Of all the maids of fair Scotland,
The fairest was Marjorie;
And young Benjie was her ae true love,
And a dear true love was he.

And wow but they were lovers dear,
And lov'd full constantlie;
But aye the mair when they fell out,
The sairer was their plea.

And they ha'e quarrell'd on a day,
Till Marjorie's heart grew wae;
And she said she'd chuse another luve,
And let young Benjie gae.

And he was stout and proud-hearted,
And thought o't bitterlie;
And he's gane by the wan moonlight,
To meet his Marjorie.

'Oh, open, open, my true love,
Oh, open and let me in!'
'I darena open, young Benjie,
My three brothers are within.'

'Ye lee, ye lee, ye bonnie burd,
Sae loud's I hear ye lee;
As I came by the Louden banks,
They bade gude e'en to me.

'But fare ye weel, my ae fause love,
That I have lov'd sae lang!
It sets ye chuse another love,
And let young Benjie gang.'

Then Marjorie turn'd her round about,
The tear blinding her e'e;
'I darena, darena let thee in,
But I'll come down to thee.'

Then salt she smil'd, and said to him--
'Oh, what ill ha'e I done?'
He took her in his arms twa,
And threw her o'er the linn.

The stream was strong, the maid was stout,
And laith, laith to be dang;
But ere she wan the Louden banks,
Her fair colour was wan.

Then up bespake her eldest brother--
'Oh, see na ye what I see?'
And out then spake her second brother--
'It is our sister Marjorie!'

Out then spake her eldest brother--
'Oh, how shall we her ken?'
And out then spake her youngest brother--
'There's a honey mark on her chin.'

Then they've ta'en the comely corpse,
And laid it on the ground;
Saying--'Wha has kill'd our ae sister?
And how can he be found?

'The night it is her low lykewake,
The morn her burial day;
And we maun watch at mirk midnight,
And hear what she will say.'

With doors ajar, and candles light,
And torches burning clear,
The streekit corpse, till still midnight,
They waked, but naething hear.

About the middle of the night
The cocks began to craw;
And at the dead hour of the night,
The corpse began to thraw.

'Oh, wha has done thee wrang, sister,
Or dared the deadly sin?
Wha was sae stout, and fear'd nae dout,
As throw ye o'er the linn?'

'Young Benjie was the first ae man
I laid my love upon;
He was sae stout and proud-hearted,
He threw me o'er the linn.'

'Shall we young Benjie head, sister?
Shall we young Benjie hang?
Or shall we pike out his twa gray een,
And punish him ere he gang?'

'Ye maunna Benjie head, brothers,
Ye maunna Benjie hang;
But ye maun pike out his twa gray een.
And punish him ere he gang.

'Tie a green gravat round his neck,
And lead him out and in,
And the best ae servant about your house
To wait young Benjie on.

'And aye at every seven years' end,
Ye'll take him to the linn;
For that's the penance he maun dree,
To scug his deadly sin.'

Foul fa' the breast first treason bred in!
That Liddesdale may safely say:
For in it there was baith meat and drink,
And corn unto our geldings gay.

We were stout-hearted men and true,
As England it did often say;
But now we may turn our backs and fly,
Since brave Noble is seld away.

Now Hobie he was an English man,
And born into Bewcastle dale;
But his misdeeds they were sae great,
They banish'd him to Liddisdale.

At Kershope foot the tryst was set,
Kershope of the lilye lee;
And there was traitour Sim o' the Mains,
With him a private companie.

Then Hobie has graith'd his body weel,
I wat it was wi' baith good iron and steel;
And he has pull'd out his fringed grey,
And there, brave Noble, he rade him weel.

Then Hobie is down the water gane,
E'en as fast as he may drie;
Tho' they shoud a' brusten and broken their hearts,
Frae that tryst Noble he would na be.

'Weel may ye be, my feiries five!
And aye, what is your wills wi' me?'
Then they cry'd a' wi' ae consent,
'Thou'rt welcome here, brave Noble, to me.

'Wilt thou with us in England ride,
And thy safe warrand we will be?
If we get a horse worth a hundred punds,
Upon his back that thou shalt be.'

'I dare not with you into England ride;
The Land-sergeant has me at feid:
I know not what evil may betide,
For Peter of Whitfield, his brother, is dead.

'And Anton Shiel he loves not me,
For I gat twa drifts o his sheep;
The great Earl of Whitfield loves me not,
For nae gear frae me he e'er could keep.

'But will ye stay till the day gae down,
Until the night come o'er the grund,
And I'll be a guide worth ony twa,
That may in Liddesdale be fund?

'Tho' dark the night as pitch and tar,
I'll guide ye o'er yon hills fu' hie;
And bring ye a' in safety back,
If ye'll be true and follow me.'

He's guided them o'er moss and muir,
O'er hill and houp, and mony a down;
Til they came to the Foulbogshiel,
And there, brave Noble, he lighted down.

