.
O herte hard aboven alle,
This deth, which schal to me befalle
For that thou wolt noght do me grace,
Yit schal be told in many a place,
Hou I am ded for love and trouthe
In thi defalte and in thi slouthe:
Thi Daunger schal to manye mo
Ensample be for everemo,
Whan thei my wofull deth recorde.'
And with that word he tok a Corde,
With which upon the gate tre
He hyng himself, that was pite.
The morwe cam, the nyht is gon,
Men comen out and syhe anon
Wher that this yonge lord was ded:
Ther was an hous withoute red,
For noman knew the cause why;
Ther was wepinge and ther was cry.
This Maiden, whan that sche it herde,
And sih this thing hou it misferde,
Anon sche wiste what it mente,
And al the cause hou it wente
To al the world sche tolde it oute,
And preith to hem that were aboute
To take of hire the vengance,
For sche was cause of thilke chaunce,
Why that this kinges Sone is split.
Sche takth upon hirself the gilt,
And is al redi to the peine
Which eny man hir wole ordeigne:
And bot if eny other wolde,
Sche seith that sche hirselve scholde
Do wreche with hire oghne hond,
Thurghout the world in every lond
That every lif therof schal speke,
Hou sche hirself i scholde wreke.
Sche wepth, sche crith, sche swouneth ofte,
Sche caste hire yhen up alofte
And seide among ful pitously:
'A godd, thou wost wel it am I,
For whom Iphis is thus besein:
Ordeine so, that men mai sein
A thousend wynter after this,
Hou such a Maiden dede amis,
And as I dede, do to me:
For I ne dede no pite
To him, which for mi love is lore,
Do no pite to me therfore.'
And with this word sche fell to grounde
Aswoune, and ther sche lay a stounde.
The goddes, whiche hir pleigntes herde
And syhe hou wofully sche ferde,
Hire lif thei toke awey anon,
And schopen hire into a Ston
After the forme of hire ymage
Of bodi bothe and of visage.
And for the merveile of this thing
Unto the place cam the king
And ek the queene and manye mo;
And whan thei wisten it was so,
As I have told it heir above,
Hou that Iphis was ded for love,
Of that he hadde be refused,
Thei hielden alle men excused
And wondren upon the vengance.
And forto kepe in remembrance,
This faire ymage mayden liche
With compaignie noble and riche
With torche and gret sollempnite.
To Salamyne the Cite
Thei lede, and carie forth withal
The dede corps, and sein it schal
Beside thilke ymage have
His sepulture and be begrave:
This corps and this ymage thus
Into the Cite to Venus,
Wher that goddesse hire temple hadde,
Togedre bothe tuo thei ladde.
This ilke ymage as for miracle
Was set upon an hyh pinacle,
That alle men it mihte knowe,
And under tht thei maden lowe
A tumbe riche for the nones
Of marbre and ek of jaspre stones,
Wherin this Iphis was beloken,
That evermor it schal be spoken.
And for men schal the sothe wite,
Thei have here epitaphe write,
As thing which scholde abide stable:
The lettres graven in a table
Of marbre were and seiden this:
'Hier lith, which slowh himself, Iphis,
For love of Araxarathen:
And in ensample of tho wommen,
That soffren men to deie so,
Hire forme a man mai sen also,
Hou it is torned fleissh and bon
Into the figure of a Ston:
He was to neysshe and sche to hard.
Be war forthi hierafterward;
Ye men and wommen bothe tuo,
Ensampleth you of that was tho:
Lo thus, mi Sone, as I thee seie,
It grieveth be diverse weie
In desepeir a man to falle,
Which is the laste branche of alle
Of Slouthe, as thou hast herd devise.
Wherof that thou thiself avise
Good is, er that thou be deceived,
Wher that the grace of hope is weyved.
Mi fader, hou so that it stonde,
Now have I pleinly understonde
Of Slouthes court the proprete,
Wherof touchende in my degre
For evere I thenke to be war.
Bot overthis, so as I dar,
With al min herte I you beseche,
That ye me wolde enforme and teche
What ther is more of youre aprise
In love als wel as otherwise,
So that I mai me clene schryve.
Mi Sone, whyl thou art alyve
And hast also thi fulle mynde,
Among the vices whiche I finde
Ther is yit on such of the sevene,
Which al this world hath set unevene
And causeth manye thinges wronge,
Where he the cause hath underfonge:
Wherof hierafter thou schalt hiere
The forme bothe and the matiere.