But word is gane to the Land-sergeant,
In Askirton where that he lay--
'The deer that ye hae hunted lang,
Is seen into the Waste this day.'

'Then Hobbie Noble is that deer!
I wat he carries the style fu' hie;
Aft has he beat your slough-hounds back,
And set yourselves at little lee.

'Gar warn the bows of Hartlie-burn;
See they shaft their arrows on the wa'!
Warn Willeva and Spear Edom,
And see the morn they meet me a'.

'Gar meet me on the Rodric-haugh,
And see it be by break o' day;
And we will on to Conscowthart-Green,
For there, I think, we'll get our prey.'

Then Hobbie Noble has dream'd a dream,
In the Foulbogshiel, where that he lay;
He thought his horse was neath him shot,
And he himself got hard away.

The cocks could crow, the day could dawn,
And I wot so even down fell the rain;
If Hobbie had no waken'd at that time,
In the Foulbogshiel he had been tane or slain.

'Get up, get up, my feiries five!
For I wot here makes a fu' ill day;
Yet the warst cloak of this companie,
I hope, shall cross the Waste this day.'

Now Hobie thought the gates were clear;
But, ever alas! it was not sae:
They were beset wi' cruel men and keen,
That away brave Hobbie could not gae.

'Yet follow me, my feiries five,
And see of me ye keep good ray;
And the worst cloak o' this companie
I hope shall cross the Waste this day.'

There was heaps of men now Hobbie before,
And other heaps was him behind,
That had he wight as Wallace was,
Away brave Noble he could not win.

Then Hobie he had but a laddies sword;
But he did more than a laddies deed;
In the midst of Conscouthart-Green,
He brake it oer Jersawigham's head.

Now they have tane brave Hobie Noble,
Wi' his ain bowstring they band him sae;
And I wat heart was ne'er sae sair,
As when his ain five band him on the brae.

They have tane him on for West Carlisle;
They ask'd him if he knew the why?
Whate'er he thought, yet little he said;
He knew the way as well as they.

They hae ta'en him up the Ricker gate;
The wives they cast their windows wide;
And every wife to anither can say,
'That's the man loos'd Jock o' the Side!'

'Fye on ye, women! why ca' ye me man?
For it's nae man that I'm used like;
I am but like a forfoughen hound,
Has been fighting in a dirty syke.'

Then they hae tane him up thro' Carlisle town,
And set him by the chimney fire;
They gave brave Noble a wheat loaf to eat,
And that was little his desire.

Then they gave him a wheat loaf to eat,
And after that a can o beer;
Then they cried a' with ae consent,
'Eat, brave Noble, and make gude cheer!

'Confess my lord's horse, Hobie,' they said,
'And the morn in Carlisle thou's no die;'
'How shall I confess them,' Hobie says,
'For I never saw them with mine eye?'

Then Hobie has sworn a fu' great aith,
By the day that he was gotten and born,
He never had ony thing o' my lord's,
That either eat him grass or corn.

'Now fare thee weel, sweet Mangerton!
For I think again I'll ne'er thee see:
I wad betray nae lad alive,
For a' the goud in Christentie.

'And fare thee weel, sweet Liddesdale!
Baith the hie land and the law;
Keep ye weel frae traitor Mains!
For goud and gear he'll sell ye a'.

'Yet wad I rather be ca'd Hobie Noble,
In Carlisle where he suffers for his faut,
Before I'd be ca'd traitor Mains,
That eats and drinks of the meal and maut.'

Jock O The Side

Now Liddisdale has ridden a raid,
But I wat they had better staid at hame;
For Mitchell o Winfield he is dead,
And my son Johnie is prisner tane?
With my fa ding diddle, la la dew diddle.

For Mangerton house auld Downie is gane,
Her coats she has kilted up to her knee;
And down the water wi speed she rins,
While tears in spaits fa fast frae her eie.

Then up and bespake the lord Mangerton:
'What news, what news, sister Downie, to me?'
'Bad news, bad news, my lord Mangerton;
Mitchel is killd, and tane they hae my son Johnie.'

'Neer fear, sister Downie,' quo Mangerton;
'I hae yokes of oxen, four-and-twentie,
My barns, my byres, and my faulds, a' weel filld,
And I'll part wi them a' ere Johnie shall die.

'Three men I'll take to set him free,
Weel harnessd a' wi best of steel;
The English rogues may hear, and drie
The weight o their braid swords to feel

'The Laird's Jock ane, the Laird's Wat twa,
O Hobie Noble, thou ane maun be!
Thy coat is blue, thou has been true,
Since England banishd thee, to me.'

Now, Hobie was an English man,
In Bewcastle-dale was bred and born;
But his misdeeds they were sae great,
They banished him neer to return.

Lord Mangerton then orders gave,--
'Your horses the wrang way maun a' be shod;
Like gentlemen ye must not seem,
But look like corn-caugers gawn ae road.

'Your armour gude ye maunna shaw,
Nor ance appear like men o weir;
As country lads be all arrayd,
Wi branks and brecham on ilk mare.'

Sae now a' their horses are shod the wrang way,
And Hobie has mounted his grey sae fine,
Jock his lively bay, Wat's on his white horse behind,
And on they rode for the water o Tyne.

At the Cholerford they a' light down,
And there, wi the help o the light o the moon,
A tree they cut, wi fifteen naggs upon each side,
To climb up the wall of Newcastle toun.

But when they came to Newcastle toun,
And were alighted at the wa,
They fand their tree three ells oer laigh,
They fand their stick baith short aid sma.

Then up and spake the Laird's ain Jock,
'There's naething for't; the gates we maun force.'
But when they cam the gate unto,
A proud porter withstood baith men and horse.

His neck in twa I wat they hae wrung;
Wi foot or hand he neer play'd paw;
His life and his keys at anes they hae taen,
And cast his body ahind the wa.

Now soon they reached Newcastle jail,
And to the prisner thus they call:
'Sleips thou, wakes thou, Jock o the Side,
Or is thou wearied o thy thrall?'

Jock answers thus, wi dolefu tone:
'Aft, aft I wake, I seldom sleip;
But wha's this kens my name sae weel,
And thus to hear my waes does seek?'

Then up and spake the good Laird's Jock:
'Neer fear ye now, my billie,' quo he;
'For here's the Laird's Jock, the Laird's Wat,
And Hobie Noble, come to set thee free.'

'Oh, had thy tongue, and speak nae mair,
And o thy talk now let me be!
For if a' Liddesdale were here the night,
The morn's the day that I maun die.

'Full fifteen stane o Spanish iron,
They hae laid a' right sair on me;
Wi locks and keys I am fast bound
Into this dungeon mirk and drearie.'

'Fear ye no that,' quo the Laird's Jock;
'A faint heart neer wan a fair ladie;
Work thou within, we'll work without,
And I'll be sworn we set thee free.'

The first strong dore that they came at,
They loosed it without a key;
The next chaind dore that they cam at,
They gard it a' in flinders flee.

The prisner now, upo his back,
The Laird's Jock's gotten up fu hie;
And down the stair him, irons and a',
Wi nae sma speed and joy brings he.

'Now, Jock, I wat,' quo Hobie Noble,
'Part o the weight ye may lay on me,'
'I wat weel no,' quo the Laird's Jock
'I count him lighter than a flee.'

Sae out at the gates they a' are gane,
The prisner's set on horseback hie;
And now wi speed they've tane the gate;
While ilk ane jokes fu wantonlie.

'O Jock, sae winsomely's ye ride,
Wi baith your feet upo ae side!
Sae weel's ye're harnessd, and sae trig!
In troth ye sit like ony bride.'

The night, tho wat, they didna mind,
But hied them on fu mirrilie,
Until they cam to Cholerford brae,
Where the water ran like mountains hie.

But when they came to Cholerford,
There they met with an auld man;
Says, 'Honest man, will the water ride?
Tell us in haste, if that ye can.'

'I wat weel no,' quo the good auld man;
'Here I hae livd this threty yeirs and three,
And I neer yet saw the Tyne sae big,
Nor rinning ance sae like a sea.'

Then up and spake the Laird's saft Wat,
The greatest coward in the company;
'Now halt, now halt, we needna try't;
The day is comd we a' maun die!'

'Poor faint-hearted thief!' quo the Laird's Jock,
'There'll nae man die but he that's fie;
I'll lead ye a' right safely through;
Lift ye the prisner on ahint me.

Sae now the water they a' hae tane,
By anes and 'twas they a' swam through
'Here are we a' safe,' says the Laird's Jock,
'And, poor faint Wat, what think ye now?'

They scarce the ither side had won,
When twenty men they saw pursue;
Frae Newcastle town they had been sent,
A' English lads right good and true.

But when the land-sergeant the water saw,
'It winna ride, my lads,' quo he;
Then out he cries, 'Ye the prisner may take,
But leave the irons, I pray, to me.'

'I wat weel no,' cryd the Laird's Jock,
'I'll keep them a'; shoon to my mare they'll be;
My good grey mare; for I am sure,
She's bought them a' fu dear frae thee.'

Sae now they're away for Liddisdale,
Een as fast as they coud them hie;
The prisner's brought to his ain fireside,
And there o's airns they make him free.

'Now, Jock, my billie,' quo a' the three,
'The day was comd thou was to die;
But thou's as weel at thy ain fireside,
Now sitting, I think, 'tween thee and me.'

They hae gard fill up ae punch-bowl,
And after it they maun hae anither,
And thus the night they a' hae spent,
Just as they had been brither and brither